هالبنت تقهرني في كل مناسبه تطلع احلى مني

السلام عليكم
هالبنت حلوه
كل ملابسها كشخه
مكياجها روعه
عطرها يفوح من حلاته
شنطتها جنان
اذا سولفت الكل يسمعها واذا جلست بمكان الكل وده يجلس بجنبها
تبغو تعرفو عن مين اتكلم؟!!
طالعي بمرايتك وبتعرفيها ايوه انتي ليش مستغربه وش ناقصك
انتي شاكه إنك كامله ترى الله يقول (ولقد خلقنا الأنسان في احسن تقويم)
ليه حاسه انك اقل ترى مولازم لبسك يكون ماركه ولامكياجك يكون اوفر ولاسوالفك تعجب كل الناس
بس مطلوب منك تتكلمي بأحترام وتكوني مرتبه وذوق
وقبل اي شي تكوني واثقه
اذكر لما كنت بالثانوي"كان معانا بنت الكل يحبها ويتقرب منها وكنت اشوفها ملكة جمال مع إنها جدا عاديه بس سبحان الله لاقالت انا فلان يحبني نصدقها ولاقالت طلعت حلوه بزواج نقول صح وتزوجت اول وحده بشلتنا يعني بأختصار لها قبول الله يديم عليها ويزيدها من فضله"
كنت دايما اسأل نفسي وش سر هالبنت بعدين اكتشفت ان نظرتها لنفسها ايجابيه وثقتها هي اللي اعطتها جمال
يعني بأختصار نظرتنا لأنفسنا هي اللي تحدد نظرة الأخرين لنا
وترى العنوان فقط للفت النظر ودي كل انسان يشوف نفسه افضل
ويقدر نعم رب العالمين عليه
وفي النهايه احب اقول
(كن جميلا ترى الوجود جميلا)