هذي قصة اخوي وانتوا احكموا والي عندها شور لاتبخل علينا

السلام عليكم ورحمة الله وبركاته

اول شي الحمدلله اخيرا تفعل معرفي واحب اقول لكم اني كنت من زمان اتمنى اشارك معاكم واقول للجميع كل عام وانتوا بخير

للاسف اول مشاركه لي هي مشكله او قصة زواج اخوي الله يعينكم بقولها لكم وربي يشهد ماراح اقول الا الصدق وانتظر منكم ارائكم

اخوي هذا الكبير في الاولاد تزوج بنت عمتي وعمره 25 بعد ماتوظف وهو تزوجها لانه كان يحبها من زمان ويتمناها بس هي ماكانت تعرف طبعا لانها عايشه من زمان بتبوك عشان اهلها هناك عايشين واحنا عايشين في الرياض

المهم تزوجها وكان مرررره مبسوط وهي كانت مبسوطه معاه ومااظلمها هيه مرره طيبه المهم ربي رزقهم بطفلين بس المشكله انها كانت دايم تروح عند اهلها من غير سبب وتجلس عندهم على الاقل ثلاث شهور واحيانا ورب الكعبه تجلس ست شهور يعني بعد ماترجع مع اخوي الرياض تجلس شهرين والا ثلاثه وبعدها ترجع لهلها تقول ليش يوديها اخوي لانها تقلب حياته فوق تحت اذا ماودها يعني لاتطبخ ولاتهتم في البيت ودايما زعلانه ومعصبه وهو مو عشان اخوي لا وربي بس انا بقول الصدق هو مرره يحبها واكثر من مره غير الشقه والاثاث عشان خاطرها لانها كانت تقول العيب من الشقه والمشكله لما تكون هنا في الرياض اخواتها الي اكبر منها ومتزوجات يجونها الشقه مع اطفالهم ويجلسون عندها احيانا لمدة اسبوع واخوي ساكت ومتحمل وفي الاخير كلم ازواجهم ولاكن مافيه فايده وكلم زوجته وفهمها انها تتفاهم مع اخواتها على الاقل مايجون وقت الدوام ويجون اربعاء وخميس بس مافيه فايده

وتخيلوا اذا جت وحده فيهم وقالت لها مااعجبتني شقتك تتغير نظرتها للشقه يعني اول معجبتها والحين تقول لاخوي ماابيها غيرها وهالكلام ينطبق على الاثاث

ماعمرها صامت رمضان مع اخوي الا مره وحده خلال خمس سنوات من تزوجوا دايم تروح عند اهلها والله كل الي يعرف اخوي من قبل مايعرفه الحين من كثر الهموم الي فحياته كان مرره يحب الوناسه ويحب الضحك الحين والله اغلب وقته ساكت ولايتكلم ولايحب يطلع مو مصدق انه يصير فيه كذا والمشكله مرره يحبها

اخر مره قبل رمضان هذا جت امها عندها الي هي عمتي زياره وجلسوا عندها يمكن اسبوعين قبل رمضان ولما جت بتروح لتبوك قالت امها لاخوي خل زوجتك تروح معانا تصوم وتعيد معانا واخوي رفض وقال مستحيل انا محتاج لزوجتي وفرمضان خاصه وزعلت امها وسافرت والبنت كمان زعلت ونكدت على اخوي وجلست كل الوقت بكا وتقول له انا ماابغاك طلقني وكبرت السالفه لدرجة ان الجيران صاروا يسمعوا صراخها واخوي مو مصدق ليش تسوي كذا المهم لما شافها كذا اخذها ووداها عند اهلها وكلم ابوها واخوانها وشرح لهم كل شي ابوها رد على اخوي وقال له انصحك تتزوج غيرها لاتضيع عمرك معاها يقول اخوي انصدمت من رده انا كنت انتظر منه ينصحها او يقول بكلمها وبتفاهم معاها

طبعا اخوي وداها قبل رمضان بيومين ومن يومها للحين ماكلمها ابد بس هي بعد العيد بيوم ارسلت له رساله على جواله تقول له طلقني انا ماابغاك انا مسحوره ومااقدر اعيش بالرياض ولااقدر اطلع من تبوك واذا جيت عندك مااعرف وش يصير لي بس اكون مررره تعبانه طلقني والا خلني عند اهلي وتزوج غيري والله يسعدك


اخوي ارسل لها اذا انتي مسحوره انا مستعد اني اعالجك لو في اخر الدنيا وبداية الدوام بأخذ اجازه واجي اخذك ونروح اي مكان ندور العلاج

هي ارسلت له لا ماينفع خلاص تزوج والله يسعدك



واخوي من وقتها مو عارف وش يسوي مصدوم منها ومل من كثر مشاكلها ويحن ويشتاق لاطفاله


اتمنى يااخواتي الي عندها راي تقوله والله والله هذي قصة اخوي ومو من نسج الخيال والله انه واقع


واتمنى تدعون له وكمان ادعوا لي اني اتزوج :35: