هل اسمع كلام الدكتوره؟ ابي اتحسن

السنة هذي مرتني حالات وفيات صعبة
تزوجت وبعدها توفى ابوي في الحد الجنوبي
زوجي تزوجني عن حب و كنت قبل الزواج تعبانه على وفاة صديقتي و الدكتور كتب لي دوا أخذته شهر وتحسنت
و هو عارف القصة كلها و يدري اني حساسه
زوجي حنون و لطيف و سافر بي كل مكان عشان اسلى
بعدها صار يقول لي انتي تحبين الحزن انتي انتي انتي
مشكلتي اني جسمي تعبان جدًا و حرارتي ما تنزل و مقدر انام في الليل و ان نمت يجي النهار ابي انام بعد و اقعد طول اليوم نايمة ،،،، نومي هروب من الحياة
ما أشتهي الاكل و ما احس ب أي سعادة و لا في شي يغريني لا لَبْس و لا سفر و لا اي شي
صرت اذا ابي ابكي اروح لحالي أصد ابكي الين أقول بس
مقدر اشكي له من حزني و امي فيها اللي مكفيها
و الباقين ما ابي اشمت احد فيني
وصلت من الضعف اني احتاج احد يساعدني اطلع من هذي الدائرة السودا اللي انا غرقانه فيها
حاولت كثير بس ما قدرت
اول عائق ما فيني طاقة جسمي تعبان كن احد ضاربن
حرارتي ما تنزل كارهه كل شي
تمنيت منه او من خواتي او صديقاتي اي مساعده انهم بس يمرون علي و يعزموني برا البيت
ابي بس اطلع برا البيت ذبحني التفكير و الحزن
انا من نفسي ماني قادرة بس منسدحة و تعبانه
و مع كذا و ربي يشهد علي اني ما اقصر مع زوجي في شي ،، أكله ملابسه ضيوفه و اقعد معه
أجاهد نفسي و لا هو مرضيه للأسف !!
امس رحت سويت فحص شامل والله اني سحبت نفسي من السرير سحب و بعدها حولتني الدكتوره على مركز فيه طبيبة سعودية علاج سلوكي و رحت لها و قالت لي معك اكتئاب و قلق و لازم دواء
و حولتني لدكتور و ما رحت له لأَنِّي ابي انا أعالج نفسي بدون أدوية
اليوم ،،، نمت كثير لأن امس حطوا لي مغذي ضغطي نزل من قلة الاكل و زعل مني و طلع و كتب رسالة
كلمني تليفون قلت له نعم فيه شي ؟ قال لا
رجع مرتين ابي اسلم عليه يصدني
قال ليش تردين كذا قلت اسفه كنت تعبانه
و انت طيب ليش اجي مرتين اسلم عليك تسفهني
قال اعتذارك ما ابيه
اليوم انا كل الوقت لحالي و آكل لحالي
اليوم انا مكلم لك رجال تروحين مركزهم تسوين أسنانك
انا و انا و انا
قلت انا اليوم تعبانه و الرجال ب اعتذر منهم و ما عاد ابي شي منك
و اماني اللي اول خلاص اعتبرها ماتت
اقصد اني ب اتغير للأفضل
قام رد و قال عمرك لا حييتي ان شاء الله تموتين
خليته يهدأ شوي قلت له معليش على ردي تراني كنت تعبانه قال مهب مبرر و انتي ليش زعلانه طيب قلت له ودي أنك تطلعني نغير جو تعبت محبوسه بين الجدران
رد علي رد ما توقعته منه قال : خايسه كل يومك نايمة و تبيني أوديك مطاعم !
لما قالها قسم بالله حسّيت ان روحي شهقت من جوا
قمت و خليته رحت الصالة
لحقني و هو لابس يبي يروح فندق يقول و قعد يزاعق تقلين أدبك عشان مطاعم و كلااام
قلت له اقعد ابي أتكلم معك بهدوء قال منب قاعد مو لازم تمشين كلامك علي
قعد بعدها قلت له انا ما ابي مطاعم و لا زفت ابي اطلع من اللي انا فيه
الدكتوره تقول فيك اكتئاب و انا والله اني احاول أتغلب عليه بس انت شايف لا خوات و لا صديقات وقفوا معي
حتى انت والله اني راحمتك اني اشكي لك من شي
و يوم قررت افاتحك بموضوع اني ب اشوف لي حل في هذا التعب لي 3 ايام افتح لك الموضوع و تتجاهلني
قال اي أتجاهلك عشان ما تزيدين تشكين يوم راسي يوم قلبي يوم اذني و بعدين كيف تروحين عيادة نفسية بدون تستأذنين مني ؟!!!!
قلت له انا والله من هاللحظة اتكالي كله على رب العالمين ،، الله لا يجعل حاجتي في يد خلقه
راح الغرفة و نام و انا كتبت له رسالة طويلة بكل اللي في خاطري
مع العلم يا بنات لي شهر اطلبه يطلعني اي مكان لأن محد يعزمني ابد و صديقاتي و قريباتي مدري وش فيهم مبعدات مرا من بعد زواجي
يحسبون اللي تسكن قصر مرتاحة ما دروا اني راضيه ب شقه بس الله متمم علي عافيتي
الحين انا أفكر بالانفصال ،،
و الأهم عندي نفسي ،، شلون اتحسن
هل اسمع كلام الدكتوره
هل آخذ الدوا ؟ هل اذا اخذت الدوا اعلمه او لا ؟
كيف اتعامل معاه اليوم و بكرة ؟
قلبي مكسور ،، الله يجبر كسري و يمسح على قلبي