نفسي يكون لي اخت تشاركني الحياه

السلام عليكم ورحمة الله
عندي شي داخلي ودي اقوله بس مرات مو كل شي داخلك تقدرين تقولينه للمجتمع الي حولك ولا لاهلك
ومو كل شي يشوفونه مهم ممكن تافهه بالنسبة لهم و مهم بالنسبة لي لأنه يأثر علي .. ما يحس مرات بالنار الا واطيها
وارجع اقول اللهم لا اعتراض والحمدلله على كل حال يارب وموضوعي من باب الفضفضه فقط
يا بنات الله مارزقني ب اخت و احس بالغربه ودي ب أخت تسولف معي تشاركني نهاية الاسبوع تقعد معي نطلع مع بعض
الحياه فعلا صعبه بدون اخت .. اقعد طول يومي لوحدي ابي اخت .. ابي احد يسولف معي .. يتكلم يفضفض و افضفض له
لا سافرت تذكرني بابسط شي .. ونتبادل هدايا و نتشارك كل شي ..
حتى اذا بشتري لبس ادور السوق كامل ادور لبس وبالاخير اطلع ما اخذ شي ينكسر خاطري واذا شريت شي يطلع في غلط
لدرجة انتبه بعدين ومو بس باللبس بكل شي اختاره
غير الهواش لا طولت وانا ادور لبس لان ممنوع اطلع لوحدي و تذمر ابوي من المشاوير
واذا رحت زواجات لاقاربنا الكل معه اخته الا انا قاعده لوحدي ماعندي احد معي قاعده لوحدي وامي مع الحريم الكبار
لا تقولون خلك قريبه من امك امي اغلب وقتها مع صديقاتها وجاراتها احاول اسوي اي نشاط معها ما تبيني
تقول مو فاضيه مشغولة تطلع لي اي عذر
مرت ايام علي صعبه صار فيها مشاكل ماوقفت معي مثل الامهات ولا سالت وش فيني ولا كلفت على نفسها
اهم شي طلعاتها و الاولاد .
لي علاقات اجتماعية الحمدلله بس الاخت غير يا بنات مو كل يوم انتي بتروحين لوحدة ولا تجيك
لان حتى هالصديقات لهم اخوات و اهل و اجتماعات عائلية مو فاضيين يقعدون مرتبطين فيني
وصعب احشر نفسي بأي عايله بالقوة و اختلط ببناتهم لان مهما كان لابد في خصوصية عندهم بين الاخوات مهما كنت قريبة من اختهم
تجيني الغصه بذات لما احد يسالني كم عندك اخت وذا قلت بنت وحده مثل الي يعطوني نظرة عطف
ولا نظرة تقول شلون متحمله الحياه ؟؟؟ وانا اكابر ولا اهتم وكل ما حاولت اسوي شي يفرحني ابوي يرفض ولا مو فاضي لي وكل شي تافهه
اشوف سواليف البنات عن خواتهم واهلهم وقروب الواتس حق اخواتهم مع بعض وامهم ما شاء الله تبارك الله
الله لا يغير عليهم يارب ويخليهم حق بعض ادعي لهم من قلبي الله يبارك لهم
وياخذني الخيال لو انا لي اخت وام معي وش بيكون اسمها .. ؟ وكيف شخصيتها ,,؟ وش بنسوي ..؟
لا تقنعوني ان مو الاخت كل شي يا بنات لا كل شي وكثير بنات معهم اخوات قالو لي الاخت غير ونعمة
و سعادة و راحة و بيت ثاني بعد الام وفعلا هذا الي حاصل


يعني لو ربي كتب تزوجت من يساعدني ..؟ صار لي شي حلو من يكون معي يشاركني ..؟
انا مؤمنه ان ربي ما يضيع احد اكيد لكن لابد يكون معك في
الحياه احد يساندك يقوي عزمك ويساعدك توقفين وتساعدينها
دايم احس فرحتي وحيدة وناقصه ابي اخت تشاركني الحياه لاعطيها روحي و دمي وكل الي تبيه من عمري


حتى كم موقف تكرر علي لما اختلف مع اي احد بنقاش تجي وحدة ترمي كلمه الا اختي لا تزعلينها
لا بالمزح ولا بالجد بالبداية كنت ارد وعادي واضحك بس الموضوع زاد عن حده
ومرة مع بنات خالاتي صار حساسية بيني وبين بنت خالتي الكبيرة وانقلبوا البنات ضدي بكيت نشفت من الصياح


الي عندها اخت طيبه ويحبون بعض تحافظ عليها والله يعوضني و الي مثلي بكل خير