هل الي احس فيه كافي لاطلب الانفصال؟؟

في موضوع سابق تكلمت عن معاناتي وحياتي مع زوجي
تعبت تعبت تعبت عجزت احب زوجي عجزت اتقبله اه يالالم والوجع الي احس فيه ويفتك بكل كياني
7 سنين كنت احاول احبه او حتى اتقبله لكن اقسم بالله كل محاولاتي فشلت مع انه يحاول يحببني فيه على قد مايقدر لكن شي مو بيدي..
من اول ليله في زواجنا وانا ماتقبلته اكيد بتسئلون ليه ماحبيتيه ولا تقبلتيه اقولكم زوجي مافيه عيب انسان محترم وخلوق جدا وملتزم وموفر لي كل اسباب الراحة ويحبني موت لدرجة انه اذا غبت عنه يبكي مثل الطفل الصغير لكن شخصيته ماحبيتها وبمعنى اخر كرهتها شخصيته ضعيفه جدااا وماعنده اسلوب في الحديث وفي شخصيته اشياء كثيره منفرتني منه ومكرهتني فيه
انا كنت اتمنى زوجي يكون شخصيه بمعنى الكلمه وتكون له هيبة لكن زوجي على العكس تماما لدرجة اني احيانا اعصب عليه وهو عادي جدااا ولا همه وكثير اقوله انت عادي عندك اغلط فيك يقول وش اسوي احبك؟؟؟؟
اكره حبه لي احس بنفور منه مو طبيعي 7 سنين جبت فيها ولدين وكنت احاول اني ارضى بنصيبي عشان اطفالي وعشانه هو لانه مسكين مو ذنبه اني ماحبه ماودي اصدمه خصوصا انه يموت في بشكل يعذبني ويعذب ضميري

اقسم لكم يابنات اني ادعي بكل صلاة انه يجد لي مخرج من الهم الي اعيش فيه
انا انسانه من لحم ودم ابي اشعر بالحب انا بداخلي مشاعر واحاسيس مادري وين اوديها والله ثم والله اني اخاف على نفسي من الانحراف اقسم بالله اني معاه في العلاقة الخاصه زي الجماد ماحس بشي من كثر ما انا كارهه انه يلمسني او يقرب جمبي لدرجة احس ان ودي ارجع من كثر الاحساس بالغثيان معاه
وهو يشوف اني قرفانه وما اتجاوب معاه لانه شي مو بيدي ومع كذا يحبني ويموت في ومايناديني الا ياعمري وياحبيبتي
ياناس اذا شفته ما انبسط ولا احس بسعادة الا احس بضيق وكره
حبه لي معذبني ومنكد علي حياتي لو ان فيه مشاكل بينا بقول جت من الله افتك منه لكن مصيبتي انه يفني نفسه وصحته عشان يرضيني ويكسب حبي وهذا الي بيجنني
كل شي موفره لي بيت ملك وشغالات وكل شي ابيه يروح هو بنفسه يجيبه لي لدرجة انه يقول انا استمتع اذا لبيت لك طلب وسعيد اني اكون سواق عند حبيبتي
طيب معاي ومع اولاده جداااا وانا اقسم بالله العلي العظيم ماصبرني كل هالسنين الي راحت الا عشان اولادي لانهم متعلقين فيه وعشانه هو لانه متمسك في ويحبني
والله اني اغيب واسافر عند اهلي واجلس بالشهور ما احس برغبه حتى بمكالمته مو عاد اشتاق ولا اوله عليه..
احس اني الان وصلت لمرحلة ماعاد اقدر اتحمل وبصراحة اخاف على نفسي انحرف والله العظيم اخاف على نفسي لان التفكير ذبحني وانا انسانه عاطفيه احتاج لرجل احس معاه بانوثتي احس اني احبه واشتاق له
النوم ما انام كله بسبب التفكير الي عذبني واقلقني
مرات اقول يابنت دوسي على احساسك وعلى مشاعرك وانسانيتك كلها عشان اولادك وارضي بنصيبك
ومرات احس اني موقادرة واخاف على نفسي فعلا وانا عمري 33 سنه اخاف اقسم بالله اخاف على نفسي كثير لانه ببساطه مايرضيني مااقصد من ناحية العلاقة الخاصه لا...اقصد من ناحية رجولته كشخصية ومواقف واسلوب لدرجة اني ما احترمه نهائيا وهو عادي عنده..
ارجوكم لاتكونون قاسين علي وحطوا انفسكم بمكاني وبعدها ردوا علي لاني محتاجة لكم ويعلم الله اني في حالة يرثى لها من التعب والالم النفسي