الله يعطيك الف الف عا فيه بصراحه جنانننننننننننننننننننننننننننننننننن بس وين القى بعض العلب واذا عندك زياده عطينا ونورينا

هلا اختي تبين تسوين عيديه بطريقه قديمه
تجيبين قماش نسائي اللي يستخدموه الكبار في لبسهم
وتحطين بوسطها اشياء قديمه مثل البسكويت والعلوك القديمه مررره
والثانيه تحطين فيها مكسرات واشياء مع الشاي
وتمسكيها بخيوط الخيش وتربطيها تكون مثل البقشه الصغيره
واذا عندك ولد او بنت او صوره احد تعرفينه من الصغار تطبعين صورته بالكمبيوتر وتكتبين عليه عباره عن العيد مثل عيدنا شوفتكم وعلينا هديتكم
او كل عام وانتم بخير او اي شئ
وفيه العلب الملونه وتحطين فيها بعض الحلويات والاشياء المميزه
واذكر مره سوينا العيديه من اطباق البيض بحيث اننا قطعنا المربعات اللي بطبق البيض
وصارت كانها ورده تحطين وسطها ورد مجفف
وتمسكينها وتحطين بوسطها الاعواد حقات الششيش طاووق وتكون على شكل ورده وتربطين العود بشرايط بلاستي السخييفه وبجهه تلصقيين التهنئه وبالثاني حلاوه

وعاد ارجع مره ثانيه اوصف لك لاني مشغوله وما روقت واذا قدرت اصورلك واحملها
ويسلموا

ما شاء الله عليك
انا فاتحه النت علشان ابحث عن موضوع مقارب

المهم ..انا من تزوجت وانا كل سنه اسوي هدايا للاطفال بس لاخواني الصغار وعيال اخواني
وعيال خواتي واطفال حمولتي....يعني هم شوين ما يتعدون50 طفل
وكنت اسوي افكار حلوه منها ....
اول ما تزوجت من 12 سنه..رحت لمحلات الالعاب وفي قسم حفلات الاطفال الي يباع فيه الاطباق والكيسان الورق الملونه والسفر والقبعات واشياء كثيره..
شفت فيه اكياس حلوه مرسوم عليها شخصيات كرتونيه أو بلونات او اي رسومات اطفال وبالوان مختلفه..كانت ذيك الايام جديده..المهم شريتها اللون الزهري للبنات والسماوي للاولاد وعبيتها من نفس القسم, بالونات ولسان التنين الي ينفخونه ويطلع صوت اكيد عرفتو ونضارات واشياء كثيره من نفس القسم وكانت الرسومات من نفس الرسمه الي في الكيس أضفت حلويات ومصاص وشكلاطه يعني نوعت بس احاول اشتري شي غريب..هذي اول سنه

.......................
وفي إحدى السنوات جبت لعبه قلابي(سياره شاحنه لحمل التراب) بلاستك صغير الملون يمكن حجمه 25x15 سم تقريبا
وعبيت صندوق اللعبه حلويان وغلفته..وهذا كان للأولاد
أما البنوتات فكان عددهم قليل يمكن خمس شريت حقائب روعة من إكسسواريز وعبيتها حلويات
.................
طبعا فيه افكار كثير بس الي ما يكفيها الوقت تروح تشتري الكراتين الجاهزه الي فيها رسومات
باشكال مختلفه على شكل صندوق مربع اومستطيل او حقيبه اوقارب وغيرها كثير وعبيهم والسلام
كنت أسويها قبل ما تنتشر في محلات أبو ريالين بس هالحين أحسها منتشره بس حلوه وسريعه

................
سنه من السنوات جبت أكياس الأورجنزا وعبيتها كانت حلوه وسهله..


...........

فكـــــــــــــــرة رائـــــــــــــــعة
الكل اعجب فيها وهي شريت قبعات الحفله المثلثه حقت الاطفال عارفينها بس مو الحجم الطويل لا الصغيره الي فيها رسمات تلقونها في محل الالعاب في قسم حفلات الاطفال وتكون احيانا طقم مع سفره كامله المهم ..جبتها بعضها ازرق للاولاد وبعضها احمر للبنات وقلبتها وحطيت معاها تكملت طقم القبعه مثل النظارات والزماره إلي فيها لسان >>>عرفتوها
يعني طقم مع القبعه
وعبيتها حلويات جالكسي باونتي توكس الحجم الصغير الي في اكياس ومصاص الجلي الي على شكل حيوانات وحلو الجل الي على شكل همبرقر او سندويش وغيره المهم أحاول انوع ويصير جديد + لعبه للبنات واخرى للاولاد
وبعدين جبت بيض توم جيري تعرفونه بيض بلاستك يفتح نصفين فيه لعبه تركيبه وحلاوه طبعا فرغتها وحطيت الي فيها جوى القبعه مع الحلويات أما البيضه حطيت فيها حلويات شعبيه بس مطوره..مثلا :برميت مغلف..حلقوم حجم صغير جدا ومغلف حلاو صعو من باتشي مغلف ذهبي وفضي كليجا هولنديه وغيره ..حطيتها في البيضه وسكرتها وحطيت على البيضه ستكر مكتوب عليه ( قديمك نديمك لو الجديد أغناك ) وحطيت البيضه أعلى الحاويات الي في القبعه ,
وبعدين غلفتها بسولفان وربطتها بشريطه ..
...............


بعد فيه فكره شعبية للي نوزعه للحريم الكبار شبيهه بالقدور والغضار وهي
عباره عن اناء شعبي للتمر المكنوز من معدن ومنقوش بالحفر وغطاءه مثبت فيه
وله تسكيره زي القفل مدري عرفتوه المهم هو ينباع في سوق الاواني الشعبيه
في السباله عندنا في الرياض ..ما اعرف اسمه يفرش بقماش رزوز اسود منقوش او احمر
للنساء اما الرجال يفرش الاناء بقطعه من شماغ (الغتره الحمراء)
ويوضع فيه المكسرات والحلويات الشعبيه..ويوزع على االكبار و الشياب والعجايز..
يكون فيه حلوبقر و حلاو برميت مغلف وبسكوت السمسم مغلف وحلقوم مغلف وكليجا صغير كلها شعبيه بس مطورينها وبشكل أصغر من القديم ومغلفينها تلقونها في محامص الرفاعي
وممكن نحطه في إناء خوص له غطاء حجم صغير مره
.............................. .......

والعام جبت فوانيس وعبيتها حلوبات كانت مره حلوه.
وحطيت فيها صور أطفالي
وخليتها للكبار أما الأطفال
صورتهم بالجوال في رمضان كل طفل له صوره خاصه
وديتها لمحل إستديو كوداك الجندول في اليورمارشيه وخليته يطبع صورهم في كاسات صين
ويكتب في الكاسات عيد سعيد
وعبيت الكاسات حلويات وغلفتها بسلوفان شفاف وربطتها بشريطه
كانت جدا روعه
...................

أما هدايا عيد الأضحى أحاول أن تكون مناسبه للعيد بحيث أضع مع الحلويات لعبه عبارة عن خروف صغير
وممكن تكون الهدية عبارة عن لعبة خروف على شكل حقيبة وفيي سحاب يتعبى حلويات
وتكون الكروت فيها خرفان وكاركتيرات خرفان
وأخذ عبارات التهنئة من المسيجات أو من النت


..........
عبارات الكروت
طبعا مانغفل جانب الكروت والعبارات كنت أطبعها من النت وألصقها أوأخرمها أربطها مع الشريطه

وكانت العبارات مثل
عيدنا شوفتكم وعلينا هديتكم
كل عام وأنتم بخير
عيد سعيد
قرقيعاني سويته ولأحبابي وديته

ومن العبارات الشعبيه للهدايا الشعبية
قرقيعان العيد

قرقيعان وقرقيعان لبس جديد بعد رمضان
عادت عليكم صيام كل سنة وكل عام

عطونا الله يعطيكم بيت مكة يوديكم

عساكم تصومنه كل سنه وتعيدونه

ولانغفل ذكر فضل صيام سته من شوال
وكتابه الحديث في الكروت
وممكن وضع مجله صغيره



7
7
7
7
طولت عليكم
هاذا إلي أذكره من أفكاري بس هالسنه مابعد سويت شي انا فاتحة النت علشان أبحث فقلت لازم ما أبخل
بالي عندي علشان أحصل فكره يالله قولوا افكاركم أو حتى شفتوها او سمعتوا عنها



وكل عام وانتم بخير

أنا السنه هذي جاي على بالي أشتري كاسات فخمه إلي في دبن هامز أو نكست أو لايف ستايل وغيرهم..
وإلا أشتري تحف عباره عن علب أو أي شيء مفرغ بحيث أقدر أعبيه حلويات وفي النهايه يستفيدوا منه
بس أبغا عبارات تكتب على الهدايا والحلويات إلي راح أقدمها للأطفال والكبار يوم العيد
وتكون إما نثر أو شعر..

وما تكون طويله سطر أو سطرين يعني أبكتبها على كرت صغير
ومعاه صورة بنتي مثلا إذا العباره مناسبه لوضع الصوره..عندي بعض العبارات الي كنت أكتبها مع الهدية السنوات الماضيه وهي:

عيدنا شوفتكم .. وعلينا هديتكم..

قرقيعهاني سويته .. ولأحبابي وديته.. >>> للمعلوميه حنا نسمي هدايا العيد قرقيعان
وليس المقصود به قرقيعان نصف شهر رمضان, وهذا بدعه ماتجوز..

قرقيعان وقرقيعان .. عادت عليكم صيام .. كل سنة وكل عام..

عساكم تصومنه.. كل سنة وتعيدونه..

كل عام وإنتم بخير..

عساكم من عواده..

عيد سعيد..

وممكن أكتب على الكرت حديث تذكير بصيام الست من شوال
ومواصلة الأعمال الصالحه..

أو قصيدة شعبية للأطفال يوم العيد ..
عطونا الله يعطيكم.. بيت مكه يوديكم..
وغيره نسيت..

المهم كل وحده تكتب لنا عباره أو عبارتين ليستفيد الجميع منها..

أنا في الإنتظار وجزاكم الله خير..
وترى مابقى إلى إسبوعين على العيد..

الموضوع مررررره حلو..
بس ما عندي افكار..

يسلمو على طرح الموضوع..