هدايا المواليد

الحين بتكلم عن هدايا المواليد لأنه مع كثرة الخيارات في هذا المجال إلا إننا نلقى أغلبنا هداياهم تقليديه مع انها أحياناً بنفس المبلغ
لأنه كثير يهدوا الطقم الجاهز اللي مشكل فيه أفرول كامل وشراريب ومرايل ولفه
صراحه فيه اشكال صحيح تجي حلوه ولكن اغلبها تجي فيها اشياء مايستفاد منها واشوف الافضل لو نشتري بدالها حاجه مرتبه يعني فستان او افرول مرتب وشيك ولو تبغي تطقمي معاه شراب -قبعه وكذا زي الحاجات اللي موجوده في سنتر بوينت وتحطيها في سله او صندوق حلو وكمان حلو لو انك تختاري اللبس مو تبع مولود لا يكون حق طفل عمره 6 شهور او 8 شهور لأن البيبي ماشالله جسمه يتغير بسرعه فتستفيد من هديتك بعدين افضل

موضوع السله او الصندوق ممكن كمان تحطي فيه اشياء كثير من اختياراتك لو كنتي رايقه اختاري الوان متقاربه يعني ممكن تضيفي دميه ارنوب او دبدوب او لفه حلوه وشيك وطقم اللي يجي مناشف للمولود اوطقم عناية بالجسم

بودي شوب عنده طقم حلو للاطفال
كمان أفون اللي مع المندوبات عندهخا طقمين
او تحطي عطر أطفال ممكن اعطيكم خيارات لو تبغوا


شنطة مولود

بطانية طفل


مفرش سرير للطفل



وان شالله راجعتلكم اكمل مع هدايا المواليد

نكمل مع هدايا المواليد

لو تحبي الاشياء الغريبه والجديده فيه كمان حاجات حلوه بس انتي شوفي هل الام ممكن تستفيد منها او لا
يعني لو كانت الام بيتها كبير وماعندها احد يساعدها في البيت راح يفيدها كثير جهاز مراقبة الطفل
حلو انها لما تترك البيبي في سريره تخلي الجهاز عنده وتعلق الجزء الثاني اسواره في يدها او تاخذه معاها مكان ماتشتغل في البيت فإذا بكي او صحي تسمعه فيه بعضها صوت وبعضها صوت وصوره


جهاز تسخين الرضاعات

جهاز تعقيم الرضاعات
وهذا طبعاً ماينفع تهديه لوحده ترضع طبيعي لأنها ماراح تستفيد منه كثير


صندوق الاسعافات الاوليه او صندوق العنايه يكون فيه مقياس حراره وقصاصة اظافر ومقص ومشط وفرشاة اسنان


وممكن تجمعي كذا حاجه وتحطيها في بوكس على قد الاشياء اللي معاك
فيه بعض اللي اعرفهم من ضمن الاشياء اللي يحطوها تحط رضاعه ولهايه وخشخيشه يلعب فيها بس اهم حاجه ترتبها بشكل حلو

لعبه من العاب المواليد
زي المفرش اللي معلق فيه العاب او اللي تتعلق عالسرير


ممكن تلقيها بسنتر بوينت اومذركير او محلات الالعاب العاديه



وان شالله كمان احاول اجي وقت ثاني اكمل باقي الافكار اللي عندي لهدايا المواليد
وخلوني اشوف افكاركم ومشاركاتكم

راح أكمل مع إني ماشفت تفاعل


هدايا المواليد
في البدايه اقولكم انه فيه كثير يشوفوا بعض الاشياء والادوات اللي راح اتكلم عليها في هالرد كماليات او اشياء مالها فايده وانا اقولكم انه كل انسان حر ويختار اللي يناسبه ومافيه مانع انه يشتري حاجه تفيده و تريحه في اشياء كثير سواء من ناحية الامان او من ناحية راحة الام في عدم الانحناء وانا أشجع انها تستخدمها لو كان عندها نية انجاب اطفال اخرين ان شالله يستفيدوا منها ولو كان عندها مساحه في بيتها او مساحة للتخزين بعد مايسير البيبي ماراح يستفيد منها وفيه ناس ماشالله يتبادلوا الاشياء اللي كذا بين المواليد في العيله اولاد الاخوان والاخوات فيحللوا قيمتها ههههههه
لو جينا نتكلم عن الهدايا الكبيره أنا مو من النوع اللي ما أئيد الهدايا الكبيره زي السرير والعربيه والجلاسه إلا إذا كانت الام قريبه مني زي اختي او أعرف اش تفكر فيه ليش لأنه ممكن إنك انتي حاسبه حساب انك بتساعديها وتكرميها وتفرحيها بهديه على بالها حاجه تانيه كيف يعني؟لأنه الآن فيه موديلات كثير من الشي الواحد يعني ممكن تجيبي سرير للبيبي وهي على بالها موديل معين أو بتصبر كم شهر وتجيب سرير يظل معاه فتره اطول او انه السرير اللي ججبتيه ماعندها له مكان مناسب في غرفتها الصغيره وممكن تجيبي جلاسه وهي تبغى جلاسه هزاز او انها مي مفكره تشتري هذا الشيء من ناحسة كلفه ماديه واستخدامهتا فتره بسيطه وتحتاج مكان تتخزن فيه بعدين اتمنى تكونوا فهمتوني بس تظل الهديه مفيده في حال كانت محتاجتها وعلى مزاجها

سرير طفل
جلاسه
عربية سوق
كرسي سياره

مشايه

وفيه حاجات ممكن تستفيد منها الام اللي بيتها دورين للأمان أكثر
محبس الطفل ممكن تحطه في الدور السفلي وتستخدمه سرير ومكان للعب او بيت كور مستقبلاً وحاجز للامان او لو عند البيبي اخ اكبر منه تخاف عليه

الحلو في هذا الشكل انه ممكن ينطوي بسهوله ويتخزن في ا اي مكان او تاخذيه معاك في السفر يعني عملي للناس اللي يسافروا كثير او اللي اهاليهم في مدن ثانيه ويروحوا عندهم في الاجازات من ماركة قراكو متوفره في سنتر بوينت وفيه اشكال كثيره من المحابس واعرف بعض الامهات تستغني عن السرير وتستخدم هذا
حاجز للطفل

او كذا اللي يتحط عالدرج او قبل المطبخ


مرجيحة مولود
فيه اشكال كثير بعضها مخصصه للطفل من الشهر الاول وتقدري تشبكي عليها اي بود وتشغلي اي حاجه قرآن او اناشيد يسمعها وبعضها لكم شهر قدام لما يقدر يحني ظهره وفيه مرجيحه صغيره تتعلق عالباب


طاولة تغيير (مريحه للام في تجنب الانحناء المستمر للتغيير لطفلها)





وفيه منها اشكال كثير زي الطالوله الصغيره فوق الدولاب وتنشال لما تسير صغيره عالطفل

وبعضها مرفقه مع المحبس او السرير وبعضها تتحول بعدين ارفف عاديه تستخدميها لأي غرض


وراجعة بإذن الله

من هدايا المولود وأمه

حلوه فكرة انك تتذكري الام بحاجه حلوه لان كثير حيهدوا للطفل بس الام في هذا الوقت تكون منتظره الولاده ومحتاجه للتغيير بعد شهور من الحمل والتعب
حلو انك تتذكريها بحاجه تفرحها قارورة عطر - طقم مجوهرات - فستان ناعم للبيت - بيجاما - علبة مكياج - قميص نوم- او اي حاجه من اللي ذكرناها في اول رد



فكرة هدية مفيده للام المرضعه
مخدة رضاعه +مريلة رضاعه مفيده للام لانها تريح ظهرها وكمان تساعدها انها ماتنحرج لما ترضع ابنها



فيه ناس عندهم عادة انهم يحطوا للمولود فلوس وكل منطقه يسموها اسم انا صراحه احب اسوي هالحركه للناس اللي اعتقد انهم محتاجين الفلوس اكثر من الهديه يعني دخلهم الشهري محدود لأنه قدوم مولود جديد على اسره حالتهم ضعيفه اكيد حيحتاجوا تجهيزات كثيره له


الرد الجاي راح اكتب عن افكار شفتها في هدايا وعجبتني

شفت هدية وحده مهديتها لمولود الهديه بسيطه وجميله
كانت عباره عن مخدة مولود وحاطه فوقها عطر اطفال جميل ومغلفتها بشيفون نفس لون المخده ورابطته بشرايط ساتان طالع الشكل كيوووت
المخده زي هاذي

والعطر عندي اسامي عطور اطفال اذا احد محتاجها نزلتلكم اساميها


_____________

كمان فيه هدية وصلت لانسانه قريبه لي وقت نفاسها مع انها بسيطه بس عجبني ترتيبها كنت عندها
كانت عباره عن علبه مربعه شكلها مصنوعه من الخيش او نفس القش اللي في السلات
وحاطه فيه قميص نوم طويل شيفون + افرول نعوم للنونو +3 شموع معطره + الحاجه الاخيره ناسيه هي محفظه(بوك) او نظارة شمسيه نسائيه
____________________


لما انا ولدت احد الهدايا اللي وصلتني في بوكس مورد بألوان حلوه بذله انيقه من سنتر بوينت مطقم معاها المريله+الجزمه+القبعه وناثره في الصندوق كم حبه من كور تعطير الملابس
____________________
كنت بهدي وحده من صديقاتي العزيزات هديه بمناسبه عندها جبت لها طقم عطر وكريم تبعه واشريت شنطة يد صغيره وكان من الصدفه لون العطر والشنطه متقارب هههه حطيت في الشنطه ورود مجففه ودخلت العطر والكرين بشكل مرتب وقفلتها وحطيتها في كيس كرتوني لماع
_________________



مع اني ماكنت انتظر تقييم او رفع بس كنت اتمنى اشوف تجاربكم وافكاركم ونستفيد مع بعض واستفسارت بعض ونجاوب وننبسط في موضوع حلو
ومادري راح ارجع مره ثانيه اكمل بقية الافكار اللي عندي او لا
الحضور مايشجع اكمل بقية الموضوع مادام اني اقراه لوحدي