هذا جزء ضئيل للحصل 😔

V
💎 💙:
#ضحايا مجزرة القيادة
بحاول اختصر قصتي ليكم
انا X من أسرة صعبة شديد
من غير م ادخل في تفاصيل اسرتي كانو ضد الفكر السياسي بالذات للبنات
و انا م كنت منتمية لحزب بس بحب السودان من قمت
حبي للسودان زااد مع شرارة الثورة في عطبرة و طبيعي اهلي بشاكلوني لمن افتح الأخبار او أيي حاجة عن الثورة.. في الفيس كنت مراقبة جدا من قبل الأسرة كلها و اني م اتفاعل او اكتب في الثورة و المواكب كان الموكب بجي جنب البيت و م بخلوني اطلع اشوفه بس انا كنت بطلع بالكذب بقول ماشة لصحبتي او كده و بطلع المواكب البتكون في أحياء بعيدة من حينا عشان م الاقي زول بعرفه ...
لغاية هنا و كنت ممشية حياتي و بطلع من غير ما اكلم أهلي
في تأنيب ضمير بس كنت واثقة انها ح تسقط و بعدها ح اكلمهم بعد اعتصام القيادة م كنت بمشي يومي بس بمشي لمن أمي تتطلع أو اقول طالعة الجيران او لصحباتي و كده
و بكون مبسوطة في القيادة
لغاية م في يوم قلت لي صحبتي اني نفسي انوم في القيادة و اتفقت اقول ليي اهلي اني دايرة ابيت معاها عشان اهلي بثقو فيها و بريدوها شديد
و اليوم داك كان نفسه يوم المجزرة م تقولو يوم فض الأعتصام داك كان يوم مجزرة القيادة
كان اسوأ يوم في حيااتي
انا عرفت اهلي كانو خايفين من الفكر السياسي لي? !! بس كمان طريقتهم كان غلط شديد ...
اليوم داك بعد مشيت القيادة اتونسنا قروبات و دخلنا الخيمة عشان ننوم كان في كم بت بعرفهم هناك و دخلت معاهم. بس انا م كنت نعسانة كنت متوترة جددا
قلت احتمال عشان اول مرة ابيت في مكان و اهلي يكونو م عارفين ... بعد شوية دخلت الفيس لقيت في اخبار انه احتمال يفضو الأعتصام الليلة صحيت البت المعاي و قلت ليها بس قالت ليي اشاعات يوميا بتكون في أشاعات عن فض الأعتصام و رجعت نامت
بس انا قلبي أكلني و الله قلت اضرب اقول ليي اخوي يجي يسوقني البيت عاينت للساعة كانت 2 و تاني خفت من اخوي و من ناس البيت ....بقيت داخلة الفيس لغاية م سمعت صوت عاالي صحيت المعاي و قمنا جرينا كان في كمية من الأولاد صامدين و بطلعو في البنات
انا كنت جارية و فجاءة شفت اخوي و بقيت بناديه بس صوت الرصاص كان مغطي ايي صوت في القيادة !!
للأسف اخوي بعد وصل الباب لمحني و ي ريتو م شافني جاني راجع و جاري و كان ماسكني من يدي و بكورك فيني م سامعة بقول في شنو بس الأغلب كان بلومني على جيتي
بعدها طلعنا بس لاقونا الكلاب البشرية و وقفونا
بقو بضربو في اخوي كانو شايلين عصا ضربوه شديد و انا بكورك فيهم فكو م تضربوه
و اخوي بقول ليي اجري لو حصلت ليك حاجة انا بموت اجري و م تشتغلي بيي اجري بس.. بس الكلاب كانو بستمتعو بي ألمو و عرفو نقطة ضعفو اللهي أنا اخته و وقفو منو ضرب و مسكوني أنا بقو بغتصبو فيني قدام اخوي 😭💔 و انا م كنت سامعة غير صوت اخوي بقول اقتلوني و م تعملو فيها كده طيب اقتلونا الاتنين بسمع ي كلاب ديي شرفي و بكورك بأعلى صوتو بعدها عاينت و شفت كسرة و ضعف في عيونو و تاني م وعيت بي حاجة...
فقدت الوعي من الألم و من القهر و من الحسرة و من الذلة الذلوها لأخوي
مستحيل تحسو بي وجعتي مهما رفعتو من هشتاق او أيي حاجة
بس رجعو حقنا
بعدها صحيت انا كنت في المستشفى 💔
خايفة من ردت فعل اهلي و كيف اتقبلوني و جابوني المستشفى
بعد شوية جاءت مرة غريبة و معاها ولد عرفت بعدها انه ولدها
قعدت جنبي في السرير و اتكلمت معاي و انا ساكتة و منزلة عيوني و دموعي جارية بس
م رفعتها الا بعد سآلتني طيب ي بتي انتي ساكنة وين? !
م قدرت ارد بعد كررو علي السؤال وصفت ليهم بيت صحبتي
بعد خرجونا من المستشفى ركبنا العربية و مشينا على بيت صحبتي بس لمحت صحبتي في الشارع وقفتهم و نزلت ليها عيونها كانت مورامات من البكا و مسكتني حضنتني قوي و انا م اتحركت من مكاني بس قلت ليها ي أبرار انا #اغتصبوني حسيت انها رخت يديها مني و بعد شوية فكتهم و قعدت في الواطة و سكتنا مسافة طويلة تاني قعدت ليها و سألتها محمد اخوي قالت ليي الله يرحمه (اصلا انا كنت متأكدة انه م ح يكون عايش بس لو م قتلوه الجنجويد كان ح ينتحر بسبب كسرة كرامته) تاني قالت ليي انا شايفة م ترجعي بيتكم اهلك رفعو عزااك مع اخوك انا م انصدمت و بعدها قامت و قالت لي انا ماشة بيتكم هسا و م ح اقول انك لاقيتني
و انا قاعدة في الأرض جو عليي الأم و ولدها
انا كنت بفكر في الأنتحار في اللحظة ديك
ركبنا و طيلة الشارع انا ببكي بس و م سألوني من حاجة و ودوني بيتهم
هناك حكيت ليهم ايي حاجة و كلام صحبتي
امهم كانت طيبة و متفهمة لأبعد حد واستني و كان عندها ولدين بس و ودتني طبيب نفسي بس حالتي النفسية م اتصلحت و كانو بهظرو معاي و امهم بتقول لي انا كان نفسي في بت
بس كله م خفف علي الوجع الكنت عايشاه
انا كنت بفكر في الأنتحار يوميا
بس م عارفة في حاجة مانعاني
جاءني ارق بكون صاحية الليل كله بصلي و بدعي علي حكومة الأنقاذ و على المجلس العسكري
عندي دعوة بكررها
اللهــم اذقهم من نفس الكأس بدعي بناتهم يحصل فيهم نفس الحصل م حقد بس عدالة رب الكون
بس م
عارفة اذا كان ربنا ح يستجيب ليي
انا في النهاية ح أموت كافرة فكرة الأنتحار م مفارقة رأسي نهائي عايشة صراع م عادي بيني و بين نفسي...
قبل أسبوعين الأسرة مشت فتحت بلاغ م عارفة بفكرهم ح يرجعو لي حقي و بعدها جابو لي تلفون و نزلو لي التطبيقات بس م كنت دايرة ادخل اهلي موجوعين و انا ادخل ميديا
قررت ادخل عشان اشوف الحاصل
عملت صفحة جديدة و تابعت بيها كل البعرفهم او البعرفو أهلي
من ضمنهم كان ودعمي
في بوست ليه كاتب الموت أهون من الأغتصاب....
م عارفة هو قاصدني او أشارة عشان م ارجع البيت و انتحر و في هشتاق لي أبرار #المغتصبة مغدورة
انا دايرة اقول ليكم اني في النهاية ح انتحر و اخش جهنم ...
بس انا ح أدخل جهنم و العمل فينا ده كله ح يدخل نفس جهنم الأنا دخلتها..
منتظرة القصاص بس ....
انا السبب في قتل أخوي
انا يوميا بموت يوميا ..
احتمال ده كله عقاب عشان كذبت علي أهلي
بس ما زلت بحب السودان حافظو عليه نحنا ضحينا بأغلى حاجة عندنا
و اخوي كان بحب الوطن 💔
انا و اخوي ضحية الأنقاذ
العرفتو عن أهلي انهم م فتشو مستشفيات عشان يلقوني بس فتشو المشاريح
و اخيرا اقتنعو اني من الجثث الرموهم في البحر او الجثث الحرقوها في الخيم
نسيت حاجة
اهلي ح يكونو بقو يكرهو ابرار جددااا
#رجعو لينا حقنا
#القصاص انا حافظة الوجوه العملت فيني كده و م ح أخاف يوم المحكمة ح أوصفهم
بس ادعو أخوي م يكون انتحر عشان م يموت كافر
و ادعو اني اموت قريب من غير انتحار 😭💔
#مجزرة القيادة العامة