هل انتي مظلومة..؟ ، من السبب الرئيسي..؟

انا من اكتر النساء وقوفا بصف الحرمة
حتى وان قسيت معاها
لايمكن اوقف مع الرجال ضدها
مستحيل اقول هو معاه حق انتي الغلطانة ولا اقدر اقولها تستاهلي الضرب وكسر الخشم
ماقبل عليها
صحيح اني انفعل وانفعالي من زعل عليها..
لكن انا حقانية وزيما احب لنفسي احب لغيري
خلونا واقعيات
من كترة المشاكل اللي تنعرض عليا وكترة تفكيري فيها والبحث عن حل
احيانا تجيني اتصالات وتقعد الوحدة تشتكي وتشتكي وتشتكي
وتطلع عيوب زوجها كلها وفي الأخر...
استنتجت
ان الحرمة هي اللي تختار تعيش دور المظلومة والتعبانة والخادمة والمنتهية الصلاحية
والمنتدى مليء بالمواضيع اللي تثبت كلامي
عمركم سمعتو رجال اختار عيشة النكد وحط يده على خده وقال مالي الا الصبر؟
قلتوها كتير
يروح يعيش حياته..
وحدة ماجبرها زوجها على شي ليش تجبر نفسها
ليش ماتعيش حياتها في بيتها زيما خلقها ربي راعية في بيتها ومسؤولة عنه
ليش الحرمة ماتفوق لنفسها لين يجيب عليها حرمة
ومايزعلها اي حرمة
يزعلها الزواج بالشرع بالحلال
كم وحدة هنا كتبت زوجي حق حريم وله علاقات وكنت صابرة < وماحد جبرها تصبر
لين خلاص بيتزوج بالحلال < قالت بتطلق منه
مين اللي جبرها تصبر على الحرام
لو هو كان صبر؟
كان قال ربي يهديها؟
والا كان طلقها واتزوج غيرها في اسبوع لو يقدر
بالعربي دايما عنده حلول لمشاكله وحلوله دايما في صالحه
هو يتخد قراره لمصلحته الشخصية
وهي تتخد قرارها لمصلحته فقط
اي صبر اللي يتكلمو عنه دي كدبة تكدبها الحرمة على نفسها
عمره ماكان الصبر للزوج
ليش تشتكي؟
اشتكت فمعناتها ماهي صابرة لله ولا لها اجر الصابرات.
زيما قلتو كتير
مجرد يكبرالرجال في العمر يفكر يتزوج بشابة ترجع شبابه
ليش ما صبر عليها وعلى كبر سنها؟
بالعكس اول مافكر في مصلحته لقي الحل اللي يريحه بدون ادنى تفكير في زوجته وعشيرته
ولا افتكر لها تضحياتها وتنازلاتها اللامتناهية
وهي لما تكبر ماتفكر بنفسها ابدا< تسيب كل شي وتقعد في المطبخ تطبخ والا تمنعه من العلاقة الخاصة بحكم انهم كبرو
بدل ماتتفرغ لنفسها زيه لما اتفرغ لشهواته
بدل ماتدخل نادي والا تروح تقرأ وتزيد من علمها
تقعد تعطي وتعطي وتعطي بدون ماتاخد
هي حرمت نفسها كمان هو يحرم نفسه؟
هو ظالم لها هي كمان تظلم نفسها؟
كم وحدة كتبت هنا ساكتة له لما خلاص خطب قامت قيامتها
تتنازل وتضحي وفي الأخر هي من يشتكي
وترجع تبكي انا سويت وسويت عشانه
واتنازلت عشانه
كل شي عشانه عشانه الين متى تلغي نفسها عشانه
ادا هي لغت نفسها تبغاه يثبتها؟؟؟؟؟؟
ماهو مجبور يتنازل هو مجبور يلقى حل يرضيه حتى لو على حسابها
هو ماحط السيف على رقبتها ولا هو ساجنها علشان تلبي وهي صابرة
مجرد مايبدي راي < تجيها حالة لاوعي واستنفار وفقدان توازن وتعتبره امر صادر من اعلى رتبة في العالم
وماتقدر ترفض طلبه رغم انه تعجيزي
وفي الأخر الرجال شاف نفسه
هو ماكان رافع السلاح على راسها وقالها لو ماسويتي اللي ابغاه قتلتك
هو مجرد راي بس لا اكتر
قامت تجري وتنسى نفسها وكل اللي حولها
وصلت الحرمة تسأل وهي متضايقة وكارهة نفسها علشان ايش؟
علشان تبغى تقص وزوجها رافض
وي للدرجة دي مالك كلمة ولا رأي ولا ذوق؟
واحيانا يكون نفسه تقص بس مستمتع بالطاعة العمية
تنام وهي تفكر وتصحى وهي تفكر وتبحث عن قصات وصبغات وتعيش حلم
ابغى اقص وزوجي مايبغى وهو نايم ومستمتع باحلى نومة < معليش هنا مالها حق اي حرمة تقول انها مظلومة
حتستغربو ليش ذكرت قصة الشعر رغم انها تافهة مقارنة بالمشاكل التانية
لكن ابتداء بحرمة مو قادرة تقص شعرها الخاص فيها علشان زوجها رافض
برأيكم تقدر تسوي أي شي اكبر من قصة شعر ؟
تقدر تاخد قرار في حياتها الزوجية؟
ماتقدر
ولا حد يقدر
طالما هي رافضة نفسها قدام زوجها المقدس

ايش هو ظلم الحرمة الحقيقي في مجتمعنا؟
تراه في الحضانة والخلع تتبهدل في المحاكم < واغلب اللي اتبهدلو بسبب ترددها الشديد قدام القاضي

ماظلمها الا نفسها
ايش هو المجتمع؟؟؟؟؟؟؟
هو نساء ورجال
ادا الرجال ضدك وانتي ضد نفسك مين معاكي؟
مشكلتها ماقصرت في حقه ابدا وجازاها بضرة تكسر قلبها
والا خيانة تخرب سعادتها
انما قصرت في حق نفسها
والله ان بعض الحريم تقوم من النوم تجري عالمطبخ تسوي لزوجها الفطور
قبل تصلي الفجر
اسألكم بالله تستاهل يتنكر لها ؟ والا ماتستاهل؟
تركت حق الله واتجهت لحق المعبود اللي زيها زيو
وتبغى يكون الحق معاها؟
وتبغاه يعاملها بالمثل؟
كيف تتجرأ تطلب من سيدها يحترمها ويعززها ويكرمها؟
هدا هو رايه في الزوجة الملغية.
انتو تقرئو المشاكل هنا
على اختلافها الا ان السبب واحد
مالها راي ماتقدر تقول معليش تعبانة ماتقدر تقول لأ
بس تستشير هل اسوي كدا؟
هل انا غلطانة؟
معقول مافي حرمة شايفة معاها الحق في اللي سوته؟
لهالدرجة ماهي واثقة من تصرفها كراشدة واعية عاقلة بالغة مسؤولة؟؟؟؟؟؟
الحقيقة اللي اتغافل عنها الكتير
ان الحرمة معطية لزوجها الصلاحية التامة علشان يظلمها
ماتغلط في زوجها الا ماندر
انما تغلط في نفسها وتبغى الكل يعطيها حقها
وهي اول من سلبه.
دا الكلام استنتجته من اعترافات نساء صريحات جدا كبيرات في العمر
اكتشفو اخطاءهم واول ماعدلوها رجعو ازواجهم راضخين
والأخطاء هي اللي ذكرتها ابتداءً بقصة الشعر واللبس وزيادة الوزن وانقاصه
وانتهاءً باعطائه الصلاحية في ظلمها .
..
نصيحة..
( لا تسمحي لأي كان سواء زوجك أو أهله أو جارتك صديقتك اختك ... أن يسلبك حقك
أحبي زوجك واحبي كل من حولك.. ولكن أحبي بحدود
اعطي بقدر ماتأخذين..ولاتبالغي وتسرفي
وازني في بين الأخذ والعطاء .. لكي تتجنبي الندم )
والله أعلم.