هــــذي قصة مرضي بالتفصيل والله مععععععجزه

بسم الله الرحمن الرحيم
السلام عليكم ورحمة الله وبركاته... كيفكم حوائيات
بصراحه لعيون العضوه (العائده ــ لحواء) ولعيونكم تراجعت عن كلامي وباكتب قصة مرضي لكم والله ثم والله أني صادقه بكل كلمه وأتمنى منكم الدعاء فقط مابي لوم و عتاااااب رجااااءاً
يكفي موضوعي السابق ردود تجيب الهم بس قصتي للعظه والعبره ...
بنااات والله أنتوا في نعمه عظيمه بس كثير مو حاس واللي بيصير لها مثل اللي صار لي أكيد بتقول يوووووووه وش كثر إحنا غافلين
كل وحده تحط نفسها مكاني ولها أن تتخيل شكل المعاناة تخيلي كل ماشربت نقطة مويه سيده عالحمام ( الله يكرمكم) وتاكلي لقمه طيران عليه يعني إسهال مزمن كانت البدايه في المرض ألم في فم المعده بس حاطه يدي على المكان وأضغط عليه نفسي أدخل يدي وأسحب المعده وأخرجها من بطني والعياذ بالله بعدين قطرات دم مع البراز وانتو بكرامه وكان إسهال شدييييد مااذوق لقمه إلا على طووول حمام وكانوا أهلي ملاحظين هالشي بس كنت أنا وزوجي مخبين عليهم ومتهاونين بالمرض حتى المستشفى العسكري اللي كنت أروح له مره يقول جرثومة معدة ومعك بواسير وكانوا يدخلوني على طبيب عام ومره يقولوا دوسنتاريا وخذي من الأدويه وإبلعي وماأدري وش مخبي لي القدر
وماكان في نتيجه كل مالو الامر يتدهور وكنت أسمع كلام الناس اللي تقول أكلي ثوم تقضي على الجرثومة واللي تقول زبادي واللي تقول وصفات شعبيه وانا مع الخيل ياشقرا صايره فأر تجارب وسته شهور وانا مراجعات لهالمستشفى ولافي فايده حتى الإسهال ماتوقف ونزل وزني 13 كيلو بعد ماكان جسمي يفتح النفس وهذا طبعاًبعد ولادتي ب8 شهور المهم زوجي وقتها حس بالخطر والكل قاعد يخاصمه ليش مايوديني مستشفيات برا بس يبغون يعرفون وش هالمرض بس والله شهادة حق إنه ماقصرزوجي علي مستشفيات حكوميه وخاصة بس في الاخير فيه ناس مدحوا له مستشفى عسكري ثاني مع العلم إني ماخليت طب على وجه الأرض ماحاولت فيه من الطب الشعبي والمستشفيات والشيوخ وماكنت أتأثر والشيوخ أنفر منهم تصدقون حتى الكوي إكتويت في بطني 4كويات لعل وعسى يوقف الإسهال والدم بس مافي نتيجه ولما رحت للأستشاري اللي مدحوه لنا سوا لي منظار والله لايوريكم أنواع الصياح والبكا المهم قال لي معك قولون تقرحي مزمن ___ خير إن شاء الله وش ذا؟ قال الأمعاء كلها جروح وتنزف دم وأنواع الجروح فيها وتراني ماكنت أمشي على رجولي كانوا يشيلوني بعربيه كانت مأسااااة الله لايعيدها
المهم الدم من كثر ماراح صارنسبته 6 وكنت أدوخ ماأقدر أوقف وكانت الحراره ماتنزل 39 بس طايحه ع الفراش وبنتي ياعيني جنبي صغيره سنه ونص زوجي يقول أوديك المشفى أرفض لأني مو مستوعبه برجع للحياة ليش أتعب زوجي خلاص حاسه بالموت وكل هذا كنت أمثل ع أهلي أقول إن شاء الله بخير مابيهم يقلقوا ويسووا لي قلق انا اللي فيني مكفيني المهم إضطر الأمر يتبرعوا لي بدم فما كان عندي إلا زوجي تبرع بكيسين دم وعلى هالحال سنتين وأناأراجع المشفى وخذي مواعيد وإذا صارلك شي تعالي بدون موعد هذا غير الحميه في الاكل اللي وصوني عليها لأني بطني مايتحمل
وتخيلوا أكل صحي مثل الفواكه والخضروات والحليب واللبن ممنوع+ الدم اللي ينزف+الهم والعذاب والألم + الوسوسه بالموت +التعب والإرهاق من قل النوم (لأني طوال الليل ماكنت أنام كل نص ساعة في الحمام) = جسم هزيل لايستطيع الحركه – وهن في العظام والاسنان لدرجة أحس أسناني بتسقط حتى الهواء يوجعني فيها —سقوط الشعر—وجه يحمل كل معاني فقدان الحياة
وكنت لما أشوف الناس على عافيتهم وأنهم يناموا الليل براحة بال وطمأنينه أقول يارب متى أصير مثلهم متى أنام الليل تعبت من القومه كل إشوي للحمام ولما ياكلوا ويشربوا كنت في نفسي أقول سبحان الله اللي جعل لهم بطن يتحمل مايقوموا على طول الحمام والله يابنات موحسد بس كنت أستغرب الوحده بعافيتها وماتشكر الله وماهي حاسه بالنعمة العظيمه اللي هي فيها !! وفعلاً الواحد مايحس بقيمة الشيء الا إذا فقده !! يعني مهما وصفت ماراح تحسوا بحجم المعاناة بس الله يبعد عني وعنكم وعن كل مريض الشر ويتم علينا نعمته قولوا آمين

المهم كنا مره من المرات في المشفى عندي موعد ولا شافي الا الله وحده سبحانه جلّت قدرته وعظم ثناؤه سبحانك ربي ماقدرناك حق قدرك..
فكان زوجي من كثر مو شايل همي يشتكي لأي واحد واقف عند العياده وفي كل موعد يسوي كذا ويفضفض ياعيني المهم فيه واحد الله يجزاه خير وصف لنا شيخ وأعطانا رقمه والحبيب سيده من المشفى على الشيخ والمشكله وقتها ماقال لي فدخلنا مكان ووقفنا عند بيت ونزل وخلاني وانا ماسألته بس حسيت فيه شي كان يروح ويجي ويقول فيه رجال هنا أبغاه ومن الساعه 5 العصر الى الساعه9 في الليل وانا في السيارة و:angry2: وش هالرجال اللي 4ساعات واقفين عند بابه؟؟ بس على المغرب كنت أبي الحمام ورحنا في مكان و تيممت وصليت وبعد ساعه تقريبا أبغى الحمام ماأقدر أتحمل ولو جاني المغص ومارحت الحمام أعملها على نفسي وانتوا بكرامه شفتوا أنكم في نعمه؟؟ ويوووووه ياكثر ماعملتها على نفسي كنت في اليوم أغير ملابسي الداخليه أكثر من ثلاث مرات وكنت أدخل الحمام قبل الصلاة ولما أغسل وأبي أكمل وضوئي أرجع أدخل الحمام إسهال فظيع وعلى هالحال أغسل وارجع الحمام وكان يأذن المسجد ويصلون وانا في الحمام وكثير ماراح علي وقت الصلاة بس الله سبحانه يغفر لي
ودورات المياه اللي في الشوارع والأماكن العامه والمطاعم والحدايق كلها تشهد على وضعي لأني إذا طلعت بالسياره أضطر للحمام فأقرب مكان أبو الشباب يوقف إن شاء الله ع الخط السريع أهم شي ماأعملها في السياره ة والله معاناة
المهم نرجع للشيخ أدري دوختكم بس أنا أحب أذكر كل التفاصيل >>> تحب الهذره
فلما جاء دورنا قال لي إنزلي قلت وين قال الشيخ ينتظرك في الاول رفضت بس جلس زوجي يفهمني ونزلت عشان خاطره وترا من اول كنت ارفض أروح المشايخ كنت أقول حديث الرسول اللهم صلّ وسلم عليه ( يدخل الجنة من امتي سبعون ألفا بغير حساب

قالوا من هم يا رسول الله قال:

هم الذين لا يسترقون ولا يتطيرون ولا يكتوون وعلى ربهم يتوكلون "رواه مسلم)
وحتى الكي كنت رافضته بس أمي الله يهديها ويخليها لي إتفقت مع زوجي وخدعوني وودوني لحرمه تكوي قالوا لي بس بتشوفك :o
المهم نزلت للشيخ وقرا علي مثل كل الشيوخ اللي رحت لهم وتأثرت من القرايه مثل كل مره وفي نفسي أقول الحين بيقول معك عين وبيعطيني علاج واستخدمي السدر وماء زمزم وقولي الاذكار وإقري البقره و..و,,وانتهينا كنت غاسله يدي من الشفاء ماكنت مصدقه إن العين بتسوي فيني كذا كنت اقول هذا مرض وبموت منه بس سبحان الله هذا الشيخ جلس يسألني إذا إشوف أحلام معينه وحيوانات في الحلم إذا ...وإذا..وإذا وكنت أجاوبه وانا مستغربه كلامه بس تيقنت أن اللي فيني عين ومسّ والعياذ بالله وكان الله يجزاه بالخير مايثقّل علي من ناحية أقري أفعلي أغتسلي كان يهون الأمر علي وياخذني حبة حبة وكان يقول ترا يمكن يجيك شي يقولك لاتستمري في قراءة البقره والابذبح بنتك والابسوي لك يعني وساوس شيطانيه المهم وقتها كان الدكتور معطيني موعد للإسبوع الجاي عشان المنظار يبي يشوف الامعاء تحسنت أو لا؟ لأنه يقول إحتمال نشيل الأمعاء ونوصل المستقيم فأخذت علاج الشيخ واستمريت إسبوع عليه وكنت أصلي آخر الليل وأدعي وأطلب الله يخفف عني وبصراحه كنت أوقات من كثر التعب أتكاسل والشيطان يحبطني يقول ماإستفدتي شي من صلاتك وقراءة القرآن بالعكس الالم يزيد وأوقات أشجع نفسي بإن الله يحبني علشان كذا إبتلاني يعني مجاهدة للنفس غير طبيعيه والله يابنات ماكذبت عليكم إني صادقه بكل كلمه وربي شاهد على كلامي المهم جاء موعدي المخيف للمنظار ولازم قبلها أكون صايمه عن الأكل يومين بس عصاير وعند النوم حقنه شرجيه وقبل الموعد بنص ساعه حقنه ثانيه عشان تنظف الامعاء ويسهل دخول المنظاريعني مايكون فيها فضلات لزوم الكاميرا تصور الوضع داخل بطني وأنا شبه ميته بين يدين الدكتور المهم جاء الموعد ورحنا الصباح بدري كان يوم السبت ولما جينا قالوا الدكتور ماخذ إجازة إسبوع أنا وقتها :39: لكن ابو الشباب إلا يدخلني على المناوب بدل دكتوري وأعطاني موعد جديد للمنظار السبت القادم أنا وقتها :44: رجعنا البيت وكلي عزم على علاج الشيخ المهم إستمريت إسبوع على هالحال وحسيت فيه تحسن وفي ليلة السبت تعشيت هذيك العشوه المحترمه يعني مليت بطني وأخذت علاج الشيخ ونمت وفي الفجر صليت وأخذت علاجه وماكان لي طاري أروح الموعد خاااايفه من المنظار بس جبرني أروح قلت أنا تعشيت البارح والصباح أخذت عسل ليه ناخذ مشوار عالفاضي لأن المشفى بعيد قرابةساعه إلاثلث قال والله نروح وخليه يدخل المنظاروقولي صايمه قلت لاياشيخ يعني الدكتور أعمى ماراح يشووووف؟؟!!
ورحنا ياطويلات العمر وضبطنا الخطه وتوكلت على الحي القيوم في أمري سألني دكتوري:صايمه سويت الحقن؟ قلت: إيوه وانا خايفه
والله ودخل المنظار في البدايه وأنا أصيح وإشوي إشوي دخله كله وأنا كأنه مغمى علي ولما خلص قال ماشاءالله فيه تحسن أناهنا :)
قلت كيف يادكتورقال الحمدلله الجزء الأيمن من الأمعاء سليم والأوسط سليم بس باقي الأيسر والله طرت من الفرحه وأنا في نفس الوقت مستغربه وين راح الأكل اللي أكلته والله شي غريب قلت لزوجي شوف عظمت الله سبحانه بدأت في الرقيه والله أجل موعدي إسبوع علشان يفرحنا ويبشرنا بالخير والله يابنات كلها من صلاة الليل والتوكل على الله والحمدلله الدكتور نقص جرعات الأدويه اللي كنت آخذ 30 حبه في اليوم نقصها تدريجي وانا الحين الحمد لله بخيييير لو إنو أتعب إشوي بس فرق السماءعن الأرض ويييييين كنت وييين صرت بس احمد الله سبحانه في أول الأمر وفي آخر الأمر لولا عناية الله ماتحسنت و مابي منكم الا تدعون لي بتمام الصحه والعافيه لي ولغيري من المرضى و لاإله إلاأنت سبحانك إني كنت من الظالمين ودعتكم الله