هذه اخباري .. شنو هي اخباركم ؟؟؟؟

السلام عليكم ورحمه الله وبركاته ..
شلونكم بنات ان شاء الله بخير ؟؟
ادري لي فتره ما قلت لكم اخباري ولا اي شي عني ..

والحين جيت عشان اقول لكم آخر اخباري ..

اممممم اخبار حمل وغيره للحين الله ما اذن ..

اخذت الشهر اللي طاف حبوب كلوميد بس اسمها غير مو كلوميد ( لان الصيدليه ما كان عندهم كلوميد ) فعطاني الدكتور حبوب ثانيه . يقول نفس الكلوميد بس اسمها غير ..

اخذت الحبوب . وما رحت الطبيب اشوف حجم البويضه لان صارت لي ظروف خاصه منعتني من الذهاب للمستشفى ...

بس سويت جماع يوم 13 و 15 و 18 من الدوره . :) وادعي ربي ان يكون حجم البويضه مناسبب للحمل .

شهر 11 عرس اخوي . رحنا خطبنا له . و الحمد الله ملج ( كتب الكتاب ) وتحدد العرس في 24 /11

ومشغولين حيل بالعرس و التفصيل و اللبس و تجهيز عش الزوجية لأخوي ..

على فكره اهوا اخوي من ابي .

اول امس كان في جمعه في بيت عمي الكبير . عمي هذا دائما مشاكل معاه وما احبه كثير . لانه الله يسامحه كان حيل مضايق امي الله يرحمها .وكله يتهاوش معاها . لدرجه بعد وفاه الوالد كان يبي ياخذنا من امي .. بحجه ان امي غريبه وشلون تربينا !!

المهم عمي الكبير . كل ما يحس انه خلاص يبي يموت يجمل العائله ويقعد يتأسف على الامور اللي سواها .. قبل وفاه الوالده بجم شهر كان اهوا حاس انه يبي يموت . فدق على اخوي من ابوي الكبير وقال له جيب امك ام فلانه . و تعالوا البيت ضروري .

و بالفعل امي الله يرحمها . راحت مع اخوي . وقعد يبجي ويـتأسف على الامور اللي صدرت منه بعد وفاه ابي . و على كلامه اللي قاله ..

هذا كان من سنه .. الحين امي توفت واهوا للحين موجود مع ان عمره طق 76 سنه ! :) بس يا الله الله يخليه حق عياله الصغار ومرته .

المهم .. راحت اختي اللي اكبر مني بسنه ( غير متزوجه ) مع خواني وخواتي من ابي وزوجه ابي الاولى راحوا حق بيت عمي ...

وصارت هوشه

ومن ضمن الكلام يسألون اختي الكبيره .. ها فلانه ما جاها شي ؟
ما حملت ؟ ما صار عليها شي ؟ما تتعالج ؟ طبعا اختي الكبيره ردت عليهم وقالت لهم لا بعد :)

تقول اختي تضايقت حيل من كلامهم وتلميحاتهم !! و جرأتهم الكبيره في طرح السؤال :):) قلت لها عادي ما فيها شي ... طنشيهم ..

المهم تهاوشوا على موضوع ثاني غير حمالي من عدمه ... تعرفون جمعه حريم لازم تصير هوشه

الحمد الله اني ما رحت ...

اختي من ابوي تقول .. يا بنت شفت امج الله يرحمها تهبل بالحلم . و عطتني دراعه او ثوب وقالت هذا حق فلانه ( لي انا ) .. وتفسير الحلم ان بيجيني بنت :) قلت لها ان شاء الله ليش لا .. و ما خلتني الا لما حلفت لها ووعدتها بالهديه لو صج حملت وجبت بنت ...

ونفس الشي اختي حلمت ان امي تعطيها بنت صغيره .. وتقول هذه بنت فلانه ( بنتي انا )

وايد من خواتي قالوا لي نفس الحلم والكل يقول والله بتحملين و تجيبين احلى بنت :) وانا اقول ان شاء الله ....

والله يا بنات الحين صج قاعده اضحك بس عيوني كلها دموع ...

شهر 9 راح يصير لي زواج سنتين .. اللي تزوجوا قبلي صاروا حاملين بالبيبي الثاني وانا بعدي .. اختي اللي اصغر مني اللي تزوجت بعدي ب 3 شهور .. عندها ولد و الحين ولدها الثاني على وصول شهر 11 الله يستر عليها ويهدي لها زوجها يارب ...

مداومه على الصلاه و الدعاء .. وقراءه سوره البقره و الاستغار . وادعي بكل صلاه .. لي و لـ أربع من صديقاتي و لجميع المحرومات .. وقول يارب ترزق كل محرومه يارب .

والله يا بنات .. الحين كل ما احد يسألني عن الحمل احس بغصه واحس ان ودي الارض تنشق وتبلعني مو قادره ... مره انهرت لما كنت عند بيت اخواني . و كان في وحده تسألني على موضوع الحمل ... و قطت كلمه كبيره ( تعرفون الحريم الكبار ) ... رحت الغرفه وحبست نفسي و قعدت ابجي ..

وجت وراي اختي من ابوي تقول .. شفيج لا تزعلين .. مو قصدها .. و كانت تبي تطلع تطرد الحرمه . بس انا ما رضيت قلت لها حرام خليها ...

قبل شوي دشيت موضوع .. وحده كاتبه عن ان التأخر في الحمل فيه فوايد انه يقرب الوحده من الله . ويخليها دائما تسوي الطاعات و العبادات ... وعشان تعرف قيمه الابن اذا جاء ... :)

حتى جمعات الاهل صرت ما اروح لها .. لما يدقون لي يبون يروحون بيت عمي او بيت احد من اهلي اتعذر اني بطلع مع زوجي . او قااعده انظف . او ما لي خلق بنام .. او مرات اقول مبارك ما يرضى اروح مكان من غيره ! يعني اي عذر و السلام ...

بنت بنت عمي كانت تعالج معاي . ما شاء الله احملت بتوم صبيان . و الحين اهي في الشهر التاسع الله يقومها بالسلامه ... وكل شوي امها بنت عمي تسأل اختي الكبيره اللي ماخذه اخوها . تسألها عني . ها حملت فلانه ؟ ما جاها شي ؟؟؟

اختي الكبيره تقول : اقول لهم ما ادري . لو حملت بنسمع بالخبر . تقول ما اعطيها مجال تكمل بالأسئله لانهم حيل حيل فضوليين ...

هذيج المره يوم رحنا نخطب حق اخوي ( اللي عرسه شهر 11 ) .. رحت انا و اختي شقيقتي و ثنتين من خواتي من ابي وزوجه ابي ... ( اخوي متقصد ياخذني انا واختي لانه ما يثق براي خواته فقط ) يبي يسمع الشرح بالتفصيل . و الوصف بالتفصيل مني ومن خواته ..

المهم رحنا خطبنا بنت الحلال ... انصدمت ان اخت البنت . نفسي لها الحين سنه ونصف ما عندها عيال . و قعدت تسولف . وتضحك من الموضوع ... وانا اضحك معاها ... وله تدعي لنا ام البنت بدعوه خلت عيوني تنترس دموع بس زين مسكت نفسي ما بكيت .. ومرت ابوي تقول آمين ..

يا حلو مرت ابوي .. دائما تدعي لي . وتقول يارب يفرح قلبج بالذريه الصالحه ...

اختي الكبيره توها ردت من العمره ... تقول دعيت لك يا بنت . وقلت يارب انك ترزق فلانه بالذريه الصالحه ... وجابت لي ماي زمزم .. وملفع هديه ...

ان شاء الله ان شاء الله برمضان انا بروح العمره .... بس ادعوا لي ان زوجي يرضى .. و الله يهديه ونروح :)

على فكره الدوره موعدها 24 / 8 و قاعده احس فيها .. تعرفون الدوره لها علامات مميزه ... واللي مثلنا يحس فيها من غير ما تجي

هذه اخباري .. يا الله شنو اخباركم .. ؟؟