هذي قصة ولادتي واهم الملاحظات بالتاسع

الحمدلله يابنات الحين لي 9ايام من ولدت
جبت ولد الله يحفظه لي ويجعله من الصالحين وهذي رابع ولاده لي ولله الحمد
ولاني احبكم واستفدت منكم كثير حبيت اكتبلكم قصة ولادتي مع الفوايد اللي استخلصتها عسى اكون رديت شي من جمايلكم علي


من دخلت التاسع صار عندي خوف من الطلق والولاده فأخذت بكل الاسباب اللي تساعدني ع ولاده سهله وسريعه بإذن الله وكله طبعا تسهيل من رب العالمين واللي عملته مجرد أسباب مع رجائي ان الله يوفقلي الاسباب ويسهلي ولادتي 

أول الاسباب كان الاكثار من الدعاء وطبعا الدعاء التجأتله من بداية الحمل 
وهذي بعض الادعيه اللي كنت ارددها بالشهر التاسع و كنت ملازمتها بكل وقت بالذات اوقات تحري الاستجابه (بعد كل فرض_بين الاذان والاقامه_وقت نزول المطر_...الخ)
اللهم اجعل ولادتي بردا وسلاما علي وعلى جنيني كما جعلت النار بردا وسلاما على سيدنا ابراهيم
اللهم ياخالق النفس من النفس ويامخرج النفس من النفس ويامخلص النفس من النفس خلصني
الله لا سهل إلا ماجعلته سهلا وانت تجعل الصعب بإذنك سهلا فيارب سهل ولادتي ويسرها لي 
اللهم حسن خلق جنيني وهون طلقه
سورة الزلزله
سورة مريم
سورة يس
سورة الشرح 100 مره <هذي وحده قالتلي عليها وكيف انها اذا تعسرت بأمر قراتها 100 مره وتتسهل امورها ماشاء الله وفعلا اذا جينا لتفسير السوره فيها تصبير جميل جدا ' ان مع العسر يسرا فإن مع العسر يسرا '
طبعا مع وضع النيه بتسهيل الولاده وتيسيرها وبأن الله يرزقني ولد تام الصحه والخلقه بلا زياده ولا نقصان 

ولا تنسون بنات مع الدعاء لازم تدعون لانفسكم ان الله يعطيكم الصحه والعافيه والسلامه اثناء الحمل والولاده وبعد الولاده وحطو تحت بعد الولاده مية خط 
كم من حريم صابهم نزيف او امراض بعد الولاده لهالشي لازم نستغل الدعاء وندعي لانفسنا 
لاننسى الاستغفار والصلاة ع النبي يوميا اقل شي 1000 لكل واحد منهم
 
بنات انا يوميا الصباح اول ما أقوم احط نية لكل شي بسويه في يومي 
يعني مثلا اقول نويت بقراءة الاذكار والقران و التسبيح و الصلاة ع سيدنا محمد عليه افضل الصلاة والسلام بنية التحصين والتسهيل والسهاله لي ولزوجي ولأولادي واهل بيتي 
وبنية تسهيل حملي وولادتي وبنية ان الله يرزقني ولد صالح تام الصحه والخلقه بلا زياده ولا نقصان وبنية طرح البركة في زوجي ونفسي واولادي وكل ما رزقنيه ربي

وكل وحده تحط النيات اللي تبغاها 
والله يابنات اني من صرت احط النيه لكل شي راح اعمله في يومي حسيت براحه وبالبركه في بيتي واولادي
والحمدلله اللي وسعت رحمته كل شي


الان ببدأ بالاسباب الثانيه
كنت اشرب منقوع اليانسون يوميا لانه معروف انه يساعد ع تسهيل الولاده
وكثرت أكل تمر ومافي داعي اعدد فوايده كافي ذكره بالقران في قصة سيدتنا مريم
استخدمت خلطة الحليب وهي : كوب حليب _ ربع فنجان سمسم _ عودين قرفه _ 5اعواد قرنفل 
تغلى عالنار ثم تحلى بعسل 
وعند الشرب تصفى وتنشرب
هذي الخلطه من اول مادخل التاسع كل 4 ايام مره 
للعلم استخدمتها في حملي السابقبن وفعلا الحمدلله كانت سبب بإذن الله في التسهيل
الخلطه الثانيه وهي خلطة قمم التميز 
الوصفه عباره عن م ص من كل من:
كمون + ينسون + نينخه + شمر + حلبه + محلب + حبه سوداء(حبة البركه) تغلى عالنار مع كوبين ماء ثم تحلى بعسل وتصفى وتنشرب 
هذي الخلطه تستخدم بعد اسبوعين من التاسع وللامانه جربتها مرتين فقط 
والشي الاخير اللي عملته من دخلت التاسع هو التمارين المساعده ع فتح الرحم
أول تمرين هو الجلوس كما الجلسه بالحمام العربي الله يكرمكم دقايق ثم توقفين دقايق وهكذا ممكن تمسكين بطاوله او كنبه تساعدك عالوقوف والجلوس
التمرين الثاني هو وضعية السجود مع رفع المؤخره اعلى من مستوى الراس 
اما التمرين الثالث هو الجلوس عالارض نفس تقريبا الجلوس متربعه بس بدل ماتدخلين رجولك ببعضهم خلي باطن القدمين متواجهين مع بعضهم مع الضغط عالركب شوي لتحت كأنك بتفتحين ركابك
ان شاء الله فهمتوا علي للأسف انا بكتب من الجوال لهالشي ماقدرت احط صور توضيحيه

واخر تمرين هو المشي السريع من بداية التاسع نبدأ ب10 دقايق ثم نتدرج ونزيد كل يوم كم من دقيقه لحد نهاية التاسع نوصل للساعه 
ويابنات لاتمشون اكثر من ساعة ترى الارهاق والتعب النفسي يأثر عالجنين ونموه

الحين نجي للمهم 
بعد ماكملت اسبوع من التاسع نزل مني شوية دم بعد الجماع مع ألام نفس الطلق بس مو منتظم مدة 4 الى 5 ساعات
رحت للدكتوره كشفت قالت مفتوح 2سم بس قالت هذي مانعتبرها ولاده لانك والده من قبل فطبيعي عنق الرحم يكون مفتوح 
كنت متأمله اني أولد بسرعه لاني تعبت من الثقل وخلاااص اريد اولد بأي طريقه 
بس للاسف يمر يوم ورا يوم مافيه ولاده حتى وصلت للاسبوع الثالث من الحمل قلت بروح للدكتوره بالخاص تكشف علي لان حاسه الطفل نزل كثير لتحت وآلام قويه احسها من تحت كأن عروق او اعصاب بتنفك او تتكسر من الضغط اللي عامله الطفل 
المهم رحت وطلع عنق الرحم مفتوح 3سم 
بصراحه كنت متأمله انه يكون أكثر بس هي قالتلي الحلو ان عنق الرحم لين وممكن اذا جا الطلق ع طول للمستشفى لانه راح يستجيب وينفتح بسرعه وقالتلي لاتنتظرين يشتد الطلق بس اول مايبدا معك ع طول للمستشفى
اليوم الثاني جاني طلق بس خفيف قلت اروح للمستشفى امكن فتح الرحم اكثر رحت للمستشفى للاسف طلع نفس الشي 3سم بس رفضوا يطلعوني لان 3سم ترقيد ع طول بحكم ان معي ولادات من قبل طبعا انا رفضت ومن هنا وهنا لحد ماوقعت ع ورقة اخلاء مسؤوليه وطلعت من المستشفى 
اليوم الثاني رحت للدكتوره اللي بالخاص قلتلها ان معي دم واني تعبانه خلاص اريد أولد الالام اللي تجيني واحس مفاصلي بتنفك كنت مره تعبانه منها وظلبت منها تعملي تحريض
فعلا عملتلي تحريض الصباح وقالت صار بين 3 و4 
وبعد المغرب عملت تحريض مره ثانيه وصار بين 4 و5وقالت المفروض خلاص يجي الطلق وتروحين المستشفى للولاده
هذا كله و الطلق عندي بارد ومو منتظم
قالت الدكتوره الرحم عندي كل ماجيتي تزيد نسبة ليونته بس مايشتتغل عالتوسع
وقالت ان الليونه هي المهمه لانها تساعد ع فتح الرحم بشكل سريع اذا جا الطلق
رجعت البيت بعد العشاء ومنتظره يزيد الطلق ابد ولا زاد
دهنت بزيت زيتون مع حبة البركه وجلست بحمام حار ولا زاد الطلق
الساعه 9 قالتلي وحده من قرايبنا اللي فيك بروده خذي فكس مع فازلين وادهني ظهرك وجنوبك واقدامك وتدفي زين 
سويت اللي قالته ودهنت بالفكس والفازلين وعملت قربة ماء حار وحطيتها ع ظهري ومره تحت رجولي وانا لابسه الدلاغ بعد ربع ساعه بدا الطلق يزيد ويزيد 
لحد ماوصلت ساعه 11 صار كل 7دقايق بس قوته متوسطه ومحتمل جدا يعني اللي يشةفني عادي مايقول هذي فيها طلق
رحت المستشفى س12 والساعه 2ونص ولدت يعني بعد ساعتين
للعلم بنات الطلق لما اشتد وصار غير محتمل كان لمدة ساعه فقط ماشاء الله وانا طول الوقت وانا ماخلي ذكر الله والادعيه واستخدمت تقنية التنفس اثناء الطلق هو مايخفف الوجع لا بس يحسسك ان الوقت يمشي بسرعه كنت بالطلقه الوحده اخذ 3أنفاس وبكل نفس كنت اقول بنفسي خلاص هانت بخلص وفعلا كان الوقت يمشي بسرعه لحد ماولدت وجبت احلا عبدالله 
الحمدلله حمدا طيبا كثيرا مباركا فيه

وهذي هي قصة ولادتي 

نجي للمختصر اللي حبيت اوصله
ان الاسباب اللي اخذتها ساعدت بإذن الله في تليين الرحم مو فتح الرحم او تعجيل الولاده
وهذي المعلومه اللي الكثير فاهمينها غلط
ترى في بنات خلقه عنق الرحم عندهم لين والبعض عندهم شديد وهذي الفئه هي اللي تتعسر بالولاده لان الﻻحم ماينفتح بسرعه
لهالشي ناخذ بالاسباب اللي تساعد ع تليين الرحم حتى تتسهل الولادة بإذن الله الواحد الاحد 

بالاخير اتمنى تدعولي ان الله يسهل أموري ويوفقني للي فيه الخير ويطرح البركه في اولادي ويجعلهم من حفظة كتابه الكريم ومن عباده الصالحين البارين

والله يسهل على كل حامل ويرزقها ولاده سهله ميسره في عفو وعافيه ويرزق كل محرومه الذريه الصالحه يارب