هل انا انانيه او ... اكلت عمري من التفكير

السلام عليكم ورحمة الله وبركاته
حبيباتي من بعد الله افضفض لكم واتقبل صراحتكم الله يخليكم
الموضوع شوي طويل ال مشغوله ل حصل معها وقت تدخل وتفيدني الله يجزيكم كل خير
الموضوع يتكلم عن حياتي الزوجيه وعذرا اذا كان فيه جرأه شويه
اول حاجه من تزوجت ست سنوات وشهرين عندي بنتين الله يحفظهم عمر خمس سنوات والثانيه ثلاث سنوات وثلاث اشهر الله يحفظهم
بدايه الامر اول سنه زواجي وبالاخص اول شهرين كنت انزل عند اهل زوجي بحكم اني بشقه بالدور الثاني والمصعد بوسط البيت الشهر الثاني من زواجنا لاحظت شوي تغيرات بأهل زوجي حمياتي يعني اطلع وادخل وهم نفس ال رافعين حاجب يعني بتاتا مايبتسموا بوجهي مب كلهم يمكن وحده او ثنتين احيانا يتبسموا المهم جا يوم من قروبات الواتس يرسلون الرسايل وانا عجبتني رساله مدري هي عتاب او زعل نسيت عن ايش بس عجبتني رسلتها ل حماتي وهذي حماتي ماتقصر معاي بمواعيد المشفى بحملي تروح معاي المهن من ضمن رسايل الواتس حسيت فيها اشيا تناسب ورسلتها ب طيب نيه ولا خطر ببالي انها بتكلم زوجي صعد زوجي قالي وش هالرساله ال راسله وش مسويه لك هي ومن هالكلام كنه يهدد انصدمت قلت له شفيها الرساله حالها حال رسايل الواتس قلت له ليه ماقالت لي انا ليه انت تخبرك ورحت كلمتها واتس قالت حصل خير مابررت موقفي سكت فكرت انها عادي تتقبل ك بقيه الرسايل ال كنها شعر المهم بعدها بفتره تغريبا نفس الشيء كيف اشيا بيني وبين حماتي وتروح تكلم زوجي ماتكلمني انا هذا اول سنه مع ان علاقتي من حسيت مب حيل يسولفون معاي خليت نفسي سطحيه انا من النوع الخجول يعني انزل جنبهم ينتظروا انا ال اسولف مب هم مع ان مع بعضهم عادي تمنيت انهم يجرأوني بس للاسف بعدها صرت اقلل نزلتي تحت
وكل مادخلت اضل طول الوقت ساكته لو اتكلم حدهم يردوا ع الكلمه واشوف غيري ل زارهم ضحك ووناسه حزت بخاطري وال اكثر حز بنفسي اني كل مانزلت محد عاطيني وجه حملت ببدايه زواجي برضو
بعدها جات بنت خالي كانت جاره لنا بمنطقه اهل زوجي هذي ع نيتها كل شيء تتكلم عادي وتضحك
قالت دام انها حامل قالت اختها كان امر عليها ونروح مع بعض المشفى وبعد ماطلعت جا زوجي قالوا له شدعوه هذا حنا مب مقصرين معاها ونوديها ومن هالكلام مدري وش ال دار بينهم بالضبط وجا زوجي لي معصب ليه بعد تقول اختك كذا ل بنت خالك وان شفتها جايه ثانيه تردين بيت اهلك احس خلاص حسيت بغصه وتجادلنا المهم دارت الايام قلت بنفسي لازم اعرف من الطرف ال وصل ل زوجي هالكلام وبيوم كلمت حماتي ال تمون علي وقالت لي ان اختها الاكبر هي ال قالت من خلال الكلام وقالت انا عادي والله تبي معها او معي اشيلك من هالكف ل هذا الكف كلامها يريح القلب بعدها ولدت ماقصرت راحت معي المشفى وبنفاسي كانوا اهل زوجي كل يوم او يومين يزوروني وبيوم جات اختها الاكبر مع ام زوجي قالت اشوف البنت وانا اتبسم قلت لاختي نايمه يقولوا اذا صحيتوا الطفل وهو نايم يضعف نومه مب زين بطيب نيه الله يشهد وبس قالت ام زوجي جيبوها وشالتها اختي وعطتها اياها ويجي زوجي يوم ثاني قالي صج مارضيتي تعطي البنت امي ومن هالكلام خلاص عصبت قلت شلون يضنوا فيني كذا من قالك هالكلام قال اختي خلاص ستوب حاولت اخلي علاقتي رسميه مع ان ام زوجي حيل احبها ماشفت منها مضره صرت كل يوم بعد نفاسي انزل جنبها ببنتي بعدها صرت اقلل
مدري وش شعوركم او هل انا ع خطأ لما اشوف اهل زوجي عاقدين الحاجب او هي طبيعتهم مع ان ل جا غيري او خواتهم حيل بتبسموا
جلست مع نفسي قلت مابي الضنون تسايرني وتتعبني ماعلي من احد اطلع وادخل علي من زوجي زوجي ببدايه الزواج كان يجبرني انزل جنب اهله واطلع معهم بس انا ماكنت اقبل اقوله خلني ع راحتي ماحب ان يتأمر علي ودارت الايام كل ماجينا من برا معي اغراض يقولي خبيهم احيانا اقبل واحيانا ماارضى اقوله ليه وش ماخذه انا ماكنت ابيه يتعود ع هالحركه
صرنا كل ماجينا من برا يقولي خل ندخل دخلي وانا اقوله لا بصعد واصعد شقتي
جلسنا اتحاور معه قلت له والله صنم من انزل محد يسولف معي احس مب متقبليني انا مابي اظلمهم بس انت ابيك تكتشف الشيء من نفسك وخلاني ع راحتي وخليته من نفسه يحس برضو حتى لو بيطلعوا هونت ماروح معهم ل كلموا اخوهم اذا بروح اياهم زياره لاحد
احيانا اذا بطلع اقولهم قوموا معانا
المهم بيوم كنا بنطلع يوم جمعه اجازته متعودين نطلع مطعم قالي جهزي وفجأه سمع صوت امه واخته ال دايم تساعدني وصوتهم عندنا راح يشوف وش حاصل كانت امه واخته يقولوا ليه مايطلعوهم ومن هالكلام ماتحسوا قال يمه لج العذر اذا مره رديتك بس امه تبي منه ومن نفسه هو زعل شوي
جلست معه قلت له انا ماحب احد يتدخل بطلعتي ودخلتي وانت برضو ماتقصر بس البر انك انت ال تقول يمه قومي اطلعك خصص لهم يوم وكذا مع ان هو علاقته قويه بأهله حيل يحبهم وبار فيهم
انا هنا حسيت خلاص ابي صج اطلع بشقه مستقله لجل لا يظنوا فيني ولا اظن فيهم وكلمته حسيته يفكر شوي مع ان مفقود الامل ان يطلعني
اعطيكم نبذه عن زوجي من ولدت بنتي وهي يوميا ينزلها عند اهله من الظهر او وقت تصحى وبس يجيبونها وقت ارضعها وينزلها او هم يصعدوا يبونها واعطيهم وتضل الى الليل يعني اغلب يومها عندهم
صار عمر بنتي سنه وانا طول الايام ال فاتت يحصل احيانا خصام بيني وبينه ع البنت اقوله والله ماعدت احس انها بنتي انا ابيك تنزلها حرام علي احرمها منهم بس برضو حرام عليك تنزلها وتخليها طول الوقت كل مره يكبر الخصام واذا نزلها مايرضى يصعدها لو اتعب يقول لا صعبه خليهم هم متى مايبون يصعدوها هو صج فرحان فيها بس حقي وين راح يعني حدي بس ارضعها ماحسيت بالحنان تجاها لان اغلب يومها معهم قلت له دام هذا كلامك خلاص انا تدري نومي عشر او ١١ الليل انت ال راح تفتح الباب ل صعداها قال عادي افتحه قلت له عساك نايم اصحيك عادي مهمه المهم ان مايجيبها صرت خلاص كل ماصعداها عساه نايم اصحيه ابي اكون جديه يحس بألمي وهو عادي يقوم احيانا ابكي من القهر واخاف انزل واخذها ومايجوز لهم للمعلوميه هم حيل يعدوا عيال عيالهم شنهم عيالهم يموتون عليهم يروشوهم ويهتموا فيهم حيل يمكن اعظم مني بس برضو حيل حزت بخاطري المهم يوم كنت نازله بطلع وكلمت حماتي ابي غيار ل بنتي الله يعزكم كلمت اختها تجيب جابت مدري هي معصبه من قبل او ايش جابتهم ورمتهم جنبي انا احس حيل حزه بنفسي ليه لان علاقتي جدا معهم رسميه انغبنت انا ماحب هالحركه مره زوجي رمى علي مفتاح بدايه زواجنا جنب اهله وزعلت منه
المهم قلت ل زوجي ليه كذا حركتها دارت الايام جا بيوم بالصباح غصب خذ بنتي مني يبي ينزلها وانا معارضه ابيها معي وخذها بالغصب ونزلها خلاص انا هنا قررت اني اطلع بشقه او ننفصل صحت من القهر لان ماحس اني جبت بنت ماحسيت بالامومه
وحنا طالعين بيودي اخته المشفى قلت لها بقولك شيء بيني وبينك انا مسويه لكم حاجه ال مب حيل معي يعني صاديني رافعين حاجب اذا مسويه عادي قولي لي وانا ماقلت لك الا لاني ابي اعرف اذا ضريتكم قلت لها انا كتمت والحين ابي الصراحه قلت لها جميع المواقف ال مرت علي من الرساله ومن الغيار يعني كل ال بقلبي قلته لها قلت لها والله لان احسك غير طيبه قلت اتفاهم معك وام زوجي قلت لها ليه تغيرت ل نزلت حتى بست راسها ماتعطيني وجه ترد علي وهي منزله راسها انا سويت شيء بحقكم ليه ام زوجي صارت دايم مبوزه او مكشره بوجهي هي كبيره بالسن ام زوجي وعلاقتها قويه بعيالها عندها كل شيء ولا عيالها
المهم ال حصل ان اخت زوجي راحت ونقلت الكلام لامها وخواتها وكبرت المشكله وصارت الهذره وزوجي شجعني قالي افضل صارحيهم وقولي ال بقلبك وهم يقولوا دعيت ربي ان مايضعف موقفي
ونزلت لجل نتفاهم مع العلم زوجي خبرهم ان خلاص محتمل نطلع
المهم نزلت وزوجي قلت له خلك مع الحق رفض قال انا مدري بال بينكم ومابي اصف معك ويزعلوا خواتي ولا اصف اياك ويزعلوا اهلي
قلت له خلاص خلك ساكت بس خلك جبني لجل مااضعف لان بسرعه دمعتي بعيني قال معليه
ال حصل تواجهنا وماظنيت انهم حطوا كل شيء فيني واني ممشيه ولدهم وقالوا اني وصيته من وانا بشقتي ان يكون معي مدري يسكت وانا والله يشهد قلت له خلاص المشكله بيني وبينهم خلك بعيد
واخته تحلف ان مارمت علي الغيار الله يكرمكم قلت لها والله احاول افهمهم قلت لها يمكن انتي وقتها معصبه قالت ماحللك وبدعي عليك بصلاتي وحضرتني من جوالها والثانيه حذفتني وهم حيل يصيحوا هم يعلوا اصواتهم وانا بدون ماحس اعلي صوتي قلت ل حماتي ال تساعدني دوم قلت لها والله ماتقصدت انطقك بس قلت كل وحده وش حصل منها لي وانا ال اثر فيني زود ان دايم وجهم شاين احسه علي بكل دخله وطلعه وبرضو ال قلت لكم زعلت من حمياتي بدايه زواجي ماعرفت سبب زعلها الا وقت تواجهنا قالت صعدت طقيت الباب بعطيكم حاجه سمعت اخوي يتروش وانتي تكلمي جوال مارديتي ال حصل الله يشهد اني مب متقصده بس كان لبسي عاري وانا بعد ال خبركم ماحب اتحرك الا ع الحمام الله يعزكم وزوجي يتروش قلت يخلص ويكلمهم شفيهم وهي تفكرني متعمده
وماخبي عليكم هم احيانا ل صعدوا بيصعدوا اي شيء او بنتي اكون احيانا لبس عاري او شعري مب مرتب او نايمه يعني تتعدد الاسباب واقوم بسرعه اذا ببدل او برتب شعري خصوصا ان من بعد ولادتي حيل صار يفشل استحي احد يشوفني كذا وهم ظنهم اني مابي افتح صحيح انا لو بمكانهم بزعل لان اطول شوي بس برضو حرام ليه يظنوا اني مابي احد بشقتي وهم مايدرون اني اتمنى احد يجي يمي يزورني قالوا حتى ل صعدنا البنت اخونا نايم وتصحيه قلت اكيد انا وزوجي متفاهمين ع هالشيء وهو وافق بس كل وحده فينا كلمه واصواتنا ع بعض
قالوا اخونا مايبي يطلع اساسا بس انتي ال تبي تطلعي
حاولت ابرر موقفي بس للاسف خبت ضنيت بتنحل الامور لكن تعقدت قالوا حتى امي ماسلمت منك وقالوا بكون مشلوله مثل مرت اخوهم الكبير ووقت فقدت الامل طلعت لام زوجي قلت لها الله يشهد ان ماعمري ضريتكم ومن هالكلام بس هي دمعتها بعينها وانا مب قادره انطق من الغبنه وطلعت واول ماوصلت لاهلي قالي زوجي ريحي يومين بس شفتها صحت حيل ماتحملت مع العلم ان مع خواته ماصحت عادي تكلمت بس مع اهلي ماتحملت
وفجأه حسيت بتعب وخذت شريط طلعت حامل وصحت زود
زادت الفجوات بينا يمكن من بعد سنه بدانا شوي نرجع انا ولدت بالطفل الثاني وجاني اكتئاب الولاده كان شديد كم شهر وطلعنا بشقه الان من بعد ست سنوات وشوي افضل بكثير حتى من وقت سكنت معهم انا مدري وش ال بقلبهم بس علي من الظاهر ال اشوفه الحين غير يتبسموا معي ماحس وجهم علي غير يعني افضل بكثير الحمدلله صحيح علاقتنا سطحيه بس برضو افضل من بدايه زواجي الحين ضحك مع بعض زوجي تغير بالبدايه حيل معي لان اصريت ع الشقه برا الان افضل الحمدلله
يمكن بتقولون ليه كتبت القصه فجأه برمضان بليله القدر جلست افكر اذا انا ظلمت او حاجه او حماتي ال قالت مب تحللني حيل تعبني التفكير اقول مدري انا صج ظالمه او مظلومه او كل شخص فينا يسوء الظن خفت اني اكون ظالمه ويكونوا مب مسامحيني خفت من عذاب ربي مع اني استغفر بس برضو بداخلي خوف حيل لان مستحيل اني اروح واقول سامحوني لان مب الكل يتقبل
يمكن بنظركم الموضوع تافه لكن انا تعبني نفسيا خصوصا ان قبل كم يوم اختي كنت اقولها الحمدلله الحين تمام قالت وقت كنت حامل قالت حماتك هي حامل بين روحين اذا هي ظالمتنا ربنا بياخذ بحقنا حيل حزه بخاطري تفكر اختي اني اعرف بهالشيء
ماخبي عليكم ولدت وقبل فتره اتكلم ع نيتي مدري ان ولادتي كانت حيل سهله رب العالمين مارد حاجتي طالت ان يسهل علي وسهلها
بس من قالت لي اختي عن كلام حماتي حيل تعبت قلت معقوله انا ظالمه او بتدور علي الدنيا وبيصير فيني شيء حيل تأزمت نفسيتي الحمدلله ع كل حال
والمعذره طولت جدا بس حبيت افضفض