اخباركم ان شاء الله تمام ..! استعديتوا للدراسه .
الله يعين ويوفق ان شاء الله ..
تعودت اني احطها بفمي واشرب عليها مويه وبعدها اعيش يومي مروقه ومبسوطه مثل العالم ..!!
ايه مدمنه ..!
اول مره تشوفون وحده تقول مدمنه ..! وهذاني قلت لكم واعترفت
مااعيش يومي الا بحبه منه ولاانام الا فيه ..!
للاسف بدت المعاناه بشي مو قوي كنت اخذ منه حبه باليوم بس وبعدها صارت ماتفيد الوحده وابتديت بثنتين وبعدها ثلاث الى ان وصلت لاربع حبات !!
بس برضوا ماصارت تفيد بشي وحولت لشي اقوى منه ..ونفس الطريقه وحده وثنتين وثلاث واربع وبعد صارت ماتقوى علي ..
وحولت لشي اقوى منه حبه وحده بس ..لكن لي يومين ثنتين ..وماودي اوصل مرحله الثلاث والاربع .!
ماادري ليه احسكم ماصدقتوني ..!
سبحان من خلقه فيه قوه عجيبه انه يخلي جسمك في استرخاء تااام وماتحس بشي الا بعد 8 ساعات من تناوله ..
الغريب بالامر انه يباع بكل الصيدليات !
والغريب بعد ان الاهل يكونون حريصين عليه ..! اي شي يصير لك ايه خذ لك حبتين وتخف..!
مايدرون انه يصير ادمااان ..وربي ادمااان ..صرت اخاف اوصل لمرحله اصير مثل هاوس بس ازعط منهن ..!
خلونا نعرف انواع حبيباتي ..
هو عده انواااع فيه المخدر وفيه لا عادي وكلهم لهم انوااع ..!
نشوف اللي مو مخدر وانواعه .. /
1) الاسبرين..وطبيا يسمى السالسيلات ..
طبعا معروف الاسبرين انه قدييم جدا ..واذكر اني سمعت اكثر الشعوب استخدما له هو الشعب الامريكي ..
يستخلص الاسبرين من شجر الصفصاف ..وميزته انه متوفر ومو غالي ..
وهذي صوره الشجره ..شكله غريب سبحان الله ..
اما عاد استخدامه فالكل يعرف انه مسكن لكل الاوجاع واذكر جدتي بعد ما جته الجلطه صرفوا له الاسبرين لانه يمنع تخثر الدم ..
بس مو خلاص يطول الواحد يستخدمه لانه برضوا يضر انه مايتخثر الدم ..بعد من اضراره انه يسبب تخريش لبطانه المعده اتوقع قرحه عندنا يالعامين ..ولايصلح ابدا انه يعطي الاطفال اللي اقل من 12 سنه ..لانه يضر ويمكن يسبب لهم متلازمه راي
وتلف بالكبد وبعدها غيبوبه ..<<ربي يكفينا الشر بس..
) النوع الثاني ..
البنادول او الفيفادول بأنواعه ..ويسمى طبيا البارسيـتامــــول ..<<اللي يقوله 10 مرا ت له هديه ..
الكل يعرف البنادول وليش يستخدم ..بس له اضرار اللي يستخدمه كثير وهو يسبب تلف بالكبد <<الله يبعد الشر ..
علشان كذا تركته وحولت لحبيب قلبي وهو النوع الثالث ..
هلا بخلي هلا ..
3)البروفيين .. وطبيا اسمه ايبوبروفين ..
طبعا مافيه اختلاف انه افضل نوع صحيح ان الـ400 طعمه حلو كأنه حلاو ..بس الـ600 شي خورافي ..
يعيشك براحه تامه ولاكأنك مريض وتنسى اللي فيك اصلا ..
اضراره يسبب قرحه بس انه اخف من الاسبرين بكثير ..<<علشان كذا احبه ..
4) اخر نوع وهو الروفيناك واسمه طبيا دايكلوفيناك
يمدحونه ,,والله العالم اني راح احول عليه اللحين ..لان البروفين بدا مفعوله يقل عندي ..
ومالقيت عنه اضرار ..بس بعد كم سنه يطلع شي جديد وتطلع اضراره ..
النوع الثاني وهي المسكنات المخدره ..
هذا النوع مايعالج المرض مثل اللي فوق ..لا بس يصيب الجهاز العصبي ويسكن ..
طبعا موكل احد يستخدمه لا يكون فيه مراقبه من الطبيب اللي يصرفه ..
انواعه فييه كذا نوع معروف ويصرف داييم ..
1-كوديين codeine
2-بثيدين pethidine
3-مورفين morphine
ماراح اكتب شي عن اضرارهم لانه ان شاء الله ماراح احد يستخدمهم ..<<لا والله تعبتي ..
هالموضوع من زمان ببالي ولاني من اللي يعانون من كثره استخدام المسكنات سويت شبه بحث عنهم وعن اضرارهم ..ان شاء الله الجميع يستفيد ..ولاتخافون كولوا بنادول وبروفين وكل اللي تبون
ماراح تصيرون مدمنين مثل محدثتكم لاني لي اكثر من السنتين وانا استخدمهم ..
ربي يشفي مرضانا ومرضى المسلمين ..
للكل ..