Um Aljoud @um_aljoud
عضوة
هديتــ انا غير ــي .. ابيض وجهك بدون خساير مع ام الجود
بسمه تعالى
يسعد لي مساكم وصباحكم حبوبات..
كلكم ماشاء الله ماقصرتووا ..
خدومين جداً وماتبخلون بشي ع غيركم
لاجل كذا اناا قررت اليوم افيدكم بشي بسيط ممكن اني افك ازمه وحده فيكم .. ومنهاا يكون مرجع للبنات للي بينزلون البلد لاول مره ولا بعارفين كيف يرتبون (مزانيه للهدايا او وش يعطونهم هدايا) .. ومثل ماهوو متعارف اهليناا مو واحد والا ثنين ماشاء الله .. الله يحفظهم كثير من كبار واطفال وكبار بالسن ..
وبنفس الوقت كلناا نتسأل بينا وبين انفسنا كيف اني ارتب لي ميزانيه للهدايا؟؟
وبنفس الوقت مااقصر ع نفسي وع عيالي ومااضغط على زوجي ..
هناا خليني اعلمك من خلال تجاربي السابقه بماا اني قضيت سنوات من عمري هناا ..
اذكروا الله .. وسموا بالرحمن ..
راح اقسم الموضوع لخطوات ونقاط ليسهل ع الجميع ويكون بشكل مرتب
الخطوه الاولى : جيبي ورق وقلم
الخطوه الثانيه:
سوي لك جدول واكتبي لسته باسماء الناس للي تبين تهدينهم وابتدي من الاهم الى المهم .. وهناا في فرق يعني بين الناس الاهم وهم اهل الزوج وثم اهلك ثم بحبايبك ان وجد .. بالنقطه هذه لازم تكونين مركزه انوو في ناس لهم الاوليه بالهدايا ماانتي ملزومه مثلا والله جارتي حبوبه والا صاحبتي والا فلانه وعلانه كفايه الاهل لاتفهموني غلط اقصد انوو اول شي حطي لسته الاهل قرايبك مثلا اناا عندي اهل زوجي واهلي هم الاهم واذا بقى من الميزانيه للي عندي اجيب فيها للباقي فهمتوا الحين وش اقصد بالضبط مثل هيك..
الخطوه الثالثه : الميزانيه
وراح اقسمها لكم قسمين وانتم امشوا ع للي يناسبكم :
القسم الاول : كل دخله سوق لك تاخذين غرض يخص واحد من اللي كتبتيهم باللسته وحولوا انك توفير بالطريقه الكابونات او تستغلين التخفيضات واذا شريتي الغرض ارجعي للسته واكتبي الهديه للي شريتها له وحطي جنب اسمه × وبكذا خلصتي منه
القسم الثاني : تتفقين مع زوجك كل شهر تشيلون من المزانيه مبلغ رمزي وتجمعينه بحصاله متى ماشفتي المبلغ مناسب قومي خذيه وقضي الهدايا بالمبلغ للي عندك .. ابدا ابدا لاتفكرين او تقومين تدفعين زياده ع المبلغ من جيبك لمن سويتي هالحركه راح تتعودينهاا كل مره تزيدين من عندك لاتسوين هالشي ابدا اللتزمي بالهشي قد ماتقدرين ومنها راح ترتاحين من هم الهدايا والميزانيه والا اذا دفعتي زياده بيعفس عليك المزانيه .. لاتقولين دولار والا خمسه ماتفرق لا بتفرق وبتتندمين بالاخير
الخطوه الرابعه : الهدايا
قبل لااتكلم ع الهداياا .. حركات انوو والله هالشي مايبيض الوجه هالشي مو ماركه هالشي .. الخ
اتركوهاا عنكم تراه هذا للي يضيعناا
خليكم بسيطين .. لاتضغطون ع انفسكم وتحرمون انفسكم وتشترون بعدين تتندموا عليها مثلا مايناسهم والا مايعجبهم والا مادري وشوو كل واحد يمد رجوله ع قد اللحافه ماحنا المغتربين مو جالسين ع بنك.. يومني جبت طاري بياض الوجه مااقصد انوو والله خذوا وبس لاه اقصد انوو مثلا تجي لك وحده تاخذ لهاا شنطه ماركه بمبلغ غالي جدا وتهديه وحده ممكن انهاا ماتهتم او انهاا ماتعجبهاا او مو تبع ماركه مو ماركه وانت تقومين تنقهرين .. هذا للي كنت اقصده بالضبط ..
من تجاربي السابقه راح اطرح لكم افكاري وتجاربي ومخططاتي :
خليناا نتبدي بالاطفال لانوو بنظري هم اهم من الكبار واناا اهتم بهالجانب اكثر ..
( الاطفال احباب الله ) واناا احب افرحهم وهم دايم يفرحون بالهدايا اكثر من الكبار خخخ لدرجه انو طول ماانا جالسه عيونهم ع الشنط ويتوشون بالشي للي جابته لهم
1– طبعا انت مجهزه للسته باسماء الاطفال بنات واولاد واعمارهم هالشي هذا راح يسهل المهمه عليك كثير ..
نبتدي بالاطفال المواليد الى 12 يعني لمن سادس ابتدائي :
المواليد
- ياحبذا تجبين شي تحسينه مو موجود بالسعوديه وممكن يفيد الام او الطفل او يكون موجود وانت عرفتي انو الام ودها فيه ولاقدرت تشتريه بسبب انه غالي هذا نقطه ..
- طقم ملابس والا رضاعات وفي منهاا انواع كثيره ومميزات مثلا الرضاعه للي للي تكون الحلمه حقتها منفصله عن الرضاعه نفسها وبينها هوز هذه ابدا مو موجوده بالسعوديه ويطلبونها طلبيه من هناا .. او ممكن تطقمين شنطه كامله مع بطانيه وبعض الاغراض البسيطه مثلا: تشترين شنطه شكلهاا حلوو مناسب لجنس الطفل او محايد يعني يناسب الاثنين بحيث انو تستفيد منه للمستقبل وتعبينها باغراض بسيطه ماتكلفك واجد لفه بيبي وقبعه وملابس وجزمه وانتِ بكرامه وكريم الخاص للحفاظات هالشي مفيد جدا لامهات احسن من الفازلين بكثير وكل للي جربوه من عندي حبوه يعني مفعوله قوي بعكس اللي موجود بالسعوديه يعني وضحت لكم الفكره كذا شي ع شي صارت لك هديه تناسب الطفل المولد .. وكلهاا متوفر في محلات امثال مارشلز وتجي ماكس وغيره من المحلات المخفضه
اطفال الشهور
- نفس الشي اذا سمعتي شي من هناا وهناك جبيبي له للي يحتاجونه ابدا لاتشترين شي مايستفيدون منه .. طفل الشهور تختلف حركاتهم وقدراتهم يعني مثلا جيبي له لعبه تناسب عمره لعبه ذكاء مثلا زي اللوح للي فيه حيوانات او اشكال الهندسيه ويركبهم مكانهم يعني هالشي اللي تكون اكتفتي ومفيده لتعليم الطفل .. او زي هذه اكتفتي activity walker
هذه نزلت زيها لاختي ومره انبسطت عليهاا واستفادوا منها .. او حتى فيه عندكم البيبي شير للي تصير ارضيه وفيها الالعاب علشان يساعد الام توكل البيبي وبنفس الوقت مربوط يلعب ولايجننها .. يعني لو اجلس اعدد لكم مابخلص من الحاجات الحلوه والمفيده للاطفال كمان .. حتى الصدريات السفري حلوه كثييير تهدينها لطفل بشهور يفك ازمه الام من غسيل الصدريات واناا استفدت منهم لبنتي كثير مااحاتي توسخ ..ممكن حتى لو تحبين تشترين له لبسه طقم مع جزمه وانتِ بكرامه
اطفال السنوات
- نفس كلامي سابقا اذا سمعتي محتاج شي خذيه له وللي يناسب ميوله ومقسمين الى قسمين:
القسم الاول
..
اطفال السنوات عندك من 1 الى 5 سنوات:
الله يخلي بودلار فيه حاجات حلووه .. مثلا زي الالعاب للي يحطونها بالمويه وتكبر والقصص ودفتر تلوين وبزل يعني تلاقين اشياء حلووه كثير فيه .. كمان ينطبق هالشي ع فملي دولار او اي محل اللعاب يكون مخفض اهم شي تجبين له شي ملفت لنظره ويستمتع فيه بهالعمر زي الكروت التعليمه بالارقام والالوان واو حتى حركات يعني يساعد الام تعلم طفلهاا من خلالهم وبنفس الوقت الطفل ينبسط بشكل الكرت وبالشخصيات الكرتونيه للي فيه زي ميكي ماوس او ويني دبو .. وغيره يعني جمعي له اشياء كذا من كل قطعه شي وخذي لك باق من نفس المحل وحطي فيه الاغراض وكبسيه واكتبي اسمه عليه وش قد بينبسط فيهم .. كمان عندك البنات في عندك فملي دولار تلاقين الالعاب كبيره دمى او زي كذا للبنوتات وسعرها مناسب جدا .. جدا يفرحون فيهاا
القسم الثاني
اطفال المدرسه للي هم من 6 سنوات الى 12 سنه:
- اكرر نفس الجمل سابقا اذا عرفتي الطفل وده بشي خذيه له واذا لاه .. اناا بعطيك افكار بحكم انوو هالسن سن مدارس ومعروف عيال الابتدائي دايم يحبون يتفاخرون بغراضهم وكل سنه بزحمه المدارس تشوفون بالهبل العيال يختارون لهمم شنط .. لاجل كذا ليه انتِ ما تريحين الام وتشترينها له ومنها هديه تطير قلبه من الفرح .. وتفكين امه من حوسه السوق
وهالشي اناا سويته خذيت شنط مدارس بشخصيه حلوه زي للي يحبونهاا + مطاره + طقم دفتر واقلام ومساحه وبرايه كامل خذيته من روز + محفظه علشان الفسحه حقتهم + بكل واطواق يعني وكلهاا كلفتي مبلغ حلوو وهم كثيييير مبسوط فيهاا وحتى امهاتهم قامت تدعي لي خخخ .. وقاموا يتفاخرون بالمدرسه ع صديقاتهم ..عندك كمان الاولاد ملابس وتشيرتات بشخصيات يحبونها او حتى مثلا تشترون لهم اكسسوارت لي ايباد او ايبود او حتى السوني او الوي وتلاقون كثير منهم متوفر وباسعار معقوله زي مثلا تلعيقات لشخصيات كرتونيه في اي بي وبسعر رخيص وحلوو تجبين لكل العيال كذا وتفتكين ولا تكوني صرفتي كثيرر بالعكس شريتي اشياء يحبوبها ومن ميولهم ..
الحين نتكلم عن المراهقين والكبار وكبار السن
المراهقين :
-اكرر مثلا ماقلت سابقا اذا هم موصينكم ع شي خلاص جبوه لهم ولا تشترون شي زياده .. المراهقين شباب او بنات دايم يكون ميوله للتميز والشي الغريب لاجل كذا حاولي تجبين له شي يناسب اتجاها .. مثلا البنات المراهقات تحب دايم تتلبس وتكشخ وحركات .. اشتري لهاا مثلا شنطه كذا سمبل وحطي فيها ميك اب وياكثر الميك اب في كل مكان مع مناكير ومرايا وعطر وبهيك سويتي لهاا شنط كشخه ومليانه بتطير من الفرح .. عندك كمان الاكسسوارت الحلوه للي يبعونها هناا متوفره في محلات المراهقين جبيبي لهم منهاا وحتى ملابس ع الموضه طقمي لهاا شي حلوو ميزيهاا وبتموت فيك .. او حتى مثلا اشتري لهاا جزمه وانتِ بكرامه او ممكن فستان نعوم يعني تقدرين تسوين لهاا اشياء كثير المراهقه .. كمان الولد المراهق هناا الحلو بامريكا فيهاا اشياء مميزه للمراهقين تقدرين تختارين المناسب لشخصياتهم وتصنعين لهم ستايل يطيروا من الفرح منه الاولاد زي مثلا جزمه وانتِ بكرامه او حتى الهودز او حتى لوح تلزج او ساعه او مثلا تسوين له زي البنت تشترين له شنطه وفيها اغراض زي عطر تي شيرت او هودز مع ساعه يعني للي تقدرين عليه وتكونين له شي مميز والله انهم ماينسونك بهالحركه هذه ..
نجي للكبار الحريم:
- كمان اقول اذا وصوا ع شي جبوه لهم وخلاص .. للحريم اشياء واجد واكيد بحتكاك فيهن بتعرفين ميولهم كيف وانت جيبي ع كذا ..
عندك عطورات وبيجامات وحتى كريمات او ميك اب او اشياء كهربائيه زي السراميك او استشوار او براون او اكسوارات او فستان حتى لو طقمتي لهاا فستان وجزمه وانتِ بكرامه مع شنطه .. او مثلا جيبي لهاا شنطه فيها كريم خاص لشي معين هي تهتم فيه مثلا وجهها او حتى علاج او ممكن شي للمطبخ وفي منها اشكال دوري شي المميز للي ممكن برايك تستفيد منه وخذيه لهاا زي مثلاً : البوب كيك جد شكلها حلوو وتفك ازمه وتفيدها للضيافه او حتى صاج او وافل يعني لو بعد لكم من اليوم الى بكره مابخلص ممكن تشترين لها فتامينات مثل حبوب الثوم او الحلبه .. الخ ممكن كمان طقم مفارش او حتى حمام وانتِ بكرامه او حتى طقم سرير .. او شي لبيتهاا يعني كثييييير حاجات حلووه فيه و تكون هديه وسعرها مناسب لك
نجي للكبار الرجال:
هالشي بالنسبه لي ازمه لانو مافي خيارات كثيره لهم .. بس ع كذا بعيطكم واعلمكم .. الرجال اول شي لازم تشترين له شي يناسب ميوله انتبهي تاخذين شي مايناسب له وتتفشلين مثلا اذا كان يحب يلبس بيجامات بالبيت غير السروال والفنيله المتعارف عليها خذي له كم بجامه .. عطورات .. محفظه .. اذا كان يحب البر خذي له اشياء عده للي نشوفهاا للكامبنق وفي اشياء مره حلووه .. كمان اذا كان يلبس بدله رسميه كامل خذي له طقم من هناا ع التخفيضات او حتى بلايز او بنطلونات اذا يحب الاجهزه الالكترونيه خذي له زي كاميرا صغيره وفي اسعار حلووه وتكون جيده او مثلا اي جهاز تحسي انوو ممكن يفيده ويستفيد منه او مثلا اذا كان من النوع للي يهتم بسيارته خذي له اكسسوارت للسياره ويجي منهاا اشكال والالوان
واخيرا نجي لكبار السن :
- اكرر اذا هم محتاجين شي جبوه لهم .. كبار السن في هناا بامريكاا تتميز بالاهتمام بهذا الجانب تلاقين فيه اشياء تناسبهم وتناسب احتياجاتهم .. لو لا سمح لله مصاب بالسكر ممكن تجبين له جهاز خاص فيه او حتى علب منظم الادويه او مثلا تجبين له بجايم دافيه او ممكن جزمه للبيت وانت ِ بكرامه او حتى للطلعه وومكن كمان اذا كان من النوع للي يحب الاهتمام بالزرع جيبي له عده للزرع وهالشي هذه .. والحرمه نفس الشي جيبي لهاا مثلا مساج لرجولهاا او حتى كريم للتشققات الرجلين او شنطه او جزمه وانتِ بكرامه .. حتى العطور او محفظه يعني في اشياء كثيره .. يحبونها كبار السن
هالنقطه هامه جداً جداً( اطفال او الاشخاص المميزين)
قبل لااختم ابي اذكرها لكم .. اكيد في بينا ناس عندهم اطفال او اشخاص مميزين
يعني مثلا يكونون من ذوي الاحتياجات الخاصه .. لازم تفكرون فيهم مو بس الناس الطبيعين والاطفال حتى هو حرام يحسون باللي حولهم اقل شي ممن تقدرين تسوينه لهم انك تذكرينهم بشي بسيط يرسم الابتسامه على وجهه وماتدرين يمكن رسمه هالابتسامه تفتح لك الف باب وباب من الرحمه .. لانك مافرقتي بين طفل طبيعي وطفل مميز وذكرتي الكل بدون استثناء
لاجل كذا اناا مااقدر احدد لكم هالشي .. كل واحد ويعرف الانسان المميز للي عنده او حوله وع كذا يشتري له شي يحتاجه يناسبه ويناسب احتياجه زي مثلا : اشياء تساعد الحركه من الالعاب الذكاء ..او حتى شي ملموس او يساعد بالنطق او شي كذا للكفيفين يعني في اشياء كثيره تفيدون فيهاا هالاشخاص ..
2- بكذا تكوني خلصتي الهدايا كلها ومانسيتي احد وبنفس الوقت شريتي لهم اشياء تناسب اعمارهم واهتماتهم .. لو تشاطرتي وتبقى من ميزانيه الهداياا في عندك حلين :
الحل الاول : اذا نفسك تهدين حد غير الاقارب جارتك او صديقتك مثلا فيك تشترين لها بالمبلغ المتبقي من الهدايا
C
الحل الثاني :تاخذينه لك او لاطفالك وتقضين لكم شي للسعوديه
الحين شوفي نفسك ولاتحرمينها من شي خلصتي من هم الهدايا وفتكيتي وباقي الميزانيه لك ولزوجك وعيالك ولبيتك للسعوديه بس باقي عليك ترتبي شناطك وتنطلقين للحبايب بالسعوديه بهدايا تبيض الوجه وبنفس الوقت بدون خساير ولا حرمان ولا فوضى
هالموضوع مجهود شخصي مني .. من امس جالسه عليه لليوم ارتب واضبط فيه واكتبه لكم بشكل مبسط
مابي منكم غير الدعاء بظهر الغيب ربي يحقق مرادي وتقوم امي بالسلامه ويشافي اختي
محبتي لكم
:26:
83
18K
يلزم عليك تسجيل الدخول أولًا لكتابة تعليق.
رائع شكرا لكرائع شكرا لك
الله يسعدك ياقمر ويجعلها بميزان حسناتك مره فكرتك حلووووه أضيف عليها من ضمن الهديا باث اند بودي مسوي عروض تلاقي عنده عطور مره حلوه الواحد ب4دولار والا تشتري كريمين الواحد12دولار ويجيك الثالث هديه واشيا حلوه وفخمه،،
tutah
•
درر يا عسل اتمنى يثبتوا الموضوع
الصراحه أول سؤال طرحته لما كملت قراية موضوعك: من متى وانتي تكتبين؟؟؟؟؟؟؟؟؟؟؟؟؟
الصراحه أول سؤال طرحته لما كملت قراية موضوعك: من متى وانتي تكتبين؟؟؟؟؟؟؟؟؟؟؟؟؟
الصفحة الأخيرة
ماشاءالله عليك