هل صحيح ان البنت السنعة اذا انفصلت ماتطلع من بيت أهلها

السلام عليكم انا عمري ٤٠سنة و طالعة من ٣شهور وانفصلت رسميا وامي وابوي كان ودهم ارجع ومواضيعي للي بتراجع وتعرف قصتي وعشت مع اهلي غربة فضيعة هالثلاث شهور وكلام قوي من امي واحداث كنت اصيح وادعي وعيالي كنت اشوف في عيونهم اني تسببت عليهم وطلعتهم من بيتهم وسرايرهم ولعبهم واريحيتهم طلبت من اهلي السطح يتصلح وارقى ارحم من الغرفة التحتية رفضت امي هم فقط يقولون هذي الغرفة التحتية المتوفرة واني كنت اعيش مع ٢من خواتي وابوي وامي في غرفة وحدة ليش انا مو مقتنعة بهذي الغرفة لان انا وعيالي ما اخذنا راحتنا البيت مو بيتي ولا لي سلطة فيه او ميانة وغرفة اللي انا فيها مامعي مفتاح وباب الشارع مامعي رفضت امي تقول علشان ماتطلعين  كل شوي لو بطلع مشوار او بودي عيالي اخاف يقولون كل شوي طالعة يعني مو زي لو في بيتك الاكل لو صلحوا هم مستحيل اتجرأ واقول بحشي برجر ثاني لولدي او بغرف صحن ثاني بعني هم متعودين وحدة تكفي، 
طلعت من بيتي وعايفة وكارهة وانا والله ماكنت اعرف وين اروح املي بسطح اهلي او توسيع ملحقهم وهم ماكان عندهم استعداد يسوون اي شيء الى ان منُ الله علي بفاعلة خير تتكفل بمبلغ للشقة لو ابي اطلع جلست ادور حول بيت اهلي مالقيت تفاجأت بالاسعار الغالية انا ما بعدت خذت رخصة القيادة كنت ابي حول مدرسة عيالي لقيت وحدة بس سكانها يخوفون العمارة شكلها غير مناسب غير نظيفة سعر مرتفع بدون لفت في السطح سبحان الله لقيت في اللي جنبها مناسبة كانت معي امرأة كبيرة تعرفت عليها لتدريبي للقيادة وكانت تعطيني المشورة والرأي هذا زين ورحت معها لتوقيع العقد ودفع المبلغ وقالت بروح معك اذا جيتي تفرشين وخبرت اهلي وابوي سأل عن كل شيء وامي قالت على راحتك بس اليوم الثاني سألتني من فرشها وش فيها وش مافيها وش اسم اللي ساعدوك كذا بعدين قالت البنت السنعة ماتطلع من بيت أهلها رغم ان امي قالت فيني كلام قوي وانا كنت قاعدة عشر سنوات م انفصلت عشان خاطرهم وموقفهم، والبارح ايضا وحدة من صديقاتي سولفت معها قالت خوالك و عمانك وش بيقولون اذا سمعوا انك طالعة شقة بلحالك بتحسين بالوحدة من بيصلح لك والمصاريف ما بتلحقين عليها، همي الاولاد من بيمسك هم لو هم في طريقهم الصلاة ويبلاهم افكر بعدين اسكن في شقة مسروقة مع اهلي في فلتهم لو نقلوا لاحياء كويسة في شمال وشرق الرياض لكن امي قالت خلاص ماراح ندور فيها شقة بندور فلة صغيرة بدون شقق مسروقة يعني طردة وهي فترة مضت كانت تقول وين الشقة اللي تقولين جمعية خيرية بيوفرونها لك ومرة قالت مفروض ابوهم ملزوم يوفر سكن لعياله كانت امي تنزعج من صوت لعب عيالي او لو سووا شيء او لو تهاوشوا فكيف الحين تقولي البنت السنعة ماتطلع يعني وش اسوي بنفسي انا وعيالي مو عارفة هل قراري بالسكن المستقل خطأ او عيب او حرام او جريمة بحق عيالي ،شايلة هم تربية عيالي الاولاد وانهم يكونون صالحين مستقيمين حتى لو ابوهم معدد او لاهي او متوفي كيف الامهات طلعوا وربوا رجال ما تأثروا بمروج مخدرات او احد يبلاهم او يحضرون جلسات دق وهز وزيران لحد يستعجل ويقول اجل ليش تطلعين من بيت ابوهم الا لين يقرا مواضيع ابي اوصل عيالي لبر الأمان حتى لو كنت مظطرة للانفصال من أبوهم من تملك الكلام المطمئن لي والوصفة السرية وشعور الغربة وشعور اني أقدمت على خطوة جريئة لأن محد حولي من اقاربنا انفصلت وطلعت بشقة في عمارة عوايل نعم يسوقون وقليل يكشفون وبعضهم صاروا يلبسون بنطال بين الاقارب بس الانفصال والاستقلالية بشقة هذا اللي لم يسبقني في هذا أحد من قبل