هل إنتي مع أم ضد التوسيع والخياطة ؟؟

كيفكم يا أحلى حوامل ؟؟ الله يقومكم بالسلامة يارب والحمد لله على سلامة اللي ولدو ومبروك ماجاكم ..
أنا بكرية ومالي 12 يوم نفاس .. طبعاً زي الأغلب في المستشفيات عندنا ولدت والدكتورة وسعتني من غير ماتاخذ رأيي ولا تسألني بس الراس قرب يطلع قامت ووسعت بالمقص من راسها .. أنا تأملت إنها ماتوسع خصوصاً وحجم البيبي صغير والراس كمان صغير وقدو طالع طالع ليش القص ما أدري بس الله يسامحهم يارب ..
سؤالي لكم يابنات .. في وحدة ولدت بدون توسيع اللي أقصد ( بدون شق العجان ) .. وإذا فيه كيف اهتميتي بنفسك في النفاس وكيف رجعتي بعده والأهم كيف علاقتك إنتي وزوجك بعد الأربعين .. واذكريلنا محاسن الولادة بدون شق العجان ومساوئها إذا وجد ...وهل إنتي طلبتي من الدكتوره تولدك بدون توسيع ولا كيف ؟؟؟
وكمان سؤالي للبنات اللي ولدو بتوسيع كيف اهتميتي بالخياطه والجرح متى طاب ومتى قدرتي تمشي وتجلسي براحتك وكيف طريقة أكلك واذكريلنا مساويء ومحاسن التوسيع إن وجد ؟؟ وكيف كانت علاقتك مع زوجك بعد الأربعين ؟؟ولمى وسعتلك أخذت رأيك ولا لأ وسعت وبس ؟
البعض يقولو التوسيع اللي هوا شق العجان بس في الولادة الأولى أما الثانيه لا مافي توسيع ما أدري صحيح هالكلام أو لأ ؟؟
وإذا وسعتي في الولادة الأولى هل ضروري توسعي في الولادات اللي بعدها ولا لأ ؟؟
موضوع للنقاش نتكلم فيه ونفيد بعض وننبه بعض عن الأخطاء اللي وقعنا فيها ونفيد بعض كل وحدة بحسب خبرتها لأن زي ماتعرفو في بنات بكريات زي حالتي ماعندهم خبره ولا أحد يفيدهم ....
أنا ما أدري بس إن شاء الله موضوعي مايكون مخالف أو شي وإن شاء الله الإدارة تخليه عشان كلنا نستفيد وأعتذر عن الإطالة وجزاكم الله خير ...