هل انا غلطانة بحق صديقة عمري ؟؟

السلام عليكم ورحمة الله وبركاته ..
يابنات ربي يسعد اللي بترد على موضوعي وتساعدني لاني بجد وربي لي اكثر من شهرين محتارة ..
موضوعي بحاول قد ماقدر ماطول عليكم فيه عشان ماتملوا .. انا بنت عمري 34 سنة ماتزوجت لسه ولعلها لخيرة المهم عندي ابوي بالبيت رجل مسن اعمل على خدمته عشان كذا مافكر بوظيفة كلمتني قبل فترة صديقة عمري وقالت لي تعالي نقدم على وظيفة رديت عليها انه ماقدر عشان تعرفين وضعي تخيلوا وش قالت لي ؟؟؟ قالت وانتي الين متى راح تقعدين له راح يجيك وقت خلاص ماراح تقدرين على خدمته لانه راح يتعب اكثر خلي اخوانك يجيبون له رجال يقوم على خدمته .. وانتي شوفي عمرك كم سنة راح تصحين على نفسك وانتي لا وظيفة ولا زواج .. بناااات ماتتخيلون كلامها وش كثر جرحني لدرجة اني سكت ماعرفت ارد .. انا مؤمنة انه ربي بيعوضني بهالشي اللي اسويه خير بس ليه تجرح قلت لها اذا ماتبين تدعين لابوي بالشفاء لاتقولين هالكلام ..
بنات حاولت اسامحها عجز خاطري وربي يعلم وشلون حاولت اضغط على نفسي قلت معليش يابنت رفقة العمر عيب حاولت اداريها واسال عنها كل فترة .. بس ماصرت زي اول معها .. جاني موقف ثاني منها ؟؟؟
حنا مقدمين على شغالة سالتني عن جنسيتها قلت لها قالت مو زينة هالجنسية ادري انها قالت لي من باب النصح رديت انه امي حابه هالجنسية طيب شوي الا نفس كلامها هذيك المرة يجي على امي انه مو على كيف امك انتم لازم ماتسكتون لها ومن هالكلام ... بنات انا من بعدها عافها خاطري غصب علي .. هي الان تحاول تتصل فيني بس انا عجزت اسامحها .. احيان ماكذب عليكم افقدها بس لسه كلامها جارحني مع العلم انها بالاول ماكنت كذا .. سؤالي لو كنتوا مكاني وش راح يكون موقفكم معها ساعدوني ربي يسعدكم ..