هل حياتي الزوجية طبيعية؟

السلام عليكم و رحمة الله وبركاته،




بنات انا تزوجت من كم شهر فقط من مطلق وعنده بنت (البنت عند امها وعلاقته فيهم رسمية بحكم وجود خلافات وصلت للمحاكم بسبب عناد اهل البنت وانتقامهم منه. طليقته والبنت ماكنهم موجودين بحياتي لانهم اصلا بمنطقة بعيده)


زوجي كان طاير فيني وقت الخطوبة والملكة لكن من وقت الزواج وانا احسه بدا زي الي يمل!!!!!!


ليش متوترة من هالشي؟


اولاً، لان السبب الاول لطلاقة زي ماكان يقول هو "الملل والفتور"! لكن كان دايم يقول ان طليقته كانت تحب المشاكل و نكدية و عصبية وان العلاقة الزوجية انتهت بينهم بعد ولادة البيبي (من كثر المشاكل)!


ثانيا: انا فرفوشة و موظفة ودايم اهتم بنفسي واجدد بالروتين. احيانا افكر اذا الحين طفشان كيف بعد سنتين وثلاث!! و برضو الروتين جزء من الحياه ومو لازم كل يوم مفاجات!


ثالثاً والاهم/ يبدو لي انه هو اصلا شخص ممل وفيه شوية اكتئاب. لان ٩٠٪؜ من خرجاتنا تكون من راسي وتخطيطي وهو نادرا مايكون المبادر.


انا عمري ٣٣ وامي دايم تنصحني اعجل بالحمل. تعبت من التفكير هل ابدا اخطط للحمل او لا (بخصوص موضوع الحمل زوجي قبل الزواج كان متحمس لبناء اسرة وكان يبيني احمل من اول يوم! لكن طلبت منه ناجله لمدة ٦ شهور فمدري ممكن زعل لان غير كلامه وقال مافي حمل قبل سنتين 🤣!)


يبدو لي ان زوجي طيب لكن مايعرف كيف يسعد نفسه و يستمتع بالحياة ولانه هو ممل وملان من عيشته فيطفش من الي حوله.


فسوالي للحكيمات، كيف اتعامل معاه وهل عندي مشكلة كبيرة لازم التفت لها ولا عادي؟ هل فعلا اول شهور الزواج وردية وشوق وحنين طول الوقت ولا عادي الزوج يصير بارد فترات؟