هذا نصيبي في الحياة رغم المراره فيها ومالي سوى الاحتساب

خواتي انا من المتابعات لهذا المنتدى من زمان واقرا ماتعانيه خواتي المتزوجات من مشاكل ومايطرح

لها من حلول وحبيت اطرح لكم مشكلتي باختصار

طبعا انا متزوجه من سنيين ولدي اولاد وبنات مراهقين تزوجت في سن مبكر وظلمت من قبل اهلي في

هذا الزواج الذي لم يؤخذ رايي فيه وتزوجت انسان اكبر مني ولا اعرف عنه شي رغم قرابته لي ومن

هالزواج بدت معاناتي وماساتي كان انسان غريب الطباع ويميل للعزله حاولت معه لكن بدون فايده

وكان دائم مشغول يموت بشغله وهو كل حياته يقضى معظم وقته معه وانا بالنسبه لاهلي كنت البنت

الكبيره اكبر اخواني وخواتي وكل شي علي وكانت امي مريضه وكبيره وتعتمد علي بامور خواتي وما

كنت اقدر اتركها بهالحاله يعني تحملت مسئوليت بيتين اهلي وبيتي وكنت احاول ما اقصر بكل الاحوال

وما اقصر معه على حساب اهلي ولاهم على حسابه وكان انسان مايحب يطلع معي ابدا رغم محاولاتي

ومع كذا رغم بعده عني وتقصيره ورغم اني بين بيتين ومسئوليتين ربيت عيالي ولله الحمد وكلهم متفوقين

واكتشفت مع الايام خيانات زوجي وعلاقاته النسائيه واللي تكررت كثير ادري بتقولون ليه ماخذيتي

موقف منه باقولكم ليه

اول شي امي مريضه واهلي كانت احوالهم الماديه تعبانه وبيتهم اجار كيف اجي وازيد همومهم همي انا

وعيالي

ثانيا عيالي وش ذنبهم احملهم ذنب ابوهم واتركهم مشتتين بين ابو وام مطلقين كنت افكر كيف بتكون

حياتهم وبناتي من بيراعيهم لو طلقني ورفض يكونون معي وتعرفون انهم امانه بايدينا كنت اجلس
اناظرهم وهم نايمين وانا دمعتي بخدي من اللي اعانيه واقول ان كان ماحس فيهم وانا معه وش

بيكون حالهم بعدي واستخير ربي واقوم اصلي

ثالث شي حتى لو تطلقت يمكن يعوضني ربي بس هم اللي بيكونون الضحيه

وصبرت برغم الالام النفسيه والابتلاء من اخواني وخواتي وما الاقيه من مشاكل منهم دون مراعة

للي اعانيه لاني ماكنت اتكلم واقولهم علشان امي كيف والجنه تحت اقدامه

صبرت مع اني كنت اعرف انه يسافر لهم ويشوفهم والاقي صوره معهم وهو يتمشى فيهم وانا اللي

محرومه سبحان الله زاد تعلقي باطفالي وطنشته هو وعلاقاته

وصرت اهتم بنفسي وبيتي وعيالي والحمدلله قناعتي ورضاي والاهم ايماني بالله وانه هذا اللي مكتوب

لي وابتلاء منه لي علشان اصبر واحتسب

ومضت السنين وعيالي وبناتي تخرجو وبنتي تزوجت والحمدلله والكل يثني على تربيتهم لاني

ماكنت اخليهم يحسون باللي بيني وبين ابوهم واحاول اعوضهم واعوض نفسي كنت البي اللي يبون

لو قصر واطلع انا وهم واعوض نفسي بطلعتي معهم وهم اعوضهم ما اخليهم يحسون بالنقص

عن غيرهم او اهماله لهم

والله ياخواتي ان المشاكل بين الام والاب يدفع ثمنها العيال ونفسيتهم تتاثر مره وانقهر كثير
لاشفت اللي تحط حرتها من مشاكلها مع زوجها فيهم واو ما تفكر الا في نفسها

ربي اعطانا اياهم نعمه ومسئوليتنا تربيتهم والتقرب منهم

والحين والله وسبحان الله شفتو هالزوج اللي ذوقني المرار ومع كذا كنت احسن له ولاهله وما اقصر

معه بكل حقوقه رجع يتاسف ويحاول يعوضني انا وهم عن كل اللي مضى

ويقولي كيف قدرتي تحملين اللي شفتيه معي وتقصيري قلت له عندي ايمان بالله كبير وبالقدر خيره
وشره وان هذا قدري بالحياة والمفروض ما اعترض

ولاني كنت احب عيالي كثييييييييير بديتهم على نفسي ولاني كنت احب امي كثير ولا ابي اتعب

نفسيتها تحملت همومي بقلبي ومابينتها لها جلس يبكي بمراره والله لانه لف ودار ويوم رجع

لعقله وفكر ندم وهاذي نعمه من ربي لاتفكرون بنات هاذي كل قصتي معه والله كان يغيب عننا

كثير ولايدري عن البيت وش فيه ولاكيف عايشين اهم شي اني حافظت على عيالي من التشتت بين ام واب مطلقين

وهو وكلة امره لربي وهذا هو رجع

صحيح اني ماراح انسى ماشفته منه ولاكن شوفتي عيالي والفتهم مع بعض ووناستهم اذا اجتمعنا

تسوى عندي مواجع سنيني كلها

اختكم ذكرى