هل تعاني حواء العاملة من هذه المشكلة؟

السلام عليكم،،
نبي رأي الحوائيات العاملات بخصوص ذكورية أماكن العمل.
لو كنتي تشتغلي في مكان وعندك زملائك رجال قوليلي رأيك؟ وكيف تتصرفي؟
نبدأ بنفسي ، مكان عملي مختلط، كل الإدارات الكبرى للذكور، رغم أنه عندنا نساء ذوات كفاءة بس مش عارفة ليش مايعطوش فيهم فرص كبرى، حتى بالنسبة للفرص العادية تلقي أغلبها للذكور، كأنه فيه نظرة متخلفة لعمل المرأة( طبعا القوانيين في أغلب دولنا تمنع التمييز في العمل) ، كأنه فيه تحالف قوي للذكور في أماكن العمل ضد الإناث بطريقة غير مباشرة، طبعا مع وجود استثناءات أكيد، بس نتكلم بشكل عام، أول ما بديت شغلي قالتلي زميلتي انه فيه ذكورية بس وقتها كنت فرحانة بالشغل وقلت لا أكيد لو أثبتت نفسي مافيش قدامي أي عائق، بس مع الوقت بديت نلاحظ هالشي واضح معاي أو مع غيري، يعني يعطوا للنساء فتات الفرص ويخلوا الفرص الكبيرة ليهم، غلطاتهم الكبيرة تغتفر وزلاتنا نحن النساء تُنتظر، كأنهم متربصين لأقل زلة، من فترة غيروا مديري بمديرة وقتها فرحت قلت خلاص حنبدوا عهد جديد مع الوقت تبين لي كأن حاطينها ديكور أبسط صلاحيتها ما تقدرش تمارسها الا لما ترجع لمديرها(الذكر) رغم انه المدير الي كان قبلها يعارض حتى مديره عادي.
كأني حسيت انه عند زملائنا الرجال خوف من طيف أي نجاح ينسب لأي امرأة منا، ولو أخذنا الموضوع بمعيار الإنضباط والكفاءة لكانت النساء أكثر انظباطا وكفاءة وهذا مش تحيز هذا أمر واقع، أقل شي يثبت كلامي نتائج المدارس والجامعات دائما التراتيب الأولى للبنات واهتمامهم بالدراسة ماعليشي أي نقاش.
حاليا بديت نحس بالإحباط وبدت تجيني فكرة اني نغير شغلي رغم حبي ليه بس مشاكلي كلها بسبب بيئة العمل، بس صديقاتي الي غيروا شغلهم نصحوني اني ما نغيراش لأن هالظاهرة في كل الأماكن تقريبا، مش عارفة لأمتى حنقعدوا نبذلوا في مجهود مضاعف باش نتحصلوا على أقل الفرص وزملائنا الذكور أغلبهم في تسيب واهمال أو حتى مجهود مساوي لمجهودات النساء وفي نفس الوقت المكافاءات بجميع أنواعها مادية والا معنوية ليهم.
نتمنى إن ما حد يفهم كلامي إنه حسد أو غيرة لأني مستحيل نغار من نجاح مبني على تكافؤ الفرص بالعكس تبدأ فيه منافسة شريفة بس الواقع إنه تميييز على أساس الجنس، والكارثة إنك صعب تواجهي بيه أي حد ، للأسف كأن الأنثى عدوة لنفسها يعني لو فتحت هالموضوع ح نلقى اناث يعارضن كلامي لأن للأسف احني الإناث في العمل نتعاملوا مع بعض كأننا سلفات، بينما الذكور كأنهم اخوة عارفين إن مصلحتهم واحدة.
حاليا أني سلبية جدا بخصوص الشغل معش نرفع من كفائتي ولا نطور من نفسي لأن في الأخير عارفة مافيش حد ح يقدر. لذلك نشتغل في شغلي الأساسي بس، أنتِ كيف تتصرفي؟