نفسي اساعدها واطلعها من اللي هي فيه شخصيتها كلها ع بعضها مخربطه

السلام عليكم
انا في موضوع شاغلني من ايام وخصوصا بعد ذا السالفه اللي حصلت لي
قريبتي بنت طيبه وحبيبه وساذجه بس مشكلتها حركاتها وكذبها على اهلها منرفزني وكوني قريبه الاهلها نفسي انبهم بطريقه معينه
قريبتي هذي في اخر سنه جامعه
بنت عاديه جدا مابي اوصف واقول فيها وفيها بس تعتبر مثلها مثل غيرها
بس عشان افهمكم شوي وترسمون الصوره في بالكم هي قصيره وسمينه وشعرها خفيف وملامحها اقل من عاديه
اللي خلاني اوصف
انها يا اخواتي
تقول لي انها فيها عين وناس حاسدينها لانها جميله وخصوصا بنات خالتها وطلبت اساعدها اخذ اثر بنات خالاتها لاني دايم اشوفهم وانا رفضت لاني حسيته مجرد وسواس فقط
وزياده كل ماراحت عزيمه ولا زواج تكلمني تقول فلانه حسدتني وانا من رجعت ظهري يوجعني ولا بطنها ولا راسها ولازم تعيد نفس الموال
الدرجة امها اخذتها شيخ يقراء عليها وسوت نفسها منصرعه وقامت تصرخ وامها مسكينه انجنت وخافت وصارت تمشي وتاخذ اثر الناس تحسب بنتها معيونه وانا والله العظيم يابنات اعرف البنت هذي وقريبتي ومثل اختي ورب الكعبه يااخواتي متأكده 100 بال100 ان مافيها الا العافيه اعرفها زين زين
انا مو مضيق خلقي الا امها المسكينه صارت موسوسه من ورى حركات بنتها وبس تخاف
ونفسي اعرف قريبتي هذي ليش تسوي الحركات هذي وتتخيل ان كل الناس تحسدها
دايم اذكرها انه تحسن الظن بالله وتنتبه للاذكار بس هي ولاهي هي معايا واحسها تستمتع وهي تقص علي قصص انه فلانه مدحتها ثم رجعت وبطنها يوجعها ولا فلانه مدحت بشرتها وطلعلها حبه احسها مستمتعه وهي تقص ثم فجئه الاقيها تشرب مويه صفرا اقولها وش هذي تقول غسال بنت خالتي فلانه اخذته منها بدون ماتدري يعني وصل فيها الامر تمثل علينا بعد زواج او عزيمه انها مريضه ومحسوده وشي اساسي تحسد بعد كل زواج وكل المعازيم يتركون اشكال واللوان البنات ويحسدونها هي وهي لا ترقص ولا تتحرك من مكنها يعني محد انتبلها بس هي ودها تبين انها مميزه وناس تحسدها
والمشكله تجيك وتسألني انا حلوه اقولها تهبلين اسم الله عليك تنبسط وتفرح بعد شوي تقولي راسي مصدع احس فيني بلى ذكرتي الله قبل شوي يوم تمدحيني تفي علي واذكري الله ثم اسوي اللي تقول عليه وانا اقول في نفسي وشوله اجاملها وامدح
واذا سالتني عن شكلها ومامدحت تنشبلي لما امدحها عجزت افهم تصرفاتها ياناس والله مافيها اي شي تحسد عليه وهي مررره معطيه نفسها جو ان الكل حاسدها ويغار منها وحتى امها الضعيفه صارت مثلها والله امها كانت انسانه معتدله وماهي الهدرجة من الوسواس الحين تغيرت بعد بنتها وصارت توسوس
مره من المرات بنت خالتي شافت قريبتي هذي وقامت قريبتي تحكيلها انها شافت حلم وتفسيره طلع انها معيونه وانه تدور اللي حاسدها
ردت بنت خالتي عليها قالت وش عليه العين مثلك مثل بنات خلق الله اقول خفي علينا ياسندريلا والله كل مره اجلس معاك اقول فلانه هذي الحلقه وش بتقولي حسدها سواق الجيران ولا دكتورة الجامعه ولا اخوها الحلقه عن مين شي اساسي تقولين لنا سالفه فيها احد حسدك هذي لازم اسمعها
ومن بعدها قريبي هذي صارت تمشي مع بنت خالتي سيييده
ابي ياناس افهمها بأسلوب تخلي حركات السخافه عنها وترحم امها المسكينه والله يا اخواتي هذي البنت ارحمها وانا اشوفها تسوي بنفسها كذا وكل قرايبنها يضحكون عليها ويتطنزون فيها ومايسمونها الا المحسوده
صايره مضحكه البنات خالاتي ودي اعقلها واكلمها بس مدري كيف
بعض الاحيان ودي اقول بوجهها تراني ادري انك تمثلين على امك انك محسوده خافي من ربك لايبلاك صدق بس ينربط اللساني
كل قريباتها اللي بعمرها مايحبون يجلسون معها يقولون سواليفها زي سواليف بنت 6 ابتدائي ماكنها قريب بتتخرج
ارحمها ونفسي اساعدها خصوصا ماعندها خوات
غير كذا يا اخواتي
الله يصلحها فيها طبع بجمعة بنات اذا سولفت تقول كنت رايحه السوق ودخلت المحل وشافني صاحب المحل وكنت مكحله عيوني شكله خق وكنت حاطه مناكير وطالع اصابعي وكلام جدا سخيف
ولا كثير تروح مستشفيات وتدخل عند دكتور ذكر ثم من ترجع تقولي دخلت عند دكتور وطالعني وماشال عينه عني حسيته خق ع عيوني
او مثلا طلعنا سوق سوا ومر واحد وزوجته
وهو ولاطالع فيها ولا عطاها وجه تجي بكل وقاحه وكذب تحسب مالي اذون اسمع وتقولي وهو مار همس بصوت واطي قال يالبى ذا العيون وانا اطالع وسمع لاقال يالبى ولابطيخ واساسا ماطلع فيها
يعني تتخيل اشياء او تكذب مدري شقصتها
غير كذا تلميحها بأن اخوي يحبها وهو والله مادرى عن هوى دارها وتحاول اذا جت عند اهلي تصادفه وغير كذا
ياناس هي قلبها مسكين وطيب ومابها شر بس كذابه وممثله درجة اولى
وكمان تكلم ولد عمها بالسر هذي دريت فيها بدون ماتدري هي وماوجهتها وترسله صورها كمان طبعا هي ماعترفت بس انا عرفت بطريقتي
انا ياناس راحمتها وودي اساعدها هي مصدقه انه بيوم من الايام يمكن يتزوجها
والله يااخواتي عطتني جوالها احمل لها برنامج وكنت شاكه انها تكلمه ودخلت ع الواتس اب وشفت صورها مرسلتلها له انا بالاول ماعرفت انه ولد عمها بس استنتجت انه هو لانها كثير تسولف عنه وتقول انه نفسها تتزوج شخص يشبهه وكمان مرسلتله صوره ورد عليها قال يع انحفي ويدينك كبار وهي ياقلبي تقوله ابشر من عيوني يعني عادي مازعلها الكلام والله انها بالمحادثه يكلمها وهو باين انه متقرف ويقولها امسحي رقمي انا مارحمت الا اخوانك وهي تضحك وتقول لا
شي يضيق الصدر
انا طفح الكيل من زمان ادري واطالعها من بعيد بس نفسي اسوي شي اساعدها بطريقه تخليها تعقل وتترك السخافات هذي شخصيتها غريبه عجيبه مو نفس البنات اللي بعمرها هي اخر سنه جامعه بس عايده سنتين بالابتدائي وسنه بالمتوسط يعني عمرها تقريبا 25 سنه تعتبر حرمه عاقله بس تصرفاتها توحي انها مراهقه
على فكره اخواتي بعض الاحيان تتصنع انها تعبانه عشان تروح المستشفى ثم اذا رجعت تبدا تحكيلي مغامراتها من حق الاستقبال الرئيس الاطباء هذا طالعها وهذا ابتسم لها مدري عاد صادقه ولاتكذب وامها ياعمري ياتصرفلها دواء ومادرت عنها
شي جدا مقرف انا خايفه البنت تضيع لانها ساذجه وابوها وامها كبار وماهم يمها واخوانها كل واحد منشغل بحاله