هالموضوع مقلقني واااايد .. حد يفسره لي ..

الله يسلمكم عندي شغالة اندونيسية من خمس سنوات ..
أذكر أول مايات سألتها اذا كان عندها عيال فقالت لا وانها غير متزوجة ..
وتمت عندي ثلاث سنوات بعدين قالت بروح بلادي فقلت لها : بتروحين تتزوجين ؟ فقالت : لا مدام بس بروح اشوف اخوي .. ( لانها يتيمة )
وكانت ناوية تروح وماترجع فحاولت معاها انها ترجع ومارضت فقمنا وكنسلنا اقامتها وطلبنا وحدة ثانية وماقصرنا عليها بالهدايا وراتب شهر زيادة .. وطلبت اشرطة قران كامل بصوت الشيخ السديس لاخوها مثل ماتقول ..فاشتراها لها زوجي وما اخذ منها مقابل قال طالما طلبت اشرطة قران فمن عندي وان شاء الله لي الاجر ..
المهم وراحت ماخذت اسبوعين الامتصلة تبي ترجع وبما اني كنت مرتاحة لها فقمنا بعمل اقامة جديدة واستقدمناها خلال شهر من ذهابها فالظاهر ملت من بلادها او استضاقت ماديا الله اعلم ..
المهم وتمت عندي ثلاث سنوات .. الحين تقول : مدام ابي اروح انا خلصت ثلاث سنين قلت لها اوكي من حقج .. قالت ابي اشتري جوال ل ( ولدي ) فكذبت اذني وقلت يمكن تقصد ولد اخوها او اخوها .. فقلت لها ان شاء الله اذا رجع ( ابونا ) من السفر بقول له يشتري فقامت وكررت ولدي وولدي
فقمت وسألتها : ولدج ؟ قالت : ايييه .. قلت لها ليش انتي عندج ولد ؟ قالت انا عندي ثلاثة مدام .. انا متزوجة صغيرة ..
فقلت لها : كذابة .. فابتسمت وحلفت ان عندها ثلاث عيال اولاد وان ولدها العود يبي يعرس الحين عمره 16 سنة .. انا انصدمت فقلت لها : واشله ماتقولين ؟؟؟ قالت : مدام عادي مافيها شي .. قلت لها .. وطالما مافيها شي ليش ماتعلمين ؟؟؟ فضحكت ..
فقمت وسكت عنها واهملت سالفتها وسويت نفسي مب مهتمة بسالفتها ..
بس بيني وبينكم استاااااحشت منها .. كنت امدلعتها اخر دلع كانت اذا عطتني مبلغ اشتري لها خاتم ولا حلق اخذه واروح اشتري لها وبعدين ارجع لها فلوسها واقول لها : هذي هدية من عند اليهال لانج تهتمين فيهم ..
وكل هذي علشان عيالي والله لانهم صغار وانا موظفة واخاف عليهم والمعاملة الحسنة لها دور في معاملة الخدم لاهل البيت .. والله اني وزوجي نحاول نتقي شرهم قد مانقدر .. المهم من قالت لي السالفة وانا خايفة منها وأحاتي اشلون برقد الليلة وابونا محد :(
انسانة كذابة بهالطريقة اشلون كانت تعيش بينا ؟؟؟؟واشلون امنتها على عيالي ؟؟؟؟
هي كذابة في كل الحالات .. فلو كانت فعلا متزوجة وعندها عيال فهي كذبت علينا لمدة خمس سنوات كاملة .. ولو ماكانت متزوجة فهي قاعدة تكذب علي الحين ..
والي محيرني شلي خلاها تعترف لو هي فعلا متزوجة وعندها عيال ؟ وليش هالتوقيت بالذات وزوجي محد :( والله اني خايفة ..
انقهرت منها وناوية ما ارجعها حتى لو قالت برد ..

خواتي هي ليش قالت انها متزوجة الحين بالذات ؟؟ نوروني الله يخليكم ..