نفسي أترك الحبوب ومتردده انصحوني وساعدوني

مراحب يا قمورات :)


سالفتي سالفه لكن قبل ما أبدأ حبيت أقول أي وحده تبي ترد برد يساعدني أو تدعي لي الله يوفقها وأي وحده عندها رد يعور القلب او تجي تكلمني كاني مو راضيه بعطية ربي تحتفظ برايها لنفسها أحسن لها :(



نجي لموضوعي ..

انا متزوجه من كم سنه ورزقني ربي بثلاث بنوتات ..

طبعا حملت في البدايه واجهضت كم مره واللي كان حملهم متقدم وعرفت جنسهم كانوا أولاد

وبعد الرقيه وماء زمزم واستمراري ع البقره رزقني ربي ببناتي اللهم لك الحمد


الان بنتي الصغيره كملت ثلاث سنوات ونفسي اترك الحبوب وبصراحه تعرفون خااايفه ..
قلبي متقطع ومتشفق الولد والله اني شفت ولد تدمع عيني الله يخليهم لاهاليهم

والمشكله زوجي لا سند و تلد مشاكله مع اخوانه ما تخلص الله يكيفيه شرهم والله اني دايم اشيل هم بناتي نفسي اجيب ولد ينفعهم ويعزهم ويعاون ابوهم عليهم
لاتجي وحده مطفيه النور وتقول البنات والبنات , انا راضيه الحمدلله وبناتي بالدنيا احبهم واعزهم بس كلنا عارفين قيمة الولد و لا في احد ينكرها وان الله طرح فيه البركه ينفعني وينفعهن

الان انصحوني .. مخططه اترك المانع .. وش الاشياء اللي ممكن اتبعها وتزيد من فرصة انجاب الولد ؟ بعد ارادة رب العالمين سبحانه
وهل ممكن فعلا انه الحسد او التابعه تقتل الجنين الذكر وتترك البنات ؟ انا سمعت كذا وبحثت واستغربت هل انا احتاج لرقيه ولا الموضوع صدفه وعادي

واي وحده تمر تدعي لي والله اني شايله هم وخايفه ويضيق صدري لا شفت الناس بس يتشمتون بزوجي وما ينادونه الا ابو البنات والله يابنات اللي مجربه زي بتحس باللي أحس فيه الناس مرضى وكلامهم يغث والله لا بشره احد او جاه خبر ان فلان جاه ولد انه تختنق دمعته وانا اروح اقرب غرفه اصيييح لين يطلع اللي بخاطري وادعي ربي سبحانه يرزقني ويقدرني افرحه

يحس بوحده صح ما قال لي بسس اعرفه وده بولد مثل الرجال والمشكله كل اللي حولنا تبارك الرحمن اولاد ما عندهم بنات ابد سواء اهلي و اهله

والله دايم احس بنقص ويخافون على عيالهم مني مدري ليش مع اني احبهم واذكر الله عليهم بس اسلوبهم حسسني كأن الولد شيء مستحيل

مافي شيء مستحيل على رب العباد وان شاء الله باجي ابشركم بيوم اني حملت وولدت وجبت ولد

لكن حبيت افضفض لكم واستشيركم أي وحده بعد ارادة الله ثم الدعاء والاخذ بالاسباب نفعها شيء تجي تعلمني وتطرح تجربتها لي
افكر كثير اتابع عند دكتوره تنصحوني ؟ ولا وش اسوي ابي اخطط لحمل واستعد له صحيا ونفسيا

انطلقوا ياحلوات واللي ماعندها شي تدعي لي بظهر الغيب بالولد الصالح اللي يكون عونا لي في دنياي يارب