هذا قسم الحياة الأسرية , ولا أنا فاهمة غلط!!!

السلام عليكم ورحمة الله ..
وكل عام وانتم بخير..
لاحظت منتشر كثير في هذا القسم وقسم المشاكل الإجتماعية اللي تشتكي من زوجها أو اهله أو من أي شخص ..
وطبعا تقعد تعدد المساوئ والعيوب وبعدها تطلب المسكينة حل لمشكلتها أو دعوة صالحة بظهر الغيب,,,

وبعديييييييييين

أتفاجأ كثير بنوع الردود اللي تنحط في الموضوع :

مالت عليه النذل يختي تطلقي منه وش تبين فيه!!!

أو

زوجك هذا حيوان وحرام فيه اللقمة صراحة ,, لا تزعلين يا أختي بس هذا رأيي بصراحة..
يعني يسكر ويغازل ومقصر معك وفوقها جالسة معه,, والله انك مرخصة نفسك ولا تلوميني من حرتي عليك اقول هالكلام

أو

والله لو أنا منك لاوريهم العين الحمرا وأفضحهم في كل بيت من عدالة وجيههم الضبان , يشوفون نفوسهم في المراية أول وبعدين يتنقدون على خلق الله<<<<<<< ولا حظوا ان الرد من وحدة قرأت و ما شافت

أو

وجع يوجعه ذا الصايع الله يريحك منه ومن خشته , يا أختي تطلقي و ربي بيرزقك خير منه وهو خلي امه تنفعه ,,

أو

بصراحة سلفتك قليلة حيا ولازم توقفينها عند حدها , وإذا ضربت عيالك لطشي عيالها واطرديها هي واياهم بعد , ما عاد إلا هي في بيتك ياكلون ويشربون و انت تكرفين لهم وزود يضربون عيال الناس اللي ضفوهم

وكله كوم والشماتة والسخرية كوم ثاني

طيب السؤال هنا .. ايش الفائدة من هذي الحلول والردود!!!!!!!

المفروض يا أخواتي ان اللي تحط رد تكون فعلا تقصد كل كلمة كتبتها وما ترد على مشكلة فيها خراب بيوت أو إصلاحها إلا وهي فاهمة لب الموضوع وحاطة نفسها مكان صاحبة المشكلة ..

أنا أجزم ان لو كل وحدة تخيلت انها هي صاحبة المشكلة أو أحد من اللي يعزون عليها كان تغيرت الحلول والردود تماما ..
مشكلتنا اننا نبغى نتكلم ونثبت وجودنا بدون حساب للعواقب وبدون اي وعي أو تفكير..

والطامة الكبرى اللي زوجها معيشها في نعيم أو بنت ما تزوجت ونجي ترد على وحدة عندها مشكلة مع زوجها والرد الجاهز هو : والله لو زوجي يقول لي كذا لاروح بيت أهلي واطلب الطلاق , تراه ما اخذك من الشارع انتي بنت ناس ولك كرامة..

طيب ما اختلفنا يا جماعة كلنا لنا كرامة ونبغى الأصلح لنا ولأسرنا
لكن هل لو فعلا كنتي في محل كاتبة المشكلة بتقولين نفس الكلام؟؟
ما أعتقد , ولا ما كان شفنا البعض تتحط ردود من هذا النوع وبعدها نلقاها كاتبة موضوع عن مشكلة مع حمولتها او زوجها وتطلب حل.. كان نفذت الحلول اللي هي تحطها وكشرت عن انيابها وخذت حقها بيدها.

غير ان الإجابات و الحلول اللي تجي جاهزة وتستخدم كقوالب جاهزة في معظم مواضيع المشاكل الأسرية المعقدة خصوصا بين الزوجين تحتاج لمعرفة تركيب وظروف وبيئة وتفكير حميع اطراف المشكلة ,,


فخطأ تماما تجي وحده وتحط حل في سطر أو سطرين وتقلب فيه مخ المسكينة اللي تنتظر أحد يرشدها للحل الأمثل وتصير بدل ما تكحلها عمتها .. وإذا انخرب بيت الحرمة محد بينفعها من اللي قالوا تطلقي ولا قولي له وسوي به..

يا بنات القسم هذا اسمه الحياة الأسرية وانا أشوف انه صار الحياة النكدية .. كله مشاكل وبدل ما تلقى لها حلول تلقى اللي يصب الزيت عالنار ويولعها مرة وحدة..

احنا في زمن يتطلب معرفة واطلاع وفهم صحيح للحياة الأسرية وللعلاقات السامية بين البشر مهما كانت العلاقة اللي تربطهم..
والمطلوب اننا نثقف انفسنا من جميع النواحي خصوصا في مجال فهم النفسيات و طريقة التفكير عند كل جنس لأنها أهم من ثقافة الماركات والمسلسلات و فنون التجميل..
لأننا مهما تطورنا و تعلمنا و رحنا وجينا نبقى بشر لنا نفس الإحتياجات والنفسيات و المشاعر المشتركة بين جميع البشر

واعذروني عالإطالة بس شي في نفسي من مدة وودي اقوله