هل الأرمله و المطلقه فريسه لضعاف القلوب ؟؟

السلام عليكم ورحمه الله وبركاته
اتمنى الكل بخير و صحه و عافيه الموضوع لتبادل وجهات النظر و النقاش اتمنى انه يكون بعيد عن التنابز و القذف
و التعليقات البعيده عن الموضوع
اللهم صلي و سلم على محمد و ال محمد و صحبه اجمعين
ربي اغفر للمسلمين و المسلمات الأحياء منهم و الأموات و أخص زوجي بدعوه برحمه و المغفره وان لا يكون اخر لقائنا بالدنيا و يجمعنا به في الفردوس الأعلى


أخواتي ممكن البعض عارف أني فقدت زوجي في اخر شعبان و انا حامل ما زلت بالعده لكن لاحظت شي غريب ما ادري هل هالشي منتشر عندنا ولكن انا كنت جاهله فيه
او فعلا في ناس غريبه
أنا أرمله و عندي بيت ملك و الحمدلله و ضعي المادي أكثر من ممتاز و كثير كانو ينظرون لحياتنا بأعجاب قبل وفاة المرحوم من سفريات و طلعات و بيت ملك
الحمدلله على كل حال
الحاصل انا أرسلت خبر وفاة زوجي بالواتس اب لكل المظافين بدون تحديد مع الدعاء له وخليت جوالي وطفت البطاريه ولا ادري عنه في اليوم الرابع ركبته على الشاحن
وجاني كم من الرسائل من الاهل و المقربين و الصديقات يعزون و يواسون جزاهم الله خير
من بين الرسائل كانت رساله لموظف بالشركه الي استقلت منها من وقت ولو وحده تقول ليش رقم جوالك عنده كل موضف او موضفه له بزنس كارد بطاقه عمل وفيها رقم الجوال
و توزع للكل وانا ما عندي الى جوال واحد للعمل و لحياتي الخاصه و اصلا مع هذا نادر جدا انه يرن او تجيه رساله
المهم راسل يعزي و يواسي من يوم وفاته قلت عادي مو مشكله لكن راسل ثانيه ما ادري متى و الجوال مقفل يقول لا تحزنين ولا تشيلين هم علميني بس متى تخلص العده
و ابشري بالعوض انا و اهلي جاينكم
ما رديت عليه بكل بساطه عطيته حظر و انتهيت منه
بعدها بكم يوم واحد من جماعتنا وبعيد شوي مو مرا قريب اصغر مني بثلاث سنوات راسل يعزي بالواتس رديت عليه جزاك الله خير و ربي لا يريك مكروه في غالي
اخذت الموضوع من باب حسن الظن قالي متى اقدر اكلمك
كتبت له خير و تكلمني في ايش اصلا ؟؟ قال ولله ما اقصد شي اواسيك بس قلت له جزاك الله خير و رايتك بيضا و عزيت بالواتس
واعتقد اديت الواجب اتمنى ما اشوفك كاتب مرا ثانيه و فعلا الي من جماعتنا ما كتب شي من يومها


بعد فتره رقم ما اعرفه ولا ادري مين يعزي رديت وكتب جزاك الله خير رقمك ماهو ما خزن ما عرفت انتي مين قال انا واحد
حاب اكون قربك في هالفتره الصعبه و اعطيته حظر بدون ارد عليه وليومكم ما اعرف مين هو


امس جاتني رساله بالواتس من رقم غريب وقال ما توقعت منك الحظر انا فلان ولا هو الي كان بالشركه وكاتب انا قصدي شريف و ابي الزواج
ما رديت عليه و حظرته و علمت امي عن الموضوع
حل مشكلتي بسيط جدا اني اجيب رقم جديد ولا اعطيه اي احد و تنتهي كل هالسالفه و انا الحمدلله واثقه من نفسي ان شاءلله مستحيل ادخل بالحرام
وانا ام عيال
بس الي حابه افهمه هل المراه الضعيفه المكسوره في مجتمعنا هي طعم و فريسه سهله لضعاف القلوب ؟؟
الي ما عندها زوج في هذي الدنيا يتسلطون عليها عيال الحرام ؟؟
هذا الشي دارج عندنا لكن انا اول مرا اشوفه ولا شي غريب ما حصل ل احد غيري ؟؟


ولله انا خفت باقي بالعده وكذا كيف لما اطلع و احتك بالمجتمع و اروح و ارجع كيف بيكون الوضع
اتمنى تفاعلكم بحدود الموضوع و جزاكم الله خير