هديه خاصه لحبيباتي المتزوجات الجدد *قليلات الخبره في المطبخ*وجبه كامله وسهله

كيفكم حبيـبـاتي وكيف حياتكم الجديده أدري إنها متعبه شويه بس كل شي في بدايته صعب :angry:
بس مع الأيام حتتعودوا عليها صدقوني
ولاتزعلوا لما كتبت في العنوان *قليلات الخبره * أنا ما كان قصدي الإستهانه بيكم لا والله بس قصدي إنه في بعض البنات من هم عند أهاليهم بيطبخوا يعني عندهم خبره
والبعض الآخر زي حالاتي كنت امر عالمطبخ مرور الكرام (أشرب مويه وبس)هههههه
يا حليلي......
المهم عندي لكم أطباق بسيطه ممكن تسويها كبدايه بس حتطلع جنان وحتفتكريني بخير ولو ماعجبتكم ........أمانه ماتدعوا عليا بس أدعوا لي بصلا ح الحال
خلاص!!!!!!!!!
أتفقنا.......
نبدأ بسم الله

أولآ:**** طبق السلطه****

سلطة الذره

المقادير

علبه ذره

نصف حزمة كزبره خضراء

عود بصل أخضر

حبه صغيره فلفل رومي أحمر(فليفله حمرا)(فليفله حلوه)نفس الشي
*اللي زي حق البيتزا مو الحار*

عودين نعناع أخضر

عصير نصف ليمونه
ملعقة شاي سماق*الأحمر اللي نرشه عالفتوش* لو ماعندك مولازم

ملح

ملعقه صغيره زيت زيتون

الطريقه:

تقطعي الخضار كلها مع بعض تقطيع صغيييييييير
تصفي الذره وتغسليها
تحطي الخضار السابق تقطيعها على الذره وتقلبيهم مظبوط وبعدين في الآخر تحطي التوابل وزيت الزيتون
تحطي السلطه في زبديه صغيره وتقلبيها في طبق التقديم وما يحتاج لها تزيين لأنها ملونه وألوانها حلوه................طبعآ زي اللي مسويتها


ثانيآ:****الطبق الرئيسي****
لا تخافي حبيبتي من الإسم الطبق سهل جدآ ولا فيه حوسه

طبق الأرز بالخلطه

المقادير

2كاس أرز

حبه بصله متوسطه

حبتين صغيره بطاطس

دجاجه مقطعه لنصفين

*إذا قطعتي الدجاجه لأرباع مو ترميها حتنفع ما في أي مشكله*

معجون صلصة طماطم

عصير طماطم حبه وحده كفايه

ملعقه كبيره ثوم طازج مطحون

ملح ليمون أو عصير نصف ليمونه

ملح

فلفل أسود

عود قرفه(دارسين)

عودين قرنفل(مسمار)

ورقة شيبه (ما أعرف لها إسم تاني)إذا ما عندك مو لازم

4 حبات فلفل أسود صحيحه

حبتين هيل صحيحه

نصف كاسه زيت

الطريقه

أول شي سمي الله الطريقه سهله جدآ بس إنتي أتوكلي على الله وجربيها

نسلق الدجاجه مع أربع كاسات مويه ونضع مع ماء السلق(حبات الفلفل الأسود,القرفه ,القرنفل,الشيبه,الهيل)يعني كل الأبازير الصحيحه
وتسيبيها تقريبآ نصف ساعه وبعدين تحطي الملح (عشان الملح مايخلي الدجاج يستوي أنتبهي لا تحطيه من البدايه)
تصفي الدجاج من ماء السلق وتخليه على جنب

نغسل الرز وننقعه في مويه حاره مده ربع ساعه بعدين نصفيه

نسلق الرز في المويه اللي سلقنا فيها الدجاج ونضيف عليه ربع كاسه زيت
نطفي الرز لما يستوي وممكن نلون الرز بشويه زعفران بس إذا ما عندك موضروري

تقطعي البصل حلقات رفيعه والبطاطس كمان نفس الشي حلقات رفيعه يعني سمكها ما يتجاوزنصف سم
بعدين تقلي البطاطس في الزيت نصف قليه يعني تقريبآ 3 دقائق أو لحد ماتكون طبقه صفراءقاسيه شويه

بعد كده
تجيبي زبديه كبيره تحطي فيها (عصير الطماطم+الصلصه+الثوم+الملح +ملح الليمون+ربع كاسه زيت)
وتخلطيهم مع بعض مظبوط

تجيبي صينية فرن تدهنيها بشوية زيت وترصي أول طبقه بصل وبعدها البطاطس المقليه نصف قليه(على فكره قليناها عشان تتماسك وما تتـفـتـفت في الصينيه)
وتحطي الدجاج فوق البطاطس بعدين تصبي عليها الخلطه اللي في الزبديه(الصلصه+الطماطم+.......)ترشي على الوجه فلفل أسود مطحون
تغطي الصينيه بقصدير(ورق ألمونيوم)
تسخني الفرن على درجة حراره180ْمْ لمدة خمس دقائق قبل وضع الصينيه حتى يصل الفرن لدرجة الحراره المناسبه
تدخليها الفرن لمدة خمسة عشر دقيقه وهي متغطيه وبعدين تكشفيها وتحمري الصينيه من فوق لمدة خمس دقائق
لما تخرج الصينيه من الفرن تحضري طبق التقديم
تشيلي الدجاج من فوق البطاطس وتخليه على جنب
تحطي الخلطه اللي في الصينيه تغرفيها في طبق التقديم وفوقها تحطي الرز وآخر شي تحطي الدجاج على الوجه

وبألف صحه وعافيه
وأي سؤال يا بناتي تراني مستعده

أتمنى ينال الطبق إعجابكم

تعبتوا حبيباتي والا نكمل طبق الحلو والله سهل علشان تكون هذي وجبه كامله وسهلهok

ثالثآ طبق *****الحلو*****

الجيلي بالقشطه
المقادير
علبه واحده جيلي رويال( أفضل نوع جيلي) باللون اللي تفضليه أنا أفضل الأحمر

علبه فواكه مشكله صغيره وإذا ما عندك قطعي تفاح وكمترى يعني فواكه طازجه وإذا ماعندك بلاشي فواكه ما في أي مشكله

ثلاث أرباع كاسه مويه مغليه
ثلاث أرباع كاسه مويه بارده

علبه صغيره قشطه تاج
بسكويت حلو مفتفت

الطريقه:

تحطي الفواكه في طبق التقديم
في زبديه زجاجيه
تفتحي كيس الجيلي وبعدين تضيفي عليه المويه الحاره وتقلبيه لحد مايذوب الجيلي
تضيفي المويه البارده وتحركي الجيلي دقيقتين

تصبي الجيلي في وعاء التقديم مع الفواكه

تبردي الجيلي لمدة ساعه على الأقل

وقت التقديم تفردي القشطه على الجيلي وترشي الوجه بالبسكويت المفتـفـت إذا باقي معاكي وقت رجعيها البراد عشان تبرد القشطه

أظن ما في حلا أسهل من كده

أتمنى حبايبي ما أكون طولت عليكم بس والله الأصناف سهله جدآ ولذيذه تستاهل تجربوها
وياليت تعطوني رأيكم



وتقبلوا تحياتي أختكم
القـ*الحنون*ـلب