نكمل والا يكفي الي صار خلوكم مكاني ....ياااارب

صباح الخير جميعا
أنا يا بنات أول مرة أكتب هنا ، وابي نصيحتكم
قريبتي علاقتي بها جدا ممتازة ، كانت تنوي فتح مشروع تجاري مربح جدا بس ما تملك السيولة
المهم انها لقت أحد يمولها بمشروعها هذا بدون مقابل
تحمست له واستلمت راس المال وبدأت تجهز للمشروع .....
مشكلتها خواتها واخوانها وامها لازم يدرون عن كل شي ، حاولت أقنعها أنها ما تخبر أحد الا اذا قام المشروع
وفتحته وبدا يشتغل اما انها تخبرهم قبل لا يبدا ماله داعي ، خصوصا انهم يدرون ان ماعندها سيولة
والحديث يقول :" استعينوا على قضاء حوائجكم بالكتمان " ، ومعرفتهم مالها داعي لأنهم ماراح يفيدون بشي
ماسمعت كلامي قالت انهم بيزعلون اذا ماعلمتهم لازم اعلمهم ،قلتلها أهم شي تخبرين زوجك وعيالك وبس ، المهم انهم
دروا قالتلهم وطبعا كل وحدة قامت تنشر الخبر عند زوجها وعيالها
وأنا لي علاقة بالمشروع أبساعدها وأبستفيد ماليا وأنا كنت مرة متحمسة ، المهم أن المشروع بدا
يتعرقل بصورة ماتتوقعونها يابنات، يعني أشياء ماتوقعناها ابد ومتوفرة بكل مكان تتعرقل لنا ،
أنا ما أقدر أوضح أكثر لأن في ناس يعرفوني بالمنتدى
المشروع له أكثر من سبع شهور مع أنه المفروض ما يكمل شهر ، والناس دائما بمشاريعهم
عندهم عقبة مادية احنى العكس المال متوفر ونقدر ندفع ، بس فيه عقبات رهيبة ماتحصل لأحد أوراق تضيع ، معاملات ترفض مع انها سليمة ...
ومع ذلك ما استسلمنا لأنها فرصة عمر دايم أحلم فيها
قبل شوي اتصلت علي قريبتي علشان كانت بتودي بعض المعاملات وهي شوي وتصيح ،
سألتها عسى ماشر وش فيه صوتك قالت وأنا رايحة صار لنا حادث والسيارة انعفست ، حاولت أهديها
وأوسع صدرها وان هذا قضاء وقدر ...
المهم سكرت السماعة وأنا ضايق صدري عليها وعلى نفسي ، مو مصدقة الي يصير ليش كل ما راحت
تسوي شغل للمشروع هذا يصير فيه شي
والله العظيم ضاق صدري بديت أتشائم ، خفت من الجاي
نكمل المشروع والا مانكمل ؟
أخاف اذا بدا المشروع بكرا يصير فيه مصايب أكثر ، حريق يموتون الزباين والا أحد يموت عندنا والا أحد
يجيه شي
وأنا متأكدة ان هذي الفرصة ماراح تجينا مرة ثانية ، بالنسبه لي جاني شي ما أحلم فيه أبد وجلست
أخطط شهور وأبني أحلام على المشروع هذا ، بس والله بديت أخاف ، لأني أشوف ان الي قاعد يصير
مو طبيعي أبد
ما نقدر نأجل ، وأصلا الناس كلها درت وكل اجتماع عائلي يسألون بالتفصيل المملل ، ها وش صار عليكم
وش سويتو


شوروا علينا نكمل والا الى هنا ويكفي الي جانا لا يجينا شي أعظم
خلوا أنفسكم مكاني يابنات ، هذي فرصتي ان ضيعتها فأنا حمارة وبقوة ، وان كملت أخاف يصير
شي يوديني بداهية والله مرة ضايق صدري ، مع اني أعتبر متفائلة ولا أحب التشاؤم ولاني من النوع
الي يفكر كذا ، وأدري ان كل عمل وشغل لازم يصير فيه عقبات وأنا قدها ان شاء الله ، بس العقبات قامت
تتعدى المشروع ،
وآخر شي الحادث هذا ، بغت قريبتي تموت
قعدت أكلم نفسي أقولها ترى الدنيا ما تسوى ، وأهم شي حياة الشخص وراحته النفسية ، وبعدين أقول
لازم الواحد يدور على رزقه ويشتغل ويبحث ما ينام وبس

يارب انك تسهل علينا وتعينا ، ودي بحلم والا بشي يوضح لي وش الأفضل أكمل والا أوقف قبل لا أندم
بوقت ما ينفع الندم فيه لا طاح الفاس بالراس وقتها ما أقدر أتراجع ، مادامني مازلت ببر الأمان
ما لقيت أحد أقوله غيركم ، يمكن توضحون لي الصورة تشجعوني والا تنبهوني اني ما استمر ،

يارب انك تبين لي الصح يارب :(
حمدلله على سلامة قريبتي ألف الحمدلله ، ياااااااااااااااارب