هالرجال مشاكله ما تخلص ابي اتطلق تهئ تهئ؟

بسم الله الرحمن الرحيم
القصة دايم نسمع خاصة من المتزوجات الجدد يعني مالها غير سنتين او3 أو 4 سنوات تقول لك عجزنا نفهم بعض أنا أبي الطلاق المشاكل ما تخلص ما ننتهي من مشكلة إلا داخلين على مشكلة ثانية وأحيانا تتراكم مشاكلنا بدون مانحلها ولازم أكون أنا الغلطانة عشان يرضى وأنا أصلا ما سويت شي هو السبب خلاص طفشت منه جيته بالطيب وبال.... مانفع ؟ أنا خلاص لازم أتطلق الحمد لله العمر قدامي وبيت أهلي مفتوح لي بأي وقت خليه ينقلع بالطقاق اللي يطقه أنا أبي ارتاح.
المشهد الثاني
قررت الأخت الكريمة تروح بيت أهلها وكبرت السالفة ويزيد العناد بينها وبين الرجال وهم في حقيقة الأمر يكابرون على حساب حبهم لبعض تلقينها ما تعدي يومين إلا وهي مشتاقة له وهو نفس السالفة لكن يتدخل الأهل وصديقاتها وأصحابه وتسير المشكلة جمرة ينفخ عليها إبليس وأعوانه من الإنس إلى أن يقع الطلاق ويندم الرجل وتندم المرأة بشكل اكبر والمشكلة الأكبر لا كان فيه طفل صغير راح ضحية أب وأم غير مسؤلين. وتبدأ المأساة

ويسدل الستار
صدقيني يا طالبة الطلاق ليس الطلاق نهاية للمشاكل بل انه مشكلة من اكبر المشاكل اللي تهدد البيوت فالله جعل الطلاق من أبغض الحلال والرسول في الحديث قال بما معناه كسر المرأة طلاقها والله ورسوله هم الذين يعلمون بما يصلح للناس اكثر من الناس انفسهم وصدقيني لما يكون فيه خلل في بيتك اوفي زوجك وانت تكونين السبب في إصلاحه بحكمتك وصبرك بتزيد ثقتك في نفسك وبتصيرين تحبين نفسك أكثر على العكس عندما تطلبي الطلاق بتفقدين الثقة في نفسك وبتصيرين تشوفين في عيون الناس القريبين والبعيدين انك انسانه فاشلة وبنظرون لك بعين الشفقة او الشتيمة لانك انسانه ضعيفة غير قادرة على حل مشاكلك.

المشاكل الزوجية المتكررة مهما كان تكرارها أمر في حد ذاته طبيعي يعني بسبب الاحتكاك فلننظر للأخوات داخل المنزل مشاكل على أتفه الأشياء هذه شنطتي لا هذه ساعتي السايق يوديني أنا أول بعدين أنت لا أنا أول وهكذا أمثلة لمشاهد يومية داخل كل منزل... حتى إن بيت النبوة لم يخلو منها
خاصة في بداية الزوج حيث إن كلا من الطرفين ممكن يكون:

1- متوقع من الطرف الآخر شي اكبر من اللي هو بيحصل عليه يعني هي متخيله واحد يقولها وش يرضيك ياقمر وأسويه؟ وهو متخيل إن زوجته تطأطئ رأسها بالأرض وتقول آمر ياعمري .

2- أو ممكن اختلاف العادات الأسرية لكل من الطرفين يعني البنت أهلها مربينها على النظام تنام بدري تصحي بدري المدرسة أو للدوام مقاضي للبيت بأخر الشهر مصروف الشهري على رأس الشهر بيدها وهكذا ... وهو عايلته كل من ماشي برأسه ينام متى مايبي يسهر وينام مثل مايبي لاهي ولا يعرف أش يعني أسرة وحياة داخل بيت مع زوجه هو المسئول عنها ويكون عاجز انه يواجه المسؤوليات الملقاة على عاتقه فتلقينه يتهرب من هذا العجز بالمشاكل المفتعلة أي شي ما يعجبه ليش تسوين كذا ليش فعلت كذا ...الخ
يعني تخيلوا حجم التصادم لما بتبدأ الحياة الفعلية بينهم وكل واحد بيصير معتمد على الثاني.
في هالحالتين لازم الزوجة تعرف إنها هي أساس البيت وإنها لازم تعيد صياغة الآدمي اللي قدامها من جديد (يعني تسوي له فورمات) وتخزنين فيه معلومات أنت تختارينها طبعا راح يأخذ هذا الشي وقت وأسلحة كثيرة وأساليب مختلفة يعني تطلعين اللي خلقه الله فينا- نحن النساء- وعظمه ألا وهو (((((كيد النساء))))) قال تعالى (إنه من كيدكن إن كيدكن عظيم)
يعني كل رجل وله مفتاح دوري هالمفتاح يمكن زوجك من الرجال اللي يحب انك تمدحينه وتنفخين رأسه بعدين اطلبي اللي تبين ويسير أو زوجك يحب انك تطبخين له أكلات معينه أو زوجك يحب انك تخلينه يحزن ويحن عليك يعني يسمع كلمتك لا نزلت دمعتين ولا قلتيله أنا متضايقة وأحس إني باختنق عشان واطلبي اللي تبين وهكذا في الوقت المناسب حاولي تطلبين منه انه يغير الشي اللي أنت ماتحبينه ولا تنسين الشئ اللي يعجبك تقولينه له والله أنا أكثر ما أحب فيك انك مو مقصر معي يا أبو فلان في ............. وحاولي يكون المدح والطلب كل شي في وقته وبطريقة حلوه حسب زوجك يحب الصراحة أو تجين له باللف والدوران وأكيد كل وحده تعرف زوجها أكثر من أي احد ثاني قارني بين الأوقات اللي يسمع لك فيها واللي يلبي لك طلباتك فيها وأنت بتعرفين الوقت المناسب والطريقة المناسبة وكل شي يحتاج للصبر والأعصاب الهادية والدم الخفيف.

3-النقطة اللي جميعا نعترف فيها إن القليل من البنات هاليومين اللي متربية على تحمل مسؤولية البيت طبخ وتنظيف أو حتى إنها تديره وتنظمه تلقينها هي حوسة سهر بالليل نوم بالنهار الفطور غدا والغداء فطور طبعا العشوائية لها دور كبييير في تراكم المشاكل وتضخيم صغار الأمور يعني أبدا ما في أحسن لما يكون الزوجين متفقين على كل كبيرة وصغيرة المصروف, الأكل, شغل البيت, النوم متى يسهر الزوج مع أصحابه إلى الساعة كم؟ كم مرة بالشهر؟ وهكذا كل موضوع يتحدد ويترتب عشان تنحل المشكلة وهذا نافع أكثر للمقبلين على الزواج يعني في بداية الزواج المرأة ما تسوي إنها مستحية اللي تشوفه حبيبي مو مشكلة....و بعد كم أسبوع ولابعد شهر وشهرين تعترض أبدا ماراح ينفع لان الرجل زي ماقالو إخوانا المصريين( ابنك على ما تربية وجوزك على ماتعوديه) يعني اللي بتتزوج جديد لازم تعرف هي ايش تبي وتخطط من أول يوم كيف تحقق الأشياء اللي تبغاها.

مثال: يعني اللي تجامل في بداية الزواج وكل يوم والثاني هي عند أهله وتجامل أهله وتساعد وتسوي لهم وتطبخ معهم وتقعد على ها الحال فترة بعدين تبدأ تبي تغير وتقلل روحاتها لبيت أهل زوجها أو ماتبي تخدم إذا راحت عندهم تبي تساعدهم فقط هذا صعب التحول عنه لان زوجك صار فرحان قدام أهله بان زوجته تحبهم وتخدمهم ويحسب انه واجب عليك انك تسوين كذا وهذا شي صعب الاستمرار عليه خاصة بعد الحمل والأولاد
(هذه مثال حصل مع إحدى النساء حيث أصبح زوجها يجيب لها مقاضي تطبخ غداء وعشاء أهله يطلعون يأكلون وينزلون حتى أخواته مايساعدونها في تنظيف البيت لأنها عودتهم كانت تجاملهم دائما وتعودوا على ذلك وزوجها فخور أمام أهله بان زوجته تخدمهم ويزعل عليها لو ماطاعته يحسبه واجب عليها)
مهما كنت تحبين أهل زوجك ويحبونك أنت غير قادرة على خدمتهم وهو غير واجب عليك يعني إذا كان زوجك يرغب بذلك قوليله خلينا نعزمهم كل أسبوع يوم كذا أو كل شهر يوم كذا يجون يتغدون يتعشون عندنا وأكرميهم أحسن إكرام هذا مقدور عليه وبكذا تكونين ما ظلمت نفسك ولا يظلمونك.

وهناك أوقات أيضا يمكن للمرأة أن تعيد فيها صياغة الحياة يعني لما يصير الزعل بينكم ويكون زوجك هو المخطئ لما يجي يسامحك حاولي تكبرين غلطته شوي إذا كانت صغيره وقولي له خلاص عالرغم من كذا أنا أسامحك بس على شر واطلبي الشي اللي تبين أو الشي اللي تبين يتغير وعلى قدر الغلط يكون الشي اللي بتشرطينه

للموضوع تكمله بإذن الله.......... إذا أعجبكن الموضوع

:26: هذه أول مشاركة لي في هذا المنتدى وان شاء الله إذا كان الموضوع أعجبكم فقد تبقى لدي بعض النقاط في المشاكل الزوجية هي خلاصة تجربه في الحياة وأتمنى إني أكون أفدتكم بعض الشيء وما أكون طولت عليكم وشكرا.:26: