هل الموضوع كبير فعلا ولا أنا مكبرته ؟

السلام عليكم ..
عزيزاتي .. أنا عندي صديقة وزميلة في العمل في نفس الوقت راح اسميها أمل افتراضا ..بيننا صداقة قوية واللي معانا في العمل عارفين الشي هذا وبيننا زيارات في البيت ..
امس حصل موقف صدمني وحز في خاطري ..
اللي حصل ان صديقتي امل جابت فطور وعزمتني افطر معاها ، رحت لها مكتبها وفطرنا وبعد كذا رحت مكتبي وتذكرت شغلة تخص العمل ورجعت ابغى اسألها عنها .. لما جيت عند مكتبها ماحصلتها وانا واقفة عند باب المكتب جات رئيستنا في العمل وموظفة ثانية وسألوني عن امل ، قلت لهم ماادري .. قالوا لي ان محفظتها انأخذت من شنطتها وان فيها فلوس الجمعية وكذا .. قلت لهم غريبة ماقالت لي شي ! وبعد شوي جات امل ودخلنا معاها المكتب وقعدنا ندور معاها ويوم حركنا الاغراض الموجودة على المكتب لقينا المحفظة تحت شنطتها .. قامت طالعت فيا وابتسمت وقالت : تمزحين معاي ؟ قلت لها لاوالله ماحصل الشي هذا .. قامت قالت والله هذي مزحة مو حلوة !!
انا انصدمت من الموقف وماستوعبته الا بعد مارحت البيت .. قمت ارسلت لها رسالة وقلت لها اني مصدومة من موقفها معاي وكيف انها حطتني في موضع شبهة في نظر الموظفات وانه لو يضيع لهم شي بعد كذا بيقولون انا اخذته !
قامت تبرر وتقول لا انا اصلا سألتهم كلهم وقلت لهم انتم تمزحون معاي وكذا .. انا ماقتنعت بكلامها وفعلا مصدومة من تصرفها .. يعني انا صديقتها المقربة والمفروض لما ضاعت محفظتها جات وقالت لي عشان ادور معاها مو تتهمني قدام الموظفات ..
وقالت لي خلاص انا بجمع الموظفات واقول لهم اني مااقصد اتهمك .. واليوم كلمتهم قدامي لكن حتى اسلوبها مافيه اعتذار ولا شي بالعكس حاطة اللوم عليا اني زعلت وفي نظرها ان موقفها مايزعل !! وتحاول تمزح وتبغى تلطف الجو وانا مو طايقتها والله ..
سؤالي : هل انا فعلا مكبرة الموضوع ؟ ولا تصرفها غلط كبير في حقي فعلا ؟
وكيف اتعامل معاها بعد كذا ؟
واللي تنقل الموضوع للانستقرام والسناب اقول الله لايسامحها ولا يحللها ..