هرمون الحليب ومعاناتي مع دكتورة في الحبيب+نصائح

السلام عليكم
ارحب فيكم جميعا وحده وحده وترى أنا عضوة هنا من مبطي (( من زمان )) ويمكن مع اللي قصوا شريط المنتدى (( شوفوا تاريخ التسجيل)) ،، لكني كسولة أشارك معكم بس أتابعكم واستفيد من تجاربكم ولو عندي شي يستاهل كنت قلته لكم
وأنا اليوم جاية أقولكم على تجربتي وأتمنى تفيدكم لأنه ضاعت سنة من عمري وأنا نايمة على أوذاني وبعدين أشوف أسألة كثيرة عن هرمون الحليب وما أحس أحد جاب الاجابات الشافية
وما كتبت مشاركتي هذي عشان أشهر بأحد أو أفضح لا أنا جاية أقولكم عشان تحذرون وتبعدون قبل تطيحون طيحتي ............. اها بس أخلصي علينا

طيب ولا يهمكم ........... من سنة وفي مثل هذا اليوم توجهت أنا صبحا لمركز الدكتور سليمان الحبيب للدكتورة (م) في الساعة السابعة (( الله يستر حاسة فيه أنفجار بيصير )) ................عدلي أسلوبك تكفين
والله الانفجار بيصير في راسي
وانتو تقرون ركزوا على الكلام اللي بين الاقواس



ندخل بالجد كنت رايحة لاني متاخرة بالحمل سنة ونصف المهم أجرت بعض الفحوصات وطلع عندي هرمون الحليب ضاربه اسلاكه 2500 وزيادة عملو ليه رنين مغناطيسي ، قرت لي النتيجة وقالت لي بالحرف الواحد (( الحمد لله كل شي سليم ))1 طبعا تنفست الصعداء ووصفت لي (( الدوستنكس ))2 حبتين بالاسبوع وقالت استمر 3 شهور عليه بدأت العلاج وحصل حمل مباشرة طبعا تروعت لأني أبلع هالحبوب وأنا ما أدري
جيتها أركض قالت((ما فيه مشكلة وقفي استخدامه ))3 قلت طيب والهرمون قالت ما فيه مشكلة
وأجي أتابع عندها في الاسبوع الخامس بعد ما طلعت منها نزل الجنين رجعت لها قلت إيش عن هرمون الحليب قالت (( خلاص دام حصل حمل ما فيه داعي ))4 طبعا وقفت العلاج (( وما حاولت تدرس معي أسباب الاسقاط ))5....... فيه معلومة ما قلتها عن الدكتورة م إنه نفسها في خشمها وتحس اللي قدامها ولا شيء مع إنا بالعلم والخبرة والشهادة أحسن منها وكنت في يوم من الايام أحد طالبات الطب بس الظروف اوقفتنا والحمد لله على كل حال
جلست فترة فيه ناس قالوا لي لازم تتابعين الهرمون لأنه بعد الاسقاط يرتفع وفعلا حللت طلع طبيعي وحللت مرة ثانية مرتفع شوي مرة ثالثة ورابعة إلخ في طلوع ونزول وبصراحة محسوبتكم موظفة ومنطولة نطلة معتبرة في أحد القرى اللي مالها وجود على الخريطة يعني على الله ثم على المعمل الموجود في القرية وفي هالاجازات
رحت أمس عند دكتورة أخرى في الحبيب الدكتورة ( ز)
مع إني كنت ناوية أروح مكان غير هالمركز بس قلت الملف عندهم ومتابعين حالتي خل استمر معهم وأمري لله
وهذي نصيحة مني لكم يا بنات لا تبدين بمكان وتنتهين بثاني ولو اضطريتي اطلبي نسخة من ملفك
المهم دخلت عليها ما شاء الله وجه طلق وابتسامة وتجاوب عن كل تساءلاتك وبعد عمري تقولي المصطلحات بالانجليزي وبالعربي مع إني ما علي قصور بس ودها إنك تفهمين شوفوا وش قالت لي
(( عندك تضخم في الغدة النخامية ))1 طبعا انفجعت لأني طول هالوقت ما أعرف قالت لي ليه الدكتورة م ما قالت لك ولا جابت خبر
قعدت تهدي فيني وتهون الموضوع علي ...قالت لي(( لما حملتي المفروض أخذتي الدوبرجين لمدة 3 أشهر الدوستنكس ما ينفع أبدا أثناء الحمل ))2.3 ،(( سألتني بعد الحمل عاودتي العلاج)) 4 قلت لا قالت المفروض ترجعين تستخدمين العلاج على الاقل سنة أو سنة ونص أنا عندي ثنتين نفس حالتك تابعوا معي وانكحت التضخم بعد ما انتظموا على العلاج (( يعني لو بدأت العلاج كان قدني تخلصت من هالهرمون )) ،، سألتني ((عن أسباب الاسقاط وهل حاولت أبحث ))5 طبعا الاجابة حاولت بس ما لقيت تفهم من الدكتورة م فحسبنا الله ونعم الوكيل

وهذي مجموعة من النصائح
1- هرمون الحليب له أسباب لازم تعرفي السبب وتبحثي عنه والحمد لله له علاج يخلصك منه إلى الأبد إن شاء الله بس توكلي على الله ولا تفكري كثير
2- الهرمون لا يمنع الحمل تماما يعني ممكن تحملي اثناء العلاج ويستمر حملك بإذن الله بس إذا أهملتي يؤدي إلى الاسقاط لا سمح الله
3- الدوبرجين ينفع في الحمل لكن الدوستنكس لا يناسب للحامل واللي مش مانعة الحمل يناسب أكثر للي ما تزوجت أو اللي ما نعة الحمل لأنه أقل آثار جانبية
4- اعقلها وتوكل توكلي على الله وابحثي عن الدكتورة الشاطرة لازم تبحثي عنها ولو دفعتي أموال الدنيا كلها لها ولو سافرتي لها بآخر الدنيا
5- لما تشوفين الدكتورة ما تعطيكي وجه أو شايفه نفسها زيادة عن اللزوم غيريها مباشرة قبل لا تندمين
لأنه عندها نقص تحاول تعوضه بغرورها ومو شرط إن أي استشارية شاطرة فيه استشاريات ماعندهم من الطب الا شهادته أحيانا تكون الاخصائية أفضل منها وأكثر خبرة

اتمنى تكونوا استفدتوا

ملاحظة يا بنات أنا عارفة إنه كثير منكم عرفوا الدكتورتين خاصة اللي يراجعون في المركز
أنا كتبت الحروف عشان لو وحده أول مرة تروح للمركز تنتبه لبداية الاسم