ابكتب لكم السالفة باختصار
روحت مع بناتي لمدرستهم حتى ناخذ شهاداتهم
وكان معي بنتيني واحده ثانية والكبيرة بالصف الخامس
اول شيء دخلنا على معلمة بنتي الصغيرة
وسلمت عليها وسلمتنا الشهادة ومعه كيس هدايا
فرحة بها بنتي من قلب...ولو انا اللي اعطيتها كان مارضيت بها من تواضعها
بس علشانها من مدرستهم حبتها وتشوفها شيء كبيرررر
المهم طلبت من الصغيرة تسلم على معلمتها وتودعها
سلمت وباركت لها جزاها الله خير وطلعت
بعدين توجهنا الى فصل بنتي الكبيرة
وبما انها شاطرة وممتازة فكانت تمني نفسها بهدية من معلمتها بدون ادنى شك
دخلنا وكانت معلمتها جالسة على مكتب وعليه كم كرتونة هدايا
وكان في الفصل نفسه كذا وحده من زميلاتها المعلمات وبنفس الطريقة جالسات على ماصات وراصات هداياهم...
وقفنا عند معلمتها اللي دبست الشهادة بورقة التقوييم وسلمتها لبنتي ......وقالت مبروك :ohwe:
انا انتبهت بعد ثواني اننا ننتظر للهدية لاكنها ماقدمت شيء لبنتي
وناظرت ناحيتها الا وجهها مقلوب والعيون تغمز :crap:
والله كسرت خاطري
قلت للمعلمة شكرا وخرجنا
وانا امشي اتفرج على البنات وان معظمهم معاهم خيررر من هالهدايا ماشاءالله
بصراحة انا فار دمي وزعلت علشان بنتي
وحاولت اواسيها واقول لها الف مبروووك ياقمر
وان شاءالله نعمل لكم حفلة ونجيب لكم أحلى الهدايا
وشكل الهدايا بس للصغيرات الكبار مايعطونهم
وهي بس تهز راسها والعيون مازالت تغمز الدمعة على طرف الرمش
وهنا...أعطيتهم فلوس وقلت لهم روحوا المقصف اشتروا
وارجع لمعلمة بنتي
قلت لها والله يا ابلة فلانة مايجوز خاطر بنتي ينكسر علشان هدايا بريالين ولا بعشرة ريال
بنتي انتي تعرفي مستواها ولو كانت متأخره كان قلت معليش
لاكنها بسم الله شاطرة وممتازة اعطيها واحده من هالكراتين وانا اشتريها منك والله لو باربع مئة لشتريها منك...قالت والله الهدايا مو من عندي هي من الأدارة روحي شوفي اذا عندهم
قلت ابروح وابشتريها مهما كان....كل شيء إلا كسر خاطر بنتي
وهذا انا طالعة وتناديني وحده من زميلاتها المعلمات وتقول وهي ماسكة بكيس صغيرون ...هذه ترضيها؟؟....قلت ترضيها يابنت الحلال ان شاءالله حتى لو مناديل فاين
اسم انها هدية ومن معلمتها...هم يشوفونها شيء وما احد قدهم
واخذها منها الله يجزاها خير واعطيها معلمة بنتي واطلب منها ان تعطيها اياها بنفسها
واروح انادي بنتي...وتدخل وتعطيها المعلمة الهدية وتقول لها معليش لخبطت بينك وبين اسم زميلتك الف مبروك شاطرة,,,,ياسلام على اشراقة الوجه والابتسامة والحمدلله
راحت عاد تمشي مع اختها وهي مبسوطة بالهدية والشهادة
الحين ابوريكم هدايا المعلمات
والهدايا اللي اشتريتها لهم
اولا هدية المعلمات جزاهم الله خير
شوفوا على تواضعها إلا ان بناتي فرحوا بها
ولو انا اللي اشتريتها كان رموها ماتعجبهم...
بس ابي اوصل لأخواتي المعلمات ان هالوقت بالذات مهم
الهدية فيه تسوى ذهب...وتكون غااالية في نفوس التلميذات سبحان الله
والله يوفقها ويبيض وجهها المعلمة المتبرعة
وهذه الهدايا انا اشتريتها لهم....الله يحفظهم ولايحرمني منهم ويوفقهم يارب
وهذه رسالة من بنتي كتبتها على سبورة اشتريتها لهم.....ياحياتي الله يحفظك يارب
وتمنيت احط صور للحفلة بس اكثر الصور فيها اطفالي وزوجي
بس نكتفي بهذه الكيكة
والف الف مبرووووك النجاح
وعقبال الفرحة الكبيرة
الله يحفظ اطفالنا واطفال المسلمين
ويرزق كل محرومة يارب العالمين
اختكم
**نورهان**
الله يحفظ بناتك ويخليهم لك ..