هل أنتِ قادرة على تحمل أعباء الصداقة؟

كلنا نحب ننقل أخبار حلوة وسعيدة لكل الناس خاصة المقربين( الأهل/ الأصدقاء)، بس أحيانًا الظروف ترغمنا على نقل أخبار سيئة لمن نحب، فهل أنتِ قد هذه المسؤولية؟
حقيقة خطرلي الموضوع من موقف حصل معي، وهو أني كنت قدمت مادة علمية للنشر في مجلة وكانت صديقتي على علم من بداية كتابتي للمقال إلى حين تسليمه وكانت داعمة ومشجعة، وكانت المجلة حددت شهر معين لنشر العدد دون تحديد يوم معين، ومن بداية ذلك الشهر أدخل يوميا إلى موقع المجلة عشان أطلع على العدد لأني ما أعرف إذا المقال الي قدمته انقبل أو انرفض عشان فيه تقييم سري من المجلة لجميع المقالات قبل النشر، المهم بعد شهر أنا مليت ماصرت أدخل الموقع كل يوم أخليها على حسب وقتي، لين جا اليوم الي اتصلت فيه صديقتي علي وكانت تبغى تسأل عن شي وفتحت سيرة المجلة قالتلي إيش صار قلتلها ما صدر العدد، قالتلي لا سمعت إنه صدر تقول وصلها رابط المجلة، قلتلها طيب شنو فتحتيه؟ شفتي مقالتي منشورة؟ قالت لا الرابط ما اشتغل على هاتفي راح أرسلك الرابط تحاولي انتي معاه، وفعلا أرسلت لي بس ما رضى يفتحلي عشان لي فترة ما سويت تحديث لهاتفي فأرسلت الرابط لأخوي وكان بالشغل و قالي راح افتحه بس أفضى، جلست على أعصابي خمس ساعات مثل الي ينتظر نتيجة إمتحان لأن نشر المقال مهم بالنسبة لي، المهم بعد فتح رابط العدد قالي مقالك مو موجود، طبعًا أنا زعلت وحسيت بإحباط بس قلت راح أتواصل مع المجلة عشان أعرف السبب الي خلاهم ماينشروه وإذا كان فيه أخطاء علمية أبي أطلع عليها، و قالولي أوكي بس نحتاج وقت عشان المراجعة جلست حوالي أسبوع وأنا متضايقة وسألتني صديقتي شنو صار معاك حكيتلها كل شي حاولت تخفف عني بس أنا كنت مصدومة لأن جهد بذلته لأشهر راح هباء منثورًا ، لين مر أسبوع أتفاجأ برقم غريب يقول إنه رئيس هيئة تحرير المجلة في رسالة طبعًا ما أعرفه ولا يعرفني، اتواصلت معاه قالي إن مقالك خضع للتقييم وصدر قرار بقبوله للنشر بدون أخطاء علمية وقام يتأسف لي بأن عدم نشره كان نتيجة خطأ أحد الموظفين في المجلة وقالي أنا راح أصلح الخطأ وراح أرفقه مع العدد الي صدر اليوم قبل بكرى، لأن النسخة الورقية ماصدرت فيقدر يتلافى الخطأ الي صار وقال أنا أتحمل المسؤولية، طبعًا أنا مشاعري كانت متناقضة إنكسار وفرح وحسيت إن الله جبر بخاطري، المهم بعدها بيومين حكيت الي صار معاي لصديقتي فرحتلي كثير، بس اعترفت بشي صدمني شوي، قالتلي سبحان الله الواحد إذا له نصيب بشي بياخذه أنا فتحت الرابط من أول مرة وماشفت بحثك وما قدرت أقولك عشان ما أبيك تسمعي مني وأنتي كنتي وراه لين عرفتي، قلتلها أنا صدقتك لأن أنا كمان مارضى يفتحلي قالت حتى أنا فتحته من اللابتوب مو من الهاتف بس درت من أول مرة، طبعًا قعدت تقول برافو عليك وحدة ثانية في مكانك تقبلت النتيجة بدون ماتستفسر بس انتي كنتي واثقة من نفسك عشان كذا حقك ماضاع وشوفي حتى العدد راح يتعدل عشانك، أنا من كل كلامها بالمدح ماهمني أدري إن نيتها كانت حسنة ماتبي تزعلني بس حسيت إن تصرفها تصرف بنات صغار وهي عمرها بالأربعين أكبر مني بسنوات خبت عليا ليش؟ في النهاية راح أدري بأي طريقة، للأمانة حسيت إنها مو قد المسؤولية خلتني ساعات على أعصابي وهي تدري بالنتيجة، أعرف ناس تنقل أخبار أكبر من كذا زي خبر وفاة أحد أو مرض، أو خيانة!
ورجعت بيا الذاكرة لسنوات المراهقة، كانت بنت خالي بسنة بكالوريا ومو كل الناس عندهم موبايل وأنا بوقتها كان عندي، وطلعت نتيجة البكالوريا اتصلت على هاتف بيتهم قلتلها وصلتني رسالة من الوزارة بأن النتيجة طلعت لو تبي أشوف نتيجتك قوليلي رقم القيد قالت أوكي وشفت نتيجتها وكانت راسبة ونحنا متعودين إنها تنجح طبعًا ما أنكر إني بعد ما علمتها بالنتيجة حسيت بشعور مو حلو لأني كنت مراهقة عادي تفكيري سطحي بس الحين أحسن إنه عادي بالعكس اختصرت عليها الوقت لأني لو ماقلتلها راح تنتظر يومين لين يخلص الويكند وتروح المدرسة وتدري لأن ماحد من بيتهم كان عنده موبايل فأنا اختصرت الوقت، وأصلا نتيجة طلبة البكلوريا ماتتخبى معروف الي نجح أو رسب في كل عائلة.
عندنا مثل يقول صاحبك الي يبكيك مش الي يضحكك لأن الي يضحكك يضحك عليك.
الخلاصة العلاقات بجميع أنواعها فيها مسؤوليات هل انتن قدها؟