نفسي عزيزه

ولكن نفسي عزيزه

من كل قلبي قلتها اليوم ما بيك
ويشهد على ما قلت دمع بكيته
ليت الليالي ما تجني بطاريك
ودي بنسيانك ولو ما قويته
وليت الحنين اللي بعيني يراعيك
يموت وانسى اللي لنفسي جنيته
كلمتني وتقول قلبي يناديك
يشفق على شوقك وحبك رجيته
قلت الله أقوى قلبي اليوم ساليك
والله ما يرجع فؤاد رميته
يوم ان قلبي يا عشيري مصافيك
لا يا حسايف بالخيانه جزيته
يومه يبيك وساعي لجل يرضيك
صديت عنه وفي عذابك كويته
واليوم يوم انه قنع في تجافيك
تقول حبك يا حبيبي شريته
نسيت كل اللي جرى من تغليك
ابعد ترى اليوم بعدك رضيته
أمشي لك بنية سليمة وأداريك
واثرك بنية شر قلبي نويته
ما بيننا رجوى ولا نيب راجيك
هدمت قصر في غرامك بنيته
قلبي عقب موت الوفاء جا يعزيك
ويغسل بدمع العين حب نسيته
ويكفنه بالورد وعهود ما ضيك
ويدفن معه ذكرى حبيب كويته