السلام عليكم ورحمة الله وبركاته
أحبتي كنت متابعه جداً لهذا المنتدى وكنت أقرأ مشكلات البنات هذا بس لأخذ الخبرة وأتعلم كيف أتصرف في المواقف المشابهه لها لكن أنا الان هنا لأكتب معاناتي لأطلب من صاحبات الخبرة توجيهي والوقوف معي بالنصيحه الطيبه لا حرمكم الله الأجر
أنا متزوجة من سنتين رزقني الله بنت ولله الحمد أسكن بالدور الثاني فوق خالتي وطبعاً إني اسكن بيت ثاني هذا شي مستحيل لأن زوجي أصغر إخوانه وكل واحد متزوج وساكن بيت لوحده والبنات أيضاً متزوجات وكل وحده في بيت ماعدا الكبيرة متزوجه ومعها 3أولاد وبنت وهي موظفه وساكنه مع خالتي وزوجها بعيد وعنده زوجه ثانيه وزوجي هو المسؤول عن أمه وهذا يسعدني لأن اللي مافيه خير لأهله مافيه خير للناس وأخته هي اللي لها الرأي في البيت وهي اللي تفرض رأيها على زوجي وهو عاجبه ووين ماتبي يوديها وهو مستانس عكسي تماما أحيانا يرفض يوديني ويقول ليه أما هي على طول يوديها ومن غير نقاش وهذا يحز في خاطري لأني ماحب التفرقه ووالله اني كنت أقول له أحياناً لما نروح سوق أسأل اختك يمكن تبي السوق ... أمه دائماً تمدح أخوانه قدامه مع أنه أكثر واحد يخدمها بس عشان يزيد ويتفانى أكثر وتمدح خواته وتحنن قلبه عليهن وتقوله يوديهن مع أن أزواجهن موجودين
الشئ اللي مضايقني تدخلهن في حياتنا لأني دائماً ألاحظ نكون متفقين على شئ وهو مقتنع تماما ولما ينزل تحت ويرجع يكون مغير رأيه وأعرف على طول أنهم مأثرين عليه وقدمت على شغاله التقديم عليه والراتب علي لما صار لها شهر عندي ماأرتحت وطبعا وهي عندي لما كان يبي شي من تحت يقولون له أرسل شغالتك تاخذه واذا راحت لهم سولفوا معها ومره يقولون بنخطبها وكلام فاضي ويقولون وهو جالس شغالتكم حلوه ومحفظين الصغار هالكلام كل شوي يجون يقولون وين شغالتكم وياخالي شغالتك حلوة ومن هالكلام وحسبنا الله ووديتها عند أمي لان شقتي صغيرة وبوجهي كل يوم ومن وقت ماوديتها لأمي وهم مو مرتاحين وهو مجنني وكل ماتجي مناسبه عند أمه يقول بنروح نجيب الشغاله تساعد خواتي واذا بيروحون مشوار قال بنجيب الشغاله تجلس عند الصغار وكل مرة طلب جديد وانا كل مره أرفض واقول امي عندها بنتي ولازم الشغاله معها ومره انفجر علي قال أنا اجيب الشغاله وانتي تحطينها عند أمك قلت بدخل جمعيه وادفع لك والحمد لله دفعت له فلوس التقديم وارتاحوا كلهم قلت لو قالت لك اختك نبي الشغاله ايش بتقول لها قال بقول خلاص دفعت لي فلوسها وماعاد هي لي .... والله أني مليت من هالتدخلات وهناك تصرفات غير وغير بس عشان ماطول عليكم والله احيانا اجلس افكر ان مستحيل حياتي تستمر كذا بس مادري كيف أتصرف ...
أتمنى من صاحبات الخبرة يساعدوني تكفون عطوني حل لو مكاني شتسوون في هالمواقف وانا ان قلت شي في اهله وهو مجرد بس تلميحات عشان يفهم زعل وقال انتي ماتحبين الناس وكل مرة أنا الغلطانه .
الان نفسي أقدم على شغاله لكن ماراح يتركونها وكأن ماقدم على شغاله إلا أنا وهم عندهم شغاله وحريم أولادهم كل وحده عندها شغاله ولايجونهم إلا كل إسبوعين مرة وانا اجيهم كل شوي واذا يومين ماجيتهم قالوا وينك ما كأنك موجودة بالديرة وزوجي يسمع طبعاً والله أني أنقهر دائما واحتسب الاجر .. نفسي أطلع من هالبيت عشان اخذ راحتي وحريتي بس هذا عند زوجي من سابع المستحيلات ويقول أنا مجنون أترك بيت ملكي واخذ أجار .
هذي معاناتي كتبتها لكم وأبي منكم النصيحه :(
والسلام عليكم ورحمة الله وبركاته
** ريمــــــــا ** @ryma_21
عضوة نشيطة
يلزم عليك تسجيل الدخول أولًا لكتابة تعليق.
الصفحة الأخيرة
وفي نساء مرتاحين لان اهل ازواجهم في قمة الاخلاق
انتِ مشكلتك في اخت زوجك وتدخلها بحياتك بطريقة غير مباشرة
بديكِ حل يمكن ينفع معاكِ
حاولي تخلي اخت زوجك صديقة لكِ
يعني اشتكي لها من اهمال اخوها , من اهمالوا لرايك
بيني لها انك تحبينهم ما تبغي تبعدي عنهم وانك مرتاحة
يعني خذيها بصفك , قوليلها شيء يخليها تخجل من تدخلها بحياتك
جيبيلها هداياه , لان هي نفسها مكسورة من بعد زوجها عنها
حاولي تتعاملي معاه كانك تتعاملي مع شخص مريض نفسياً
اذا صلح حالك معاها راح يصلح حالك مع ام زوجك
الله يوفقك ويصلح حالك ويسعدك مع زوجك