هل حب الحرمه للرجل يوصل لانها تصير عمياء علشانه

مساء الخير اذا كنتم بالمساء
وصباح الخير إذا كنتم بالصباح
اليوم ياحبايبي ابي اناقشكم بموضوع شاغل بالي ،
من فتره افكر فييييه ، عاد ماعندي غير خواتي بنات حواء اصدع لهم روسهم '
اسمعو ياطويلات العمر :
هذا ياطويلات العمر قبل فتره كنت اسولف مع وحده من صديقاتي '
كنت اقولها بطولاتي وهي بعد تقولي بطولاتها '
وسالفه ورى سالفه لين قالت لي اليوم طبخت !
مدري قالت العشاء او الغداء تصدقوون نسيت المهم
تقول طبخت مالذ وطاب لفلان ( تقصد زوجها ).
الله يسخرها لها قوولي امين
بعد ماخلصت طبخ طلعو مشوار ويوم ارجعو للبيت فلان كان جوعان فراحت تسخن له الاكل '
ويدق جواله وكانو الدوام يبونه يجي المهم
قالها الدوام دقو علي بطلع ( عاد شخصيته من الرجال الي بس مستعجلين كان احد لاحقهم )
قالت اصبر احط لك تاكل وانت بالسياره قال ماقدر تاخرت وهو يطير.
بعد ربع ساعه دق عليها وقالها برسل لك صديقي ياخذ الاكل ويجيبه لي للدوام .
وبنت الحلال ماقصرت جهزت كل شي وحطته بالحوافظ ،
وجاء صديقه واخذه .
يوم قالت لي : قلت لها عادي عندك يرسل لك صديقه مايغار عليك ؟
وجلست المسكينه تبرر له
هنا أنا سكتت إذا هي راضيه ليه اتكلم بيني وبينكم خفت تقول اني اعبي راسها ع زوجها والا تفهمني غلط ( بس المفروض ماكان يرسل رجال غريب لزوجته علشان الاكل بامكانه يقوله رح جب لنا من المطعم ، وين غيرته ع زوجته )
المهم وتخلص السالفه وجاء ع بالي قبلها قالت لي
ان زوجها كان يبي قرض وطبعا هي موظفه وعندها واحد من قرايبها بس من بعيد عنده موسسه نظامهم يعطون سلفات تخيلو كلمت رجال ماتعرف عنه الا انه قريب لها من بعيد ولا عمرها كلمته او شافته بس علشان زوجها كلمته وطلبت منه سلفه قال لها خلاص بس خلي زوجك يكلمني وقالت لزوجها واستانس انها دبرته بالفلوس
وتخيلو يوم جاء بيروح له قالها دقي ع فلان وقولي له كذا وكذا. ( الموضوع ماكان مستاهل انها تدق مره ثانيه بس مدري شلون يرضى زوجته تكلم واحد غريب علشان فلوس ). وراح لرجال واتفق معاه يوم جاء عند الكفاله
ساله الرجال مين الى بياخذ السلعه باسمه ومين الى بيكون كفيله ( يعني الزوج ياخذ السلفه وزوجته تكفله او العكس )
خلاصة القصتين الى كتبتهم احس هالزوج ماعنده غيره ع زوجته يعني ديووث ياكثر الى نشوفهم كذا
والمشكله الزوجه تكون راضيه او مغلوب ع امرها لانها ماتبي تخسر هالزوج والا الى يطلب من زوجته تشتغل بمكان مختلط وعادي عنده الوضع
رجال هالزمن غريبين ليش مايغارو ع زوجاتهم والا الى تطلبه زوجته يوصلها مكان ويقول لها خوذي نقل
يعني عادي عندك زوجتك تروح مع رجل غريب وانت موجود
بجد غريبين والحريم المسكينات علشان يحافظون ع زواجهم يسكرون عيونهم عن حاجات يمكن تجرحهم من جوه مثل الى بالع الموس وساكت .
يالا ياحلوين المايكرفون لكم .