هل انا غلطت لما قلت لها كذا

سلام بنات
بنات انا مشكلتي بالحياة
ماحب اقول لاحد لا او اكسر بخاطره
حتى لو على حساب نفسي اجامل لين
اتعب لكن موقفين قلت لا فيهم لقريبتي
ونفس الموقف تكرر مرتين
وكل مره احس بجلد ذات وندم واني ليش
ماقلت عادي وش كان بيضر
السالفه انا وحده اسوق
وماشاء الله بنات قريبي عددهم٤
اللي باعمارنا والكبار٣ متزوجات
ووحده صغيره بالثانوي وعندهم نظام انهم اذا طلعنا طلعه
لازم كل الاربع الكبار يجون
ماعندهم نظام مثلا كل مره تجي
مثلا ثنتين ولا عندهم نظام ينقسمون
بالكوفيات لازم لازم يجلسون معنا الكل
لدرجه انحرج ويتوهق صاحب الكوفي
بالعذد وبعضهم يطردوننا انه مافي طاوله تكفي!!
ولما اقولهم ياناس ننقسهم يرفضون
الموضوع
اني بعد ماشتريت سياره صرت عادي امرهم
ونطلع مع بعض
اللي يطلع انا وخواتي ٢
وبنات قريبي ٤ فكان عددنا بالسياره
٦ وضيق لان سيارتي صغيره
فجاه صارت بنت قريبي ترسل
لما نجي نطلع
تقول بجيب اختي الي بالثانوي معنا!!!!!!
قبل هالمره قلت لها
لا مافي مكان لها قالت ماعليك بخليها
تجلس على رجولي وجابتها وكان واضح
اني مابي تجيبها بعد مارجعت ندمت
قلت ياليت ماوضحت
امس سوت فيني نفس الحركه
ارسلت لي تبن نتقهوى قلت ماعندي شي
فجاه بالليل ترسل لي
بجيب فلانه ترا!!<اختها اللي بالثانوي
قلت يابنت الحلال اذا بتجلسين وحده
من خواتك جيبيها بمكانها
لان السياره فل
قالت
ماعليك نلحقكم مع سواق وقلت
كيفك اذا بتجين مع سواق وجت
مع سواق لما رجعت امس نفس الشي
حسيت ندمت اني ليش طردتهم وشكلي
غبي لكن هم الله يهديهم مادري ليش
لازم يسحبون كل العايله
واكثر من مره اوضح اني مابي يصير
عددنا كثير عشان مايطردنا الكوفي
ولا نصير ملفتين لما يكون عددنا بهالكثر
لكن مايستوعبون
انا ندمت لان رحمت البنت قلت مالها
ذنب اطردها كل مره بس خواتها
المفروض يعرفون
ان خلاص دام جاين هم معنا وقلت مابي
عدد كثير ماله داعي يسحبونها
اختي تقول عادي ليش تندمين
ماسىويتي شي يزعلهم انتي قلتي السياره
زحمه ماتكفي
يجلس احد وتجي مكانه
لكن مادري انا اتحسس من المواقف هذي
زي ماقلت
ماحب اقول لاحد لا او افشله واطرده
نفس لدرجه اختهم اللي تجيب البنت
اللي بالثانوي بكل ثقه
تحسسني انها زعلانه مثلا
او منفسه لان قلت لاتجيبينها