نهايه قصتي..

تأخرت علي الدوره يوم..زادت فرحتي لاني كنت فرحانه طول الشهر..بالذات هذا الشهر..رحت على طول فتحت الدرج..الدرج اللي افتحه كل شهر واتذكره كل يوم..الدرج اللي حطيت فيه اغراض الحفله اللي بسويها مفاجأه لزجي لما احمل..اخيرا راح اشعل الشموع..راح البس هالفستان ..
بالرغم من نزول افرازات علي..الا ان الاخوات هنا طمنوني انها افرازات حمل..سكرت الدرج ..راح ارجع له واطلع اللي فيه..اخيرا

حللت منزلي..طلع سالب..مايهمني..اكيد راح يبين في الدم..انا حامل احساسي يقول..لبست عبايتي ورحت العياده..قالت لي الممرضه سوي سونار احسن اذا في حمل يبين واذا في دوره بعد يبين..
قلت لها اوكي ..قدامي خمس حريم مافيني صبر انتظر ..راح انتظر..حياتي كلها انتظار ماجت على ساعه..بس هالمره غير..كل ثانيه احسها عمر..

دخلت غرفه الانتظار..اااه ياغرفه لانتظار..اخيرا راح اودعج..وماراح انتظر..رن تيلفوني..هذي امي..طمنتها اني بخير وسكرت..بس ماقلت لها اني بالعياده..ما ابغيها تحاتيني..راح ابشرج يايمه اليوم..انتي اول وحده.

دخلت وحده متبرجه بلا حجاب مكياج صارخ..وحامل اعتقد بالشهر السادس..سبحان الله..الله رزقها..واكيد راح يرزقني..انا ختمت القران هذا الشهر..وصمت الخميس..وقمت الليل..واكثرت الاستغفار..وامتنعت عن الاغاني..وبكيت دم يوم عرفه..وربي يقول..ادعوني استجب لكم..

الله اكبر ..الله اكبر..اذن العشاء..قمت اصلي فرشت السجاده..وفي السجود..قلت يارب اذا كنت حامل لك الحمد والشكر واذا كنت مب حامل انك تصبرني..يارب تثبتني.

فتحت القران وقعدت اقرا..ماقطعته الا على صوت ينادي بأسمي..دوري..
طويت السجاده..وتسارعت دقات قلبي..مسكت بطني..يالله بشوف الحمل..وصلت عند غرفه السونار..قالت لي الممرضه انتظري شوي هنا ..انتي بعد اللي داخل..
ياربي ..مافي وقت ابغي انزل السوق..راح اشتري احلى لبس..في العيد رفعت مصروفي واشتريت فيه ابر وعلاج..ولبست للعيد لبس قديم..ما ابغي اثقل على زوجي..لكن الحين بنزل السوق وبشتري احلى لبس..
عندنا عزومه..راح اطلع للناس وارد على أسألتهم البايخه..وأكسر نظرات الشفقه ..واقولهم ان بطني مو منتفخ من الابر مثل كل مره..هالمره ضناي بيشرف..تعليقاتهم..مسكينه..اختربت ماتحمل..زوجها بيتزوج عليها يموت في لعيال..هههههههه سبحان الله مايدرون ان الله هو الرازق ومثل مارزقهم رزقني..
يالله دورج..دخلت وكلي ثقه..بس اول ما انبطحت على السرير..سمعت دقات قلبي..هدي يانفسي..قمت اتنافض..
افتحي رجولج..بسم الله الرحمن الرحيم..وانا اردد يارب يارب..
انا: ها في حمل
الممرضه:استني
انا:يارب يارب
الممرضه:بطانه الرحم سميكه..
انا:يعني شنهو؟
الممرضه:حامل
كشفت برقعي وهللت وكبرت ومسحت على وجهي..اخيرا راح اسافر من غير ابر..من غير زيارات للعياده في السفر.من غير حساب لايام التبويض..راح انسى عد الايام وحسابات التاريخ...شنهي بتكون رده فعل زوجي..اخيرا بفرح..ياربي بنت ولا ولد..
الممرضه:لحظه؟؟
انا: هاا
الممرضه: بس في دم كتيييييييييييير؟
حسيت الدم كله تجمع براسي...يعني شنهو؟؟؟
الممرضه..عشان يكون في حمل لازم تكون بطانه الرحم سميكه ومافي دم..انتي بطانه الرحم سميكه وفي دم؟؟
انا: في حمل الحين ولا لا؟؟
الممرضه : شوفي هالمنطقه مافي حمل..شوفي الدكتور ..
لبست ثيابي بكل هدوء..ومشيت بهدوء..رحت غرفه الانتظار..رجعت لها..قعدت بهدوء..نزلت دمعتي بهدوء..انا تنزل مني دمعه..طول هالفتره وطول رحله العلاج..وانا قويه ..في السفر لما نقطعه والسبب العلاج..مابكيت..كل شهر تنزل علي الدوره..ومابكيت..العيد مالبست ..ومابكيت..اصبر امي وزوجي واقوي ايمانهم بالله..ومابكيت..مابكيت الا عند الواحد الاحد الذي لم يلد ولم يولد.وبالليل لما الناس كلها تنام عند اللي ماينام...ليه الحين ياعيوني تدمعين..لا وقدام الناس وبالعياده..اصبري وهدي..لاتضيعين كبريائج وصبرج هنا..
دوري ادخل على الدكتور..
والله يابنات اول ما دخلت ع الدكتور قعدت ع الكرسي وانفجرت..مابكيت انفجرت..وبصوت عالي..ونيت وشهقت..الممرضه سكرت الباب في ذهول..والدكتور عجز لسانه عن الكلام..
اشفيني..انفجرتي..صياح طلع من داخل روحي لا وبصوت عالي؟؟كل هذا فيني..كل هذا كاتمته..مانزلت دمعه ولا بينت اني مهتمه للموضوع لاي مخلوق والحين انهار ..ووين؟؟
حاولت اهدي نفسي..ماقدرت..طال بكائي..الدكتور سأل الممرضه..هي سوت تحليل دم..قالت له لا بس سونار..
قال لا لازم تحليل دم..صرخت..بس في دم وايد فيني يادكتور..قال مومشكله يمكن لقط شي؟سوي تحليل دم وتعالي
رحت الاستقبال اخذ ورقه تحليل وانا اناشق قدام الرياييل والحريم؟؟الكل يناظرني وهانت عليهم بلاويهم من شوفتي..اشفيني..مو انا والله مو انا..خذت لورقه والموظفه تهديني..
سويت التحليل..انتظري نص ساعه..انتظار انتظار..المصيبه اني مب راضيه اسكت..رحت دوره المياه ..شفت نفسي في المنظره..يالله طلعي اللي فيج كله هنا..شهور العلاج..وكورسات الابر..ونظرات الناس ..وشعور زوجي..ومصاريف الدواء..والالام والاوجاع..والانتظار..
غسلت وجهي وتعوذت من الشيطان..
اتفضلي ع الدكتور..قالي اراده الله..كل شي زين بس سبحان الله..قلت له دكتور ابتدي في الانابيب..وما ادراك ما الانابيب سحب هنا وهنا ..قالي هالشهر خذي راحه..الشهر الجاي تعالي..للانابيب والانتظار.