هبة تربية القطط

السلام عليكم
عندي مراهقه
صف ثاني متوسط
جننتنا تبي قطوه
طبعا أنا عندي فوبيا من جميع الحيوانات
وهي تحن ابي قطوه ابي قطوه والله يصلحها بالها طووووويل في الحنه بالأول قلنا إذا نجحتي جبنالك عصفوره بقفص
تنازلت وقالت طيب
ملت من العصفور وقالت ما أبيه خلاص أنا ابي قطوه أنا مره ابي قطوه وحنه وبكاء وترجي
وانا أقولها ياماما عندي فوبيا من القطط ما احبهم اخاف منهم
وهي اصرار وإزعاج ومر سنه وهي تحن وتطالب بالقطوه وانا رافضه قلت اوديك محل حيوانات اسبوعياً تلاعبين القطاوه لكن ماتدخل بيتي
وفعلاً صرت اوديها تلعب كل فتره وفتره في سبيل انها تطلع حرتها وتلعب مع القطط لكن هالشي خلاها تعلق في طلبها اكثر وأكثر وتصر اكثر وأكثر أزعجتنا بكاء وطلبات واصرار وحنه
قلنا مايخالف ببغاء قالت عادي اهم شي حيوان بعد فترت شهر قالت ببيعه ما أبيه أنا خاطري في قطوه خلاص ليش تطولونها وهي قصيره أنا طلبي قطوه ابي قطوه
بعدها قلت بفكر في موضوع القطوه
لكن ماتطلع من غرفتك
وتنتبهين النظافة غرفتك
وتراب القطوه اللي تقضي حاجتها فيه تنظفينه اول بأول
وافقت
وجت القطوه
انا قلت راح تفرح فيها كم شهر وتمل تقول ما أبيها خلاص نفس العصفور والببغاء لكن طولت ذا القطوه بتكمل سنه معانا
اه بس اه
مرات ألاقيها بغرفتي القطوه
ومرات تحت الكنب
ومرات
بالمطبخ تخش علي وانا اطبخ
وانا ماغير زعاق وخوف وفوبيا
تعبت وبنتي جابتها وخلتها في البيت ابد كأنه بيتها تحوس فيه
كلمت بنتي قلت اسمعي ذا القطوه من أكون بالبيت اشتغل تطلعينها غرفتك وتقفلين عليها وعندها اكلها وكل شي أنا وحده فيني فوبيا

طبعا سلكت لي ولا سوت أي شي من شروطي باب غرفتها تخليه مفتوح كم مره ولدي ابو سنتين يلعب بتراب القطوه وبراز القطوه وأهاوشها وتبدأ اعتذار وماما أنا آسفة وما اكررها وبالآخير بعد يوم يومين يرجع يلعب في براز القطوة صرت ألحق ولدي 24 ساعة باب الغرفة دائما مفتوح وانا اسكره وهي تفتحه من وراي بحجة انه ماتبي تحبس قطوتها  والله العظيم تعبت أنا ما أدري وش اتصرف فيني فوبيا بنفس الوقت الولد يلعب براز القطة وغير غرفتها صارت ريحتها خايسة وغير أنها جتها فطريات من القطوة وعالجنا القطوة بمبلغ وقدره وعالجنا بنتي من الفطريات وكل هذا  كوووم وولدي اللي كل يومين يلعب في براز القطوة كوم ثااااني 

أنا مدري شلون أتخلص من ذا القطوه وبنفس الوقت بنتي صعبه اكسر في خاطرها من بعد ما جبت القطوة صايره تسمع كلامي وما تقصر معاي كله تبي ترد لي الجميل لأني جايبة لها قطوة لكن أنا تعبت نفسيا مررات أقول أبغى اترك البيت واهج اترك لها هي وقطوتها البيت كله ..ويش الحل تكفون 🥲
كلمتها مره قلت ترى خطر عليك تجيب أمراض خلينا نعرضها تبني انهااااارت وبكاء ومناحه اااااه بس تعبت 
الدرجة ادعي يالله يارب انها تكره القطاوه وتجيني من نفسها تقول ياماما ما أبيها يالله انك تكرهها فيهم من غير شر يارب