هل أنا مبذره ؟؟؟؟؟ من يساعدني

السلام عليكم بنات ،،،، بنات أنا أبيكم تقولون لي الصدق وماراح أزعل أبداً السالفة وما فيها زوجي دائم ماسك علي انتي مبذره ما تعرفين قيمة الفلوس وما عرفت اجمع لي قرشين من صرفك طيب اسمعو "" أنا وحده متخرجه عندي اربع أطفال جلست عن الوظيفة عشان عيالي وأنا ودي ألف مره اتوظف وادلع نفسي وأعز نفسي عنه بس عيالي صغار المهم عيالي ملابسهم الهرم وسنتر بوينت وسيتي ماكس نهائياً ما عمري عزمت صديقات جارات أهلي نهائياً لي عشر سنين متزوجة ما عزمت أهلي وخالاتي إلا مرتين المره الأولى كانت فطور كل يجيب طبق المره الثانية ترجيته يحط ذبيحه عيا ورفض آخرها نص تيس بعد حب الخشوم وتبت اعزم سفر أنا قال مدلعنا الشرقية وسياره ويوم جنونه عياله يبون دبي مسكنا خط ماكلف على حاله طيران وسكت وهي السفرة لا لبسي ماركات لأذهب والماس بسيطه جداً هاذا الشي الشي الثاني اول ما تزوجته مشى لي مصروف 700 ريال وكان يشكي من قروضه وكنت طالبه بالجامعة جئته قلت له خلاص وقف مصروفي لين يخلص قرضك وامشي حالي بالمكافأة اللي يصرفونها لي الجامعه وجلست على هالحال سنه ونص مصروفي رجع بس 500 ريال شامله أي شئ أبيه هدايا لااحد قطه استراحات أي شئ ماله دخل فيني خلاص وسكت لمدة كم سنه بعد العيال جلست اترجاه يرفعها لين وصلت 800 ريال وثبتت ومشى الحال لما صرف لي حافز فرحت كثير عشت الدنيا صح لكن رجعت حليمه لعادتها القديمة وقام يشكي الحال قلت خلاص خليها 500 وخلاها طيب خلص حافز وجلست على الخمس ميه شامله معيشتي من إلى والله يا بنات أني أحاول أقننها الضروريات القصوى لكن وبس والله مافيها بركه تروح تطير وأسكت ومستحييييييل يعطيني فوقها 100 لو أموت والله يا بنات يعطي إخوانه وأهله لين رحنا عبأ السيارة مقاضي وأغراض وأنا ما عمري دخلت على أهلي بشي وأنا جلست أكلمه قال مبذره ما على لسانه إلا هالكلمه طيب أقولكم سالفه هو معاه اي فون وأنا معي بلاك بيري كيرف جاه اي فون هديه ثاني فرحت قلت عطنياه جوالي منهري قال لا ببيعه ورفض لين قال إذا تبينه اخصم من مصروفك 300 ريال كل شهر لمدة اربع شهور تصفى على 200 :blink: طبعاً خلاص هو خيرني فوافقت تخيلي دفعني قيمة جوال جايه هديه ومع ذلك دائم يقول بدل ماتتوظفين وتساعديني تضغطين علي كيف أساعدك وعيالي غير كذا والله اي شئ يشتريه لعياله يجلس شهر يذلني فيه والله يا بنات هاذا وضعي لازدت لا نقصت بالله أنا مبذره وقول لي كيف أتصرف