هـل أثـرت وسـائـل الـتـكـنـولـوجـيـا الـحـديـثـة عـلـى عـلاقـاتـنـا الإجـتـمـاعـيـة!!

هـل أثـرت وسـائـل الـتـكـنـولـوجـيـا الـحـديـثـة عـلـى عـلاقـاتـنـا الإجـتـمـاعـيـة!!!

بدايةً يا هلا ويا مرحبا ملااااييين باللي نوروا موضوعي بمرورهم حتى

لو ما ردوا!!!...

أتوقع كلنا ملاحظين كيف وسائل التكنولوجيا الحديثة بدأت تأثر على

علاقاتنا الإجتماعية...

مثلاً صارت مناسبة سعيدة عند أي وحدة من أهلي أو أقارب لنا

أو صديقاتي وأنا عندي الوقت والظروف مناسبة وأقدر أروح أبارك

لها وأهنيها وأحسسها أن فرحتها هي فرحتي...

لكن حضرتي مسكت البلاك البيري ولا الآيفون ولا الجالكسي

اللي هابين فيها هذي الأيام وطرشت لها رسالة مبروك يا فلانة!!!...

تتوقعون راح تفرح بالرسالة ولا بحضوري شخصياً فرحتها عشان

أشاركها الفرحة اللي هي عايشتنها وحضوري له دور كبير في رفع

معنوياتها يعني بمعنى آخر كل أحبابها حواليها والفرحة مش فرحتها

هي بس!!!...بالعكس راح تكون فرحتها أكبر وأحلى إذا شافت كل الأحباب

والأصحاب حواليها...

في البداية أحب أوضح نقطة موبايلي عادي نوكيا يعني ما أطيق استخدام

البلاك البيري ولا الآيفون ولا الجالكسي ويمكن بعد شوي يطلعون لنا

باونتي ولا كيت كات!!!...

أحس إذا عرفتي تستخدمينها خلاص راح تعيشين فيها الباقي من عمرج

عينج فيها 24 ساعة!!!...

أنا ما أنكر أن لها إيجابيات عشان ما تطلع لي وحدة تناقرني وأنا هدفي

من الموضوع واضح...

والأدهى والأمر تتصل عليج إحدى قريباتج أو صديقاتج وتقولج فلانة إذا

مش مرتبطة بموعد أو إذا فاضية راح نمر عليج نوسع صدورنا عندج

ومنها نتسلى ونعرف علوم بعض!!!...

طبعاً أنتي راح تفرحين بزيارتهن لج وراح تقولين لها يا هلا ويا مرحبا

ملاييين تنورين المكان وأنتِ صاحبة البيت ما يحتاج إستئذان حياج الله

في أي وقت...

وتقومين تزهبين الفوالة والقهوة والحلا شيء تسوينه في البيت وشيء

تطلبينه من برا عشان ما تقصرين في ضيافتج واستقبالج لضيفاتج...

دق جرس الباب والحلوات وصلن وطبعاً أنتي رحبتي فيهن ودخلتيهن

غرفة الضيوف عشان تاخذون راحتكن أكثر وتسولفن على كيفكن

وتضحكن براحة وسالفة من الشرق والثانية من الغرب من دون ما يعكر

جلستكن أحد...اتفقنا للحين!!!...

لكن الحلوات لما قعدن كل وحدة فتحت شنطتها وطلعت رفيق عمرها

البلاك بيري ولا الآيفون والبينغات شغالة وكل وحدة راسها في موبايلها

أياً كان نوعه!!!...

إنزين أنا عندي سؤال إذا إنتي بس حاضرة عشان تحطين راسج

في موبايلج ليش مكلفة على نفسج بانزين وطريق يمكن يكون طويل

إذا أنتي تريدين تدردشين دردشي في بيتكم ترا الحمد لله العالم

كلها عندها من هالأجهزة يعني مش حكر عليج أنتي وبس!!!...

بمعنى آخر الحمد لله الناس شايفة نعمة قبل ما تشوف موبايلج

وشو نوعه وأي إصدار!!!... يعني أتمنى أعرف شو هدف زيارة صديقتكن

أو قريبتكن اللي تعبت وهي ترتب مكان الجلسة وتجهز الحلا بنفسها

وطلبت زيادة من برا!!!...

ليش ما اندعستي في غرفتج ودردشتي فيها على كيف كيفج!!!...

الصراحة أنا ما أمدح نفسي أكره أجلس مع أي إنسان حاط راسه

في موبايله ويدردش على كيف كيفه ولا كأنه جالس مع إنسان!!!...

إنزين آمنا بالله دردشي على كيفج بس لما تكونين ضيفة عند أي أحد

احترمي وجود الحاضرين وخلي عنج ترتيبات الحرب العالمية الثالثة

ونقاشج فيها على الموبايل ما دامج في وسط أوادم أقلها

احترمي نفسج واعطيهم شوي من وقتج الثمين!!!...

معقولة وصل حالنا لهذه الدرجة 24 ساعة عيونهم ما تفارق

شاشات موبايلاتهم اخذوها مني نصيحة ترا عيونكم راح تنبط

من كثر ما مركزين في هالشاشات وياليت المعلومات اللي توصلهم

فيها فايدة كلها إشاعات وافتراءات وسب وقذف وهتك حرمات خلق الله...

صح أختي الكريمة أنتي وموبايلج فقط في الغرفة وماخذة راحتج

بالطول والعرض لكن لا تجعلي الله أهون الناظرين إليك!!!...

حتى المعلومات اللي توصلج وهي في الأساس إفتراء على عباد الله

أو إشاعة لتشويه سمعة إنسان عايش في حاله لا آذاهم في شيء

ولا ناشبهم في ورثهم... تراج تتحملين سيئات كالجبال بقراءتج

لهذه الإفتراءات... والطامة الكبرى إذا نشرتيها!!!...

بس وصلت موبايلج خلاص وجب عليج نشرها ونسيتي

ميزان حسناتج وميزان سيئاتج أيهما يثقل ويزيد رصيدج فيه!!!...

الصراحة إذا جلست مع وحدة وطول الوقت عينها في موبايلها

صدقوني بس احتراماً لوجودها ضيفة عندي لكن في خاطري أمسك

موبايلها وأطيره لها لحد ما يصك في الجدار ويتكسر حِتة حِتة!!!...

عشان تتعلم الأدب والاحترام إذا جالست الناس وخالطتهم

تسوي لهم حساب واعتبار صاحبة السمو!!!...

كلها الدنيا عندها موبايلات وآخر الإصدارات بعد لكن يحترمون

وجود الأشخاص اللي قاعدين معاهم ينتظرون منه يكلمهم

ويشاركهم الحوار...

بس فيه ناس قمة في الذوق والرقي عندهم كل شيء له وقته ومن ذوقهم

ورقيهم الأخلاقي حتى لو جتهم مكالمة ما يردون عليها احتراماً للشخص

اللي قاعدين معاه!!!...الله يكثر من أمثالهم لأنهم صاروا عملة نادرة!!!...

فيه ناس تعزي بالمسجات طبعاً أصحاب الظروف مثلاً مسافر أو مريض

هذا له العذر لكن اللي ما يخلي دار ولا ديرة يعني ما عنده عذر أنه يتكرم

ويحضر شخصياً للتعزية أولها يرضي رب السماوات والأرض

وثانيها يكسب حسنات إذا كانت تهمه، وثالثها يكبر في عين اللي كلف

خاطره وزاره وواساه في مصابه الجلل...

أخواتي في الله إذا أخطأت في أي جزئية نبهوني وأني سعيدة بنصحكن

وإرشادكن وانتقادكن الراقي المحترم الذي نصل في نهايته لنتيجة

تفيد كلا الطرفين...وسلاااامتكن...