هل زواج المرأه بأصغر منها نوع من الظلم ؟؟

حبيباتي
مساء / صباح الخيرات
كنت اشوف زمان رجال كبار متزوجين بنات صغار وكنت أقول ياربي مو حرام وظلم تقضي حياتها مع شايب .. كيف عايشين وبعضهم استمرت زيجاتهم وبعضهم كان شايلها ع كفوف الراحه ..سبحان الله ارزاق ومكاتيب بس يكون العكس ماتوقعت ابدا اشوف... ومررره انكسر خاطري من هالسالفه
أمس بس ف المستشفى ف الطواري شفت قصه ولا ف الخيال سبحان الله الولد جاي مع امه تعبانه ومريضه كبيرة سن يمكن بالثمانين ... وماشاء الله الولد حليو شايلها شيل حتى يسوي طرحتها بس باين عليه هو بعد تعبان ويالله يمشي يسحب رجوله سحب..
بس راح الصيدليه سولفت مع العجوز قالت هذا وحيدي وكاسر خاطري ومدري وشو طلعت سالفته كذا والعهده على كلام العجيز يعمري عليها :
تزوج وحده اكبر منه ب 17 سنه تحلف العجوز انها فوق الخمسين والولد الحين ب35
طبعا تقول مدري من دله عليهم ولا عرف بعمرها الا بعد الملكه يوم جاء يضيفها بالكرت ...ولما سألهم قالوا احنا طلعناها عليك وشفتها ولا سألتها ..ولما قال لها ... بكت وقالت أنا مو ذنبي اهلي مازوجوني الا بعمر كبير قعدت مع شيباني أنا الصغيره .. المهم هالكلام قبل 12 سنه او اكثر الولد يكسر الخاطر ياعمري ماعنده ابو ولا اخ ولا عمام بس هو وامه واخواته تقول وليدي طيب وتمشي عليه ..
بعد فتره قال خلاص الله كتب علي كذا ومشى الوضع بينهم سنين واراد الله انها ماحملت . طبعا ف الفترة هذي طاح بالسفريات وزوجته هذي تاركته على راحته وتروح لامها واهلها تقول انها تحبه ومخليته ع راحته ومو مصدقه الله رزقها بشاب تقول العجوز وتعطيه من راتبها لانها مدرسه عشان كذا استمر معها..
العجوز باين ماتحبها... تقول وقعدت ازن عليه الا يعرس عشان اشوف عياله كفايه عليه اكثر من 10 سنين مضيعها من عمره تقول وزوجته تزن عليه من الجهه الثانيه الا يشاركها في بيت يشترونه بالتمويل العقاري .. تقول أنا نجحت وهي نجحت ودخل معها شريك بشقه بما يقارب المليون مع ارباح البنوك عشان بس تقعده ع بساط الفقر ومايقدر يفتح بيت ثاني ..
تقول وخطبنا له وحده احنا نعرفها في نفس عمره مطلقه وجميييييييييييله ومتعلمه بعد اكثر من الاوله تقول صدق حسيت أن ربي عوضه .. وحمدت ربي ألف يوم جابت له بنت وهو كان بيموت من الفرح بهالبنيه.. تقول لكن حياتهم كلها كانت مشاكل في مشاكل... تقول ولدي متعود على ذيك ماتسأله وين تروح ولا وين تجي . تقول جت ذي قالت وين تروح ووين تجي تعال خلك مع بنتك وخلك مثل فلان وعلان.... تقول انهبل ولدي مو متعود ..مع انه يموت فيها وعلى كثر المشاكل معها الا انه يرجع لها .. تقول ماقعدوا حتى شهر الا وهي عند اهلها .. تقول المصيبه رجع سافر اندونيسيا بدونها قالت أنا شرطت عليه مايسافر لحاله مع زملاء السوء والله ماعاد ارجع له وطلبت الطلاق... وطلقها القاضي منه وعطاه زيارة مرة ف الشهر ساعتين تقول كان بيموت من القهر ...
وتقول العجوز ولدها صار مريض بالحصوات والكلى وكل يوم والثاني من مستشفى لمستشفى .. تقول ماقدر يعيش مع الأولى لانه يبي العيال ويبي وحده من عمره وهي تكسر خاطره بالكلام تقول اهلي مابقى منهم احد ماعندي الا الله ثم انت ... تقول العجوز ولا قدر يعيش مع الثانية لانها تبي مسؤولية ووراه 24 ساعه : البنت تعبانه , انت تتركنا لوحدنا , انت مو حاس بالمسؤولية.. وهو بعد شكله مو مؤهل للتعدد أنا اقوله ...
تقول وهذا هو وليدي انظلم بحياته رايح جاي يهجول قطع قلبي وقلوب خواته حتى بنته ماتهنى فيها ولا عاش طفولتها وشيب راسه قبل وقته الله يعينه .. ولايبي يعرس مرة ثانيه حلف يقول خلاص ..

ها يابنات.... قلتوا الحمد لله ؟
من جد الواحد إذا شاف مصايب غيره تهون عليه مصيبته