نوروني اخواتي انا متضااااايقة ماودي يحصل بيني وبين الغالين مثل ماحصل

حياكم الله اخواتي الغاليات


يشهد الله على محبتي لكم من محبتكم للخير لأخواتكم وحبكم لمنفعة الجميع

ودي استشيركم ياعزيزاتي في موضوع حيرني كثير ومالي احد استشيره بعد الله الا انتم لأني ماودي احد يعرف بالموضوع والناس اللي عادي عندي انها تعرف فيه ماودي لأنهم يا أما ماراح ينصفوني ويعطوني الحل العادل او راح يذكرون هالسالفة طول عمرنا وماراح ينسونها ..


بقص لكم السالفة من اولها لآخرها واتمنى تقولون لي الحل السليم وحتى لو كنت غلطانه تقولون لي بس انا ابي ارتاح ويرتاح ضميري اني مسوية الصح ..



قبل سنة تقريبا كان زواجي وكنت مع خالتي ( أخت امي ) مثل السمن على العسل علاقتنا اكثر من اخوات وكنت عارفة لها وعارفة لي ومشكلة خالتي الله يصلح قلبها اللي يمشي على اللي انا ابيه بحبه واحطه بعيوني وفوق راسي .. ماتمشين على اللي هي تبيه والا تسوين لها اللي تطلبه منك تراها بتكرهك وتحقد عليك وتصيرين عدوتها اللدودة ..

مرت علي ظروف صعبة اول ايام زواجي انعزلت فيها عن الناس كلهم وكانت خالتي كل فترة تراسلني وانا مو مرة معها مثل اول لين جاء يوم وهاوشتني وذبت علي كلام والله قوي بسبب اني ماتحمست لعزيمتهم مرررة ف رديت انا عليها برد ماتعودته مني ومشت الأيام وخالتي من عقبها متغيره علي مرررررة وانا مااهتميت من هالموضوع من سوء ظروفي وحياتي اصلن كان عندي اكتئاب بسبب الحمل لأني حملت على طول من اول الزواج ..

والحين كل مااشوفها بس تنتظر كلمة مني عشان تراددني والا تعلق علي ودااايم تمدح بنات خالاتي واخوالي في وصلهم .. وترمي كم كلمة عن القطاعة تقصدني فيها .. وانا يعلم ربي فيني ماقطعت فيها ولا في حبايبي من كره فيهم ماقطعتهم الا بسبب ظروفي وحملي وزوجي نادرا مايطيعني اروح واخليه دايم يرفض اني اروح لعزايم ومناسبات يبيني اجلس عنده لاني تعبانة وحامل ..

الحين كل يوم ادعي ربي ينزع مافي قلبي وقلبها من غل ويبعد عننا ابليس واعوانه .. ودايم حتى في احلامي احلم بها ترمي علي كلام والا تنظر لي ب حقد

واخر مرة حلمت بجدي الله يرحمه زعلان منها عشان هي ماتسلم علي وقال لها ترا اذا ماسلمتي عليها ب زعل منك ومن بعد هالحلم وانا متضايقة ودي اصارحها واخاف تفهمني غلط .. اخاف تفسر كلامي لها ب شي في نفسها تكفون شيروا علي اخواتي وش اسوي ..

اللي مخليني اتردد اكلمها انها هي متأخرة في الحمل ومايثبت لها حمل اخاف لو كلمتها ماتصارحني وتحسب اني خايفة منها والا شي ويعلم ربي انها غاااااالية عندي مثل غلاوة اخواتي واكثرر

انتظر نصايحكم اخواتي واتمنى منكم الحكمة في الرأي وتنظرون للموضوع من كل جوانبه لاني استشرتكم ابي افعل الصح ماجيت انتصر لنفسي والا لخالتي ..

الله ينور لي ولكم طريق الهداية والحق يااااارب العالمين