بثـينة :

أغلب الهدايا اللي تيي للمولود .. سواء كانت فلوس و طبعا المبلغ يعتمد من شخص لغيره يا 100 أو 200 أو 500 أو 1000 وكل ما زادت صلة القرابة يزيد المبلغ طبعا ^^ و البعض اييبون مشايات و كرسي طعام و ألعاب أو كرسي هزاز و ممكن بوكس فيه كوليكشن ملابس مرتبه .. ونحن اختلفت طريقة تقديم الفلوس عندنا يعني يا انحطها في باقه ورد وتكون مرتبه بشكل جميل أو اذا مستعييليين نحطها بظرف من باب الذوق يعني .. و بخصوص القهوه طبعا هذي غير الهديه .. وتكون من الأقارب طبعا .. و أهل ريلي مب من النوع اللي يعبرون في هالأمور لكن أهلي عندهم شي ضروري وعيب انه الوحده تروح لقريبتها بدون هالشي خاصه لو كانت في المستشفى .. نودي مشروبات خاصه للنفاس ومشروباتنا ف الامارات تختلف عنكم ( الحبه الحمرا نطبخها مثل الشوربة بالطحين مع كركم وملح وفلفل أسود و بصل محمر و ممكن نضيف البيض أو نستغني عنه - وفي الحبه الحمرا بالكاسترد يكون خفيف ونشربه بكاس يكون حلو وخفيف - السحلب معروف طبعا ومفيد لادرار الحليب - المغيط مصنوع من الحلبه وجدا مفيد لكن طعمه مب مقبول وايد يعني ) هذي أهم المشروبات والحلو والخفايف طبعا متنوعه وما في شي معين كل حد اييب اللي يعجبه بسكويتات و مكسرات وشوكولا و معجنات و فطاير وخنفروش و شغلات تنفع للتقديم و تنفع انه ناكل منها لكم يوم .. وصلتني مره صينية كب كيك على شكل ورورد و الصينية مزينة بالورد كامل ولا عرفت أي وحده الورده وأي وحده الكيكه بس كان شكلها رائع وفخم و للحين محتفظه بالصينية وفادتني ... وعموما أول مولود تنهال الهدايا أكثر عليه عكس الباقيين هذا اللي لاحظته ^^

أغلب الهدايا اللي تيي للمولود .. سواء كانت فلوس و طبعا المبلغ يعتمد من شخص لغيره يا 100 أو 200 أو...