هبوط الرحم

السلام عليكم، كيف حالكم جميعًا بنات ❤️
أول شي أحب أشكركم من كل قلبي لاستمرارية المنتدى، كل خوفنا والله بعصر الانستقرام والسناب تشات هو ان مثل هذي المنتديات توقف استمراريتها وتصديق مثل كلام "ماتوا الي يشاركون بالمنتديات"
عمومًا ما أطول عليكم، بعرض عليكم مشكلتي وأتمنى أجد لها حل
بدايةً أنا أم لتوأم الحمد لله، وكانت هذي أول ولادوة وأول حمل ما شاء الله وولادتي كانت طبيعية مش قيصري ويمكن قاعده أندم على هالشي حاليًا وتمنيت اني طلبت قيصري لأني وحتى بعد ٩ شهور من ولادتي ما زلت أعاني من أرحامي
أكثر ما أعاني منه يا بنات اني إلى الآن لما أمشي أحس بكل خطوة من خطواتي وكأنها تضرب أرحامي! ما أقدر أمشي بهرولة وما أقدر أصعد وأنزل من الدرج بشكل طبيعي لازم أخف على نفسي عشان ما تتألم أرحامي
وبرضو لما أكون جالسه بدون أي حركة أحس بألم في أرحامي وكأنها نبضات، ألم ينبض بأرحامي كأنه قاعد يتمزق "أو بالعامي يتقطّع، يتشقّق" أحسه شيء خفييييف وقاعد يتشقّق بداخلي
مو قادرة أسوي رياضة، مو قادرة أمشي غير ببطيء وخفيف، مو قادرة أرفع رجلي بشكل طبيعي
حتى لما أضغط على بطني من أتفه شي مثل "الضحك" لما أضحك وينشد بطني أموت من الألم حرفيًا أحسه قاعد يتقطّع زيادة
مادري شنو مشكلتي ومادري شنو ممكن يكون علاجها وهل بس أحتاج لتمريخ وترفيع؟ علمًا بأني رفعت بوقت نفاسي
مادري اذا احتاج أدوية شعبية لأرحامي أو أحتاج أقوّي أرحامي أو حتى أحتاج تدخل طبي!
أتمنى أتمنى الرد والنصيحة لحالتي مشكورين ❤️