هذا الموضوع جدا متعب تفكيري

السلام عليكم. يابنات ايش رأيكن بالناس اللي تتمسخر وتتضحك على اشكال ولبس الناس وتقارن يعني تعلق على كل صغيره وكبيره على ناس تعرفها او ماتعرفهاش. المشكله ان الناس هاذي من اقاربي يعني بعض من بنات عمي ،خالاتي ،بنات خالاتي، زوجات اخواني . والله جابوا لي القلق اجلس معاهم واني مش مرتاحه خالص يعني اتخيل الان اكيد يتمسخرين علي. يعني مثلا لما اروح بيت اهلي ومافيش احد غريب بس امي وخواتي احب اكون على راحتي يعني لبس مريح وبدون مكياج وتجي بنت خالتي تزورنا، يعني وحده من البيت مش مشكله صح... لكن لا تبدا تعلق ليش ماتتصلحي ليش مبهذله😨😨 ومثال ثاني مره برضو كنت عند اهلي وجائت وحده تزور امي مع زوجات اولادها وكانت خالتي وبنتها عندنا وبعد مامشت الحرمه وزوجات اولادها ماتتخيلوش كميه التعليقات ان زوجات الاولاد جدا عاديات ولا وحده حلوة. طيب وليش اصلا يتكلمين عنهن!! والله صار فيني زي الوسواس والخوف من تعليقاتهن. ومثال اخير، مره حضرنا عرس وكانت سلفتي موجوده واول مره يشوفينها صار فيني زي القلق وافكر انهن بيقارنين بيني وبينها واخاف انهن يشوفينها احلى او اشيك مني والله شغلين تفكيري منهن لله. احيانا اقول لنفسي لش يتمسخرين وهن اصلا كلهن عيوب و جدا عاديات وحتى مش محبوبات من ناس كثيره بسبب لسانهن فليش شاغله بالي فيهن، بس والله ماقدرت. كم اتمنى ان الناس كلها تكون طيبه وقلوبها صافيه لا سخريه ولاتعليقات سخيفه.