هذي قصة ولادتي بكرية.. مع نصايحي

السلام عليكم:27:

كيفكم ياكروشات وخاصة البكريات منكم

الحين اشكالكم كذا:44: تنتظرون لحظة الولاده

كنت مثلكم ... واليوم جايتكم بقصتي ...


طبعا انا عديت التاسع بكم يوم وكان عندي موعد مع الدكتوره

شافت السونار وقالت لي لازم اولدك الحين بسبب الخطر على الجنين لو بقى اكثر

وقررت لي تحاميل طلق صناعي:44:

انا خفت على البيبي ووافقت

قالت اطلعي التنويم الحين !!!! قلت لاااا بجي بكره ودي انحاش :hahaha:

قالت اوك

رجعت البيت و:icon33::icon33: ومشاورات لمن قررت اتوكل على الله واروح

طبعا دخلت المستشفى الساعه سبعه الصبح

وانا ارجففف خوووف وقلق وكلش

استقبلوني وهاتك يااجراءات

الحقنه الشرجية وتخطيط الطلق ووو

مرت الدكتوره تقريبا سبع ونص وقاست لي قالت الرحم فاتح 2سم

انا استانست وارتفعت المعنويااات

واعطتني التحميله

وجلست اقرا اوراد الولاده وخاصة اللي وصى فيها ابن عثيمين

ومعاي عسل اصلي مخلوط بمويه وحبة سوداء

وبدا الانتظااااار

الى العصر ثم بدا الالم يزيد ويزيد وماجت الساعه 12 بالليل الا وانا منتهيه

طبعا الم يجي ويروح وحقيقه تحتملينه مع الصبر والدعاء

لكن اللي ذبحني التحطيم لاني كل ماقلت اكشفوا كم فتح الرحم قالوا لي

بدررري عليك انتي بكر

وجلست امشي ساعه الا ربع ثم زاااادت حاجتي للحمام اكرمكم الله الى ان نزلت المويه

والسداده وزاد الالم ..

رجعت اكمل مشي لكني مااقدر كنت انتفض

وعلى السرير اغفو بين كل طلقه وثانيه

واتأوه بين الطلقاات واصحى امسك على السرير بكل قوتي

الى الفجر .. دق زوجي قلت ولاااحد سأل عني !!!

عصب وجاء للمستشفى وتخاصم مع السسترات

وهما يقولون حنا عارفين ان لسا ماعندها حالة ولاده

مع اني قلت فيه مويه نزلت بقدار بيالة شاهي تقريبا قالت السستر عادي

قلت التحميله طاحت قالت عادي بكره نديك غيرها :44:

يعني ماتجاوبوا معايه

المهم بعد الخصام جات الدكتوره تقيس الرحم قالت

واااااااو 6سم

وعلى غرفة الولاده

وبدات الموال الثاني الطلق يزيد وانا بدات افقد قوتي

لاني لافطور ولانوم زين

وعلى عشره شبكت الطلق بالمغذي واللي سار ان الطلق متواااصل

ولكن والله العظيم يااخوات مع الادعيه تتجاوزين الالم

وقول ياحي ياقيوم برحمتك استغيث

والمساج يعني السستر كانت تسوي مساج لظهري رووووعه وتدعي لي

الله يجزاها الجنه مرره حنونه

وزوجي برى في الانتظار ويدخل بس يذكرني بالادعيه

الساعه 12 الظهر قالت الرحم 10 سم وادفعي مع الطلقه

وللاسف دفعي ضعيييف واحيانا خطأ

تقريبا جلست ساعتين بس ادفع:44:

لحد مااضطروا سحب البيبي بالجفت والحمد لله على السلامه


النصااااايح

1/ الاذكار والتوكل والبعد عن الصياح والشتم وانتي الخسرانه ان صارختي

2/ فك المويه والكشف مايؤلم ولا يجي شيء بالنسبه للطلق والمه يعني

ساعتها ماتحسين بالالم البسيط

3// العسل الطبيعي ممتااااز والرطب كمان

4/ اختيار المستشفى ضروووري حتى لو تعبتي مره تطلبين ابرة الظهر

5/ تعلمي طريقة الدفع واعملي تمارين لتقوية عضلاتك من تحت:35:

6/ حاولي تجلسين في المستشفى قدر ماتقدرين لان البيبي متعب اذا طلعتي

وسار ينام معاك


ويارب يفرج عن البكريات وغيرهم :27: