هااااام وعاااااجل ,, طلب غريب من رجل مجهول ,, وش بيكون تصرفك في هالموقف؟

السلام عليكم ورحمة الله

ملاحظه : المعرف مستعار من صاحبته الأصلية ولها جزيل الشكر

كيفكم يابنات حواء الغاليات، ارجوكم ياريت تفيدوني بهالموضوع الغريب وتشيرون علي

ارجوا من كل وحده تقرأ الموضوع تحط نفسها مكاني وتقولي موقفها وش راح يكون وكيف بتتصرف

اخوي قرر الزواج وقالنا دورو لي على بنت الحلال . انا كان في بالي بنت حلال حاطه عيني عليها وذكرتها لاخوي وعطيته عنها بعض المعلومات وقال لي توكلي على الله وكلمي اهلها وشوفي وش يقولون، كلمت ام البنت في الموضوع وبعد فتره جاني ردها بأن بنتها موافقه مبدئيا وبشرت اخوي وبدينا في ترتيب الامور وكانت الامور متيسره وتبشر بخير. لكن الى الآن ماتمت الملكه ومتفقين على الاسبوع الجاي بيسوون فحص ماقبل الزواج.

فجأه جاني اتصال من رقم غريب والمتصل كان رجل مجهول وكان محترم ومؤدب في كلامه قال لي انتي ام فلان قلت اي نعم من معي قال انا شخص ماتعرفينه حتى انا ما اعرفك وكل اللي اعرفه عنك انك ام فلان قلت وش المطلوب قال ارجوا انك تسمعين كلامي للأخر وتفهميني مكالمتي بخصوص اخوك وخطبته لفلانه،، قلت من انت وكيف غرفت بالموضوع قال لي ما أقدر اقول لك من انا لكن ارجوا انك تفهميني وتقدرين وضعي وتعتبريني اخوك وطالب فزعتك. قلت وش المطلوب طيب؟ قال: الموضوع يابنت الاجواد باختصار البنت اللي خطبتيها لاخوك انا احبها ومتعلق فيها وفلبي موجعني عليها ومن مده وانا ناوي اتقدم لها لكن ضروفي وقتها ماساعدتني والآن لما تحسنت ضروفي واستقرت اوضاعي نويت اتقدم للبنت وكان الكلام هذا قبل شهر لكني تفاجأت بأن اخوك متفدم لها وقسم بالله من ساعتها اسودت الدنيا في عيني وضاقت بي ولا عاد ليلي ليل ولا نهاري نهار وصار يتشكى ويقول انه تعب نفسيا وحتى النوم ماعاد صار يتهنى به من عرف بالموضوع وصار يترجاني ويقول ارجوك يا ام فلان ابعدوا عن هالبنت ودورا لأخوك غيرها، اخوك ماكان يبي البنت هذي تحديداً فلذلك بيتقبل انه يدور غيرها اما انا فقسم بالله ما أشوف غيرها من البنات وقلبي موجعني عليها فلا تكسورن قلبي وانا ما تجرأت وكلمتك الا من حر مافيني وأدري ان طلبي هذا غريب لكن مالي حيلة مالقيت غير هالوسيلة احاول احافظ فيها على املي وحلمي فأرجوك اعتبريني اخوك وطالب فزعتك بأنكم تنسحبون من هالبنت وتدورون لأخوك غيرها
انا صراحه كان يقول لي هالكلام وانا مصدومه ولاني عارفه وش اقول؟ قلت له طيب البنت تحبك؟ قال لي ماراح اكذب عليك واقول لك ايه تحبني علشان تعافونها واقنعكم تتركونها. بأمانه ما أدري هي تحبني أو لأ لكن انا واثق اني لو تقدمت لها قبل اخوك ماراح ترفضني فعلشان كذا انا واثق بإذن الله انه لو انسحب اخوك وتقدمت انا بتكون من نصيبي فأرجوك لا تقطعين نصيبي انتي الوحيده بعد رب العالمين القادره على احياء املي وانهاء معاناتي اللي ممكن تقضي على حياتي، قادره بإنك تتعذرين من اهل البنت بأن مافيه نصيب وان اخوك صرف النضر عن الموضوع وفي نفس الوقت تقولين لاخوك البنت غيرت رايها وبندور لك على غيرها وبكذا ينتهي الموضوع بدون ما أحد يدري وان بغيتي تصارحين اخوك فهذا شي بينك وبينه

حاولت اعرف مين هو وكيف عرف بالموضوع ومارضى ابداً يقولي وفي النهاية اعتذر مني على هالمكالمه اللي وصفها بالغريبه وقال انا قلت كل اللي عندي واتمنى في القريب العاجل تبلغيني بقراركم في الموضوع برسالة جوال وانهى المكالمه

صراحه يابنات قفلت وانا مصدومه ومتعجبه من هالمكالمه وهالطلب الغرب العجيب ولا ني عارفه كيف اتصرف؟


هل انسى المكالمه واعتبرها ماكانت وأخلي الموضوع يستمر
أو هل ابلغ اخوي بالمكالمه واخليه يقرر الاستمرار من عدمه؟
بس في كل هالحالتين اخاق يستمر الموضوع ويقع اخوي في مشاكل هو في غنى عنها ويكون زواجه نكد ونغص وفي نفس الوقت اخاف اكون تسببت في ظلم وحرمان الشخص المجهول اللي كلمني لأنه بصراحه كسر خاطري بكلامه وحسيته طالع من قلبه

أو هل انفذ طلب الشخص الغريب وننسحب من الخطبه بهدوء بدون ما أعلم احد عن هالمكالمه؟
وفي الحاله هذي انا صراحه متحسفه على البنت واتمناها من قلبي لأخوي

ارجوكم يابنات شيروا علي .. الموضوع متعبني كثير وماني عارفه كيف اتصرف

كل وحده تحط نفسها مكاني وتقولي كيف بتتصرف ؟

وياليت كل من يدخل يرفع الموضوع لأستنير بأكبر قدر ممكن من الآراء