السلام عليكم ..
مرحبا بنات ..
اول شي النك نيم قديم وأنا تخرجت السنة اللي فاتت وعمري بشهر 3 الجاي أتم 23
أمس دق واحد على الوالد يخطبني لولده .. تمام ..
طيب هالخاطب وش مواصفاته اللي صدق صدق حيرتني بقووووووووة ..
أول شي مو موظف يدرس باقي له ترم ويتخرج وتخصصه أصول دين .. وعمره أكبر عن دراسته عمره 25 ..
لكن الظاهر دخل متأخر للجامعه هذا استنتاجي .. ثاني شي أبوه قال لاابوي أنا غني وماعلي وبساعده لحد مايتوظف
لكن أنا كلمت أمي كيف بيساعده هل بيعطيه اللي يريحنا صدق ولا بس مجرد مبلغ شهري مايكفي ..
ومو شرط انه غني الابو خلاص أنا بعيش بنعيم مع ولده لانه ممكن يطلع بخيل مو كل غني راهي وكريم ..!!
الشي الثاني أخاف يتخرج ولايحصل وظيفة وانا اللي أتوهق ..
شوفو اللي محيرني بعد الرجل نفسه ساكن بمنطقتنا تمام لكن أهله ابوه وامه واخوانه كلهم بالرياض يعني هو وحداني هنا يقول ابوه انه انقبل بجامعتكم وحب منطقتكم ويبي يتزوج منكم ويسكن هنااا .. !!!!!!!
ياسلام وأنا وش يضمن لي انه مايتخرج ويروح يسكن بالرياض ويأخذني معه لو فرضا صار نصيب
يعني مهما كان هو اصله من الرياض ويضل غريب عندنا الا مايروح لااهله والقصة صايره لبنت عمتي تزوجها
وسكن بمنطقتهم 7 سنين ومن جابت الضنا الاول قال يلا شيلي اغراضك بروح اسكن بمدينة أهلي !!!
يعني الموضوع صعب وانا بعيش احتمالات وبنتظر اللحظة اللي يصدمني فيها انه بيروح يسكن بالريااااااض
وغير كذا ليش هو مايبي الرياض ولا يبغى يسكن قريب لااهله وبمنتطقتهم الا اكيد في بينهم مشاكل
وهو مو على وفاق مع اهله لانه الا مايحن الواحد لااهله وابوه وامه بالذاااااااااات
غير كذا نفس الرجل ملتزم وكذا وأنا صراحة مابي واحد ملتزم اخاف يطلع التزامه قوي وكل شي ممنوع ويضيق علي عيشتي لان الدين يسر وفيه كثير رجال متدينين ولا هم فاهمين الدين صح بس يشددون ويضيقون على زوجاتهم وعيالهم والحياة تصير صعبه معهم ولا تطاااااااااق
وانا ماني ضد الالتزام الحمدلله أنا التزامي وسط عبايه راس ولبسي ساتر بس ماتشددت مره وهو ابوه
قال جينا لكم لان بناتكم ستيرات وأهل دين وسمعتكم طيبة والحمدلله هذا من فضل ربي ..
يعني هو حتى أهله ملتزمين فهمتو علي .. أخاف الولد يكون شديد مره وماينفع معه التفاهم
وأنا طول عمري عايشة على الوسطية يعني ماامنع نفسي من الطق مثلا عاادي ..
فماادري صراحة وش رايكم لاني مشتتة مره .. والغريب امي تقول سمعت ابوك يكلم واحد
وهو متوتر ابوي يقول الا بشدد هذي بنتي وزواج .. والظاهر ابو الولد هو اللي يكلمه وابوي قال له ليش ولدكم ساكن بعيد عنكم يمكن انتم متفتحين وهو هرب عنكم لانه ملتزم أو انه من الاخوان وكذا فهمتو علي يعني اخاف يكون ينسجن وكذا اطيد فاهمين علي ..وابوه زي اللي عصب قال لاابوي لاتشدد يسر ولا تعسر الدين سهل وخل الموضوع يمشي بسهولة .. يعني الاب تضايق من كلام ابوي ليش طيب ؟؟
ايش فيها لو سألنا عشان يتطمن على مستقبلي لان احنا مانزوج بسرعه خذها وروحو بيتكم لاااااا
أختي قبل تتزوج سألنا عن زوجها شهرين كاملات هذا زواج مو حيا الله يوم يومين لا والله ..
فاانا استغربت رده فعل ابوه ليه يبي الموضوع يمشي بسرعه ويزوجنا وخلاص ..
أبوي قال انا بنادي الولد وأجلس معه وأفهمه وافهم درجة التزامه وليش مايبغي يسكن مع اهله بالرياض
وأمي قالت حلوو وسألوني وانا وافقتهم يمكن تتغير وجهة نظرنا عقب مانشوفه وكذا
وشوفة ابوي للولد تزيل عننا كل الاستفاهامات وتبين كانه زين او لا اذا زين استخير واشوف واذا لا الله يوفقه
وطبعا أجلنا كل شي لبعد العيد لانو مو قته أيام العشر فضيلة ويوم عرفة الله يعتقنا من ناره وياكم
وبعدها عيد حتى بيتنا مكركب اضاحي وحوسه .. ان شاء الله بعد العيد ابوي يبغي يجلس مع الولد
جامعية طفشانة @gamaay_tfshan
محررة برونزية
يلزم عليك تسجيل الدخول أولًا لكتابة تعليق.
طيب والمطلوب ؟؟طيب والمطلوب ؟؟
اوه نسيت اكتب الفاضيات والمفهيات لايردون علي ..
ملتزم الله بس يعينك عليه
لا بعد تخصصه اصول دين
باقي له ٨ سنوات ويوقف عنه حافز
بالتوفيق لك
لا بعد تخصصه اصول دين
باقي له ٨ سنوات ويوقف عنه حافز
بالتوفيق لك
الصفحة الأخيرة
أهم شي اسالوا عن الولد زين ولاتستعجلون
واستخيري اكثر من مره وربنا يكتب اللي فيه الخير...