هدية مو مني تبدست فيها قدام زوجة اخوي !!! وش رايكم ؟؟

السلام عليكم ورحمة الله

بنات أنا في الفترة الأخيرة صايرة عصبية بشدة .. أي أمر تافه يقلب مزاجي ويأثر فيني
بدت فيني الحالة في آخر رمضان بيوم 20 رمضان تقريبا عصبت مرة على الشغالة وقعدت أتكلم بكلام ماودي أقوله ,, حتى اني مادوامت من بكرة لأن عجزت أنام وصدعت وامي أخذت بخاطرها لأنها كالعادة ماتبغاني أقول للشغالة شي .. المهم بعد هالموقف صرت من سئ لأسوأ .. قلت بالبداية يمكن أعراض الدورة وجتني وطهرت ولازالت الضيقة والتوتر ملازميني .. أقرب موقف البارح :
زوجة اخوي جابت بنت ورحنا كلنا نزورها بالمستشفى راحت اختي (( هي جايتنا زيارة هالاجازة وراجعه للرياض بكرة)) راحت اختي العصر واشترت لها سلة حلاو كشخة بسعر غالي ,, أنا عاتبت اختي وقلت ليه ماشتريتي شي حلو وأرخص ,, المهم رحنا وراحت معانا زوجة اخوي الثاني(( وهي بعد على وشك ولادة )) ويومن دخلنا المستشفى وعند باب الغرفة تفاجأت باختي ترمي الحلاو علي وتقولي امسكي أنا مسكتها وأنا ساكته لأن خوات زوجة اخوي كانوا باستقبالنا وعلى دخلتنا للغرفة الي داخلها زوجة اخوي عطيت الحلاو امي عشان تعطيه لمرة ولدها ,, (( أنا كنت داخلي مستغربة من حركة اختي ليه رمت علي السلة !! )) تجيكم السالفة هلحين أنا بالبداية توقعتها حركة عفوية بس ماجاء ببالي انها نجاسة أبد
يومن جينا للبيت قالت اختي ترا اختنا الكبيرة سألت من وين الحلاو وأنا قلتلها من هند ( أنا ) أخاف زوجة اخوي الثاني تزعل!! اختي الكبيرة هذي ماتطيقني ولا أطيقها ياما جاني منها من الأذى وتحملت بس مافكت شرها عني .. طبعا هلحين يمكن لها أكثر من اسبوع مقاطعتني والله مادري وش السبب بس تعودت على نجاستها .. اختي هذي دورها دايما تفسد العلاقات فاختي صاحبة السلة قالتلها كذا تبي تفتك من شرها وتحطها بي قدام زوجة اخوي الثانية ,, أنا يوم عرفت بقصدها عند رميتها السلة علي عصبت وهي تتكلم قلت لها من سمح لك تقولين لهم هند مشتريتها ؟؟ هلحين ألزمتيني الزام اني أشتري لزوجة اخوي اذا ولدت زيها وأنا ماقدر أنا أبشتري بسعر أقل وأنتي من الأساس عارفة اني معترضة لييييه تدبسينها بظهري قدامها!!
أنا عصبت وتعكر مزاجي كالعادة بسسرعة وعجزت أبرر موقفها خاصة انها ماشية للرياض بكرة في الليل وزوجة اخوي ولادتها خلال هالشهر واختي مو جايه عشان تهديها .. بس حطتني بموقف شيين قدامها وألزمتني وأنا ماقدر ,, بالله وش رايكم بهالحركة .؟!!
وحدة من صديقاتي البارح شكيت لها حسبتني بخيلة وقعدت تعطيني دروس بالكرم والانفاق !!
ويييييييييني ووين البخل!!!
السبب : والله زوجات اخواني عمرهم ماهدوني عند سفراتهم مع اني ماقصرت بهداياهم بعيالهم الأولين أشتري لهم أغلى وأحسن شي ولا وحدة منهم فكرت عند رجعتها من سفرة من سفراتها تهديني لو عطر,, هذا غير اني أنا ألي جهزت بيوتهم وأثثتها لهم من حسابي أيام الخطوبة
بس مافيهم ولافي اخواني معروف...
عشان كذا هالمرة قررت أهديهم اسم هدية علشان ايش أحمل نفسي فوق طاقتها!!!
وبعد حركة ثانية سوتها اختي البارح :
يومن جينا من المستشفى جت اختي (( صاحبة السلة)) وجابت لعيالها عشا من المطعم وجايبة لامي بارد دايت مرررة المشروب بارد وامي عندها كحة شديدة والانفلونزا من فترة بسيطة متشافية منها غير السكر والضغط واختي هذي كأنها تعاندني البارح وتقوم وتفتحة لامي وتعطيها وأنا قبل لمسته وقلت يمه بارد مرة لاتشربينه ولا فيه فايدة لاتشربينه بس شربته عناد فيني وارضاء لاختي واذا مرضت أنا بكرة أبغيب عن المدرسة وآخذ اجازات وأتعب وأفتشل من الناس واختي هذي ولا بقية خواتي مادروا عنها ,, عاد عقب هالحركة الأخيرة عجزت أتحمل قمت وطلعت لغرفتي فوق ... والله العظيم أشياء ترفع الضغط

كأنها امي الحالي !!!
وعجزت وأنا أحترم الناس وهم حاسبينه خوف وضعف !!
ما أقول الا حسبي الله ونعم الوكيل


آسفة ان كنت طولت بس مقهووووووورة ,,, بالله وش رايكم بهالحركة ؟؟